Գլյուկոզամին - Սննդային հավելումներ

Ընդհանուր նկարագրություն

Գլյուկոզամինը բնական միացություն է, որը հայտնաբերվում է աճառներում՝ պինդ հյուսվածք, որը պաշտպանում է հոդերը:

Որպես հավելում օգտագործվող գլյուկոզամինը ստացվում է խեցեմորթների կեղևներից կամ պատրաստվում է լաբորատորիայում: Գոյություն ունեն գլյուկոզամինի մի քանի ձևեր՝ գլյուկոզամինի սուլֆատ, գլյուկոզամինի հիդրոքլորիդ և N-ացետիլ գլյուկոզամին: Այս հավելումները չեն համարվում մեկը մյուսին փոխարինող:

Մարդիկ օգտագործում են բերանային (օրալ) գլյուկոզամինի սուլֆատ բորբոքման, քայքայման և աճառի վերջնական կորստի հետևանքով առաջացած ցավոտ վիճակը բուժելու համար (օստեոարթրիտ):

Ցուցումներ

Որոշակի վիճակների համար գլյուկոզամինի օգտագործման վերաբերյալ հետազոտությունները վկայում են հետևյալի մասին:

• Օստեոարթրիտ. գլյուկոզամինի սուլֆատի բերանային (օրալ) օգտագործումը կարող է որոշակի ցավազրկում ապահովել ծնկի օստեոարթրիտ ունեցող մարդկանց: Որոշ հետազոտություններ ցույց են տալիս, որ այն նաև կարող է օգնել օստեոարթրիտի հետ կապված ծնկահոդերի դեգեներացիայի դանդաղեցմանը: Ավելի շատ ուսումնասիրություններ են անհրաժեշտ՝ ազդրի, ողնաշարի կամ ձեռքի օստեոարթրիտի դեպքում գլյուկոզամինի սուլֆատի հավելումների օգուտները գնահատելու համար:
• Ռևմատոիդ արթրիտ. վաղ հետազոտությունները ցույց են տվել, որ գլյուկոզամինի հիդրոքլորիդի բերանային (օրալ) օգտագործումը կարող է նվազեցնել ռևմատոիդ արթրիտի հետ կապված ցավը: Այնուամենայնիվ, հետազոտողները չեն արձանագրել բորբոքման բարելավում կամ ցավոտ կամ այտուցված հոդերի քանակի քչացում:

Գլյուկոզամինի օգտագործումը դիտարկելիս ուշադիր կարդացեք ապրանքի պիտակները՝ համոզվելու, որ ընտրել եք ճիշտ ձևը: Ավելի քիչ կլինիկական տվյալներ կան օստեոարթրիտի բուժման մեջ N-ացետիլ գլյուկոզամինի օգտագործման վերաբերյալ, և դրա առավելությունները հաստատելու համար ավելի շատ հետազոտություններ են անհրաժեշտ:

Կողմնակի ազդեցություններ

Համապատասխան քանակներով ընդունելիս գլյուկոզամինի սուլֆատը համարվում է անվտանգ: Գլյուկոզամինի սուլֆատի բերանային (օրալ) օգտագործումը կարող է առաջացնել՝

• սրտխառնոց
• այրոցք
• փորլուծություն
• փորկապություն:

Այլ կողմնակի ազդեցություններից են՝

• քնկոտություն
• մաշկային ռեակցիաներ
• գլխացավ:

Գլյուկոզամինային արտադրանքը կարող է ստացվել խեցեմորթների կեղևներից, ուստի մտահոգություն կա, որ հավելումը կարող է ալերգիկ ռեակցիա առաջացնել խեցեմորթների նկատմամբ ալերգիա ունեցող մարդկանց մոտ:

Գլյուկոզամինը կարող է վատթարացնել ասթման:

Որոշակի մտահոգություններ կան, որ գլյուկոզամինը կարող է բարձրացնել աչքի (ներակնային) ճնշումը: Եթե ունեք գլաուկոմա, խոսեք ձեր բժշկի հետ նախքան գլյուկոզամինային հավելումներ ընդունելը:

Փոխազդեցություններ

Հնարավոր փոխազդեցությունները ներառում են հետևյալը:

• Ացետամինոֆեն (Պարացետամոլ, Թայլենոլ և այլն). գլյուկոզամին սուլֆատի և Ացետամինոֆենի միասին ընդունելը կարող է նվազեցնել ինչպես հավելումի, այնպես էլ դեղամիջոցի արդյունավետությունը:
• Վարֆարին (Յանտովեն). գլյուկոզամինն առանձին կամ խոնդրոիտին հավելումի հետ կարող է մեծացնել հակամակարդիչ (անտիկոագուլյանտ) Վարֆարինի ազդեցությունները: Սա կարող է մեծացնել ձեր արյունահոսելու ռիսկը:

Ամփոփում

Գլյուկոզամինի սուլֆատը կարող է որոշակի ցավազրկում ապահովել օստեոարթրիտով մարդկանց: Հավելումը համարվում է անվտանգ և կարող է օգտակար տարբերակ դառնալ այն մարդկանց համար, ովքեր չեն կարող օգտագործել ոչ ստերոիդ հակաբորբոքային դեղամիջոցներ (ՈՍՀԲԴ-ներ): Թեև առկա տվյալները հակասական են, նման իրավիճակներում կարելի է փորձել գլյուկոզամինի սուլֆատի օգտակար ազդեցությունը: