Ընդհանուր նկարագրություն

Հիդրոքլորթիազիդը թիազիդային միզամուղ է, որը նշանակվում է բարձր արյան ճնշման (հիպերտենզիա), ախտանիշային սրտային անբավարարության և այտուցների բուժման համար:

Հիդրոքլորթիազիդն ազդում է՝ արգելափակելով երիկամներում առաջնային մեզից հեղուկների և աղերի վերաներծծումը (ռեաբսորբցիա), որի արդյունքում բարձրանում է միզարձակության չափը: Արյան ճնշումը նվազեցնող ազդեցեությունը լիարժեք ուսումնասիրված չէ:

Հիդրոքլորթիազիդն օրգտագործվում է տարբեր այլ դեղամիջոցների հետ համակցված և մտնում տարբեր պատրաստուկների կազմության մեջ:

Ամերիկյան FDA կազմակերպությունը Հիդրոքլորթիազիդը հաստատել է 1959թ. փետրվարին:

Դեղեր և հավելումներ բաժնի հովանավոր

Այցելեք Յունիմեդ բժշկական կենտրոն ճշտգրիտ ախտորոշում ստանալու համար:

Բրենդային անվանումներ

Hydrodiuril, Ezide, Hydro-Par, Microzid, Hypothiazid

Ցուցումներ

Հիդրոքլորթիազիդն օգտագործվում է օրգանիզմում ավելցուկային հեղուկների կուտակումը և մարմնի այտուցները բուժելու մեջ, որոնք զարգացել են սրտային անբավարարության (նվազեցնում է ինչպես նախածանրաբեռնվածությունը, այնպես էլ՝ հետծանրաբեռնվածությունը), լյարդի ցիռոզի, քրոնիկ երիկամային անբավարարության, կորտիկոստերոիդներով բուժման և նեֆրոտիկ համախտանիշի պատճառով:
Հիդրոքլորթիազիդը նաև առանձին կամ այլ դեղերի հետ զուգակցված օգտագործվում է բարձր արյան ճնշման (հիպոտենզիա) բուժման մեջ:
Թեև Հիդրոքլորթիազիդը հաստատված է լյարդի ցիռոզով պայմանավորված այտուցները բուժելու համար, սակայն հազվադեպ է օգտագործվում, քանի որ առկա են այլ՝ ավելի արդյունավետ միզամուղներ:
Հիդրոքլորթիազիդը կարող է օգտագործվել կալցիում պարունակող երիկամի քարերի բուժման մեջ, քանի որ խթանում է երիկամներով կալցիումի արտազատումը և նվազեցնում մեզում կալցիումի մակարդակը, որի շնորհիվ կարող է իջնել մեզում կալցիումական քարերի ձևավորման հավանականությունը:

Մի՛ փորձեք

Ինքնուրույն օգտագործել որևէ դեղամիջոց կամ ինքնուրույն փոխել ձեզ նշանակված դեղամիջոցները կամ դրանց դեղաչափերը:

Կողմնակի ազդեցություններ

Հիդրոքլորթիազիդի կողմնակի ազդեցություններից են՝

թուլություն
ցածր արյան ճնշում (հիպոտենզիա)
լուսազգայունություն (արևի ճառագայթներից առաջացող ցանավորում, ամառային մաշկացան)
էրեկտիլ խանգարում (իմպոտենցիա)
սրտխառնոց
որովայնային ցավեր:

Ավելի լուրջ կողմնակի ազդեցություններից են՝

էլեկտրոլիտների (աղերի) կորուստ և անհավասարակշռություն (օրինակ՝ նատրիում, կալիում):
պանկրեատիտ
դեղնուկ
անաֆիլաքսիա (կյանքին սպառնոցող գերսուր ալերգիկ ռեակցիա):

Սուլֆոնամիդների նկատմամբ ալերգիա դրսևորած պացիենտները նաև կարող են ալերգիկ ռեակցիա ունենալ Հիդրոքլորթիազիդի նկատմամբ, քանի որ այս նյութերն իրենց քիմիական կառուցվածքով նման են միմյանց:

Հիդրոքլորթիազիդը կարող է հրահրել երիկամների գործունեության խանգարումը, ուստի երիկամային հիվանդությամբ պացիենտներին պետք է նշանակվի զգուշությամբ: Այս դեղամիջոցը նաև կարող է նվազեցնել արյան կալիումի, նատրիումի և մագնեզիումի մակարդակները: Ցածր կալիումը և մագնեզիումը կարող են հանգեցնել սրտի ռիթմի խանգարումների (առիթմիա), հատկապես՝ Դիգօքսին ընդունող պացիենտների շրջանում: Հիդրոքլորթիազիդով բուժում ստանալիս սովորաբար պացիենտներին խորհուրդ է տրվում ստանալ կալիումական հավելումներ՝ ուղղված արյան մեջ կալիումի ցածր մակարդակը (հիպոկալեմիա) և դրանով պայմանավորված սրտի առիթմիաները կանխարգելելուն:

Հիդրոքլորթիազիդ ընդունող անձանց արյան մեջ բարձրանում է միզաթթվի մակարդակը, և սա որոշ անձանց մոտ կարող է բերել սուր պոդագրայի (հոգատապի) դրվագի զարգացման:

Թիազիդային միզամուղները կարող են բարձրացնել արյան շաքարի (գլյուկոզա) մակարդակը և վատթարացնել շաքարային դիաբետի ընթացքը:

Փոխազդեցություններ

Հիդրոքլորթիազիդը կրճատում է երիկամներով Լիթիումի արտազատումը և բերում վերջինիս թունավոր ազդեցության բարձրացման:
Ոչ ստերոիդ հակաբորբոքային դեղամիջոցները (ՈՍՀԲԴ-ներ), օրինակ՝ Իբուպրոֆենը, կարող են թուլացնել Հիդրոքլորթիազիդի հիպոտենզիվ (արյան ճնշման իջեցման) ազդեցությունը:
Հիդրոքլորթիազիդը բարձրացնում է արյան շաքարի (գլյուկոզայի) մակարդակը, ուստի դիաբետի դեղերի հետ զուգակցելիս կարիք է առաջանում շտկումներ անել այս դեղերի դեղաչափերում:
Կորտիկոստերոիդների հետ զուգակցելիս բարձրանում է արյան մեջ կալիումի և մյուս էլեկտրոլիտների մակարդակի նվազման և Դիգօքսինից թունավորման հավանականությունը:
Խոլեստիրամինը և Կելստիպոլը կապում են Հիդրոքլորթիազիդը և նվազեցնում ստամոքս-աղիքային խողովակում վերջինիս ներծծումը 43-85%-ով:

Վարվեք այս կերպ

Տեղեկացրեք ձեր բժշկին, եթե զգում եք նրա նշանակած դեղամիջոցի հետ կապված որևէ անցանկալի կամ կողմնակի ազդեցություն:
Տեղեկացրեք ձեր բժշկին, եթե ցանկանում եք ընդունել որևէ այլ դեղամիջոց կամ հավելում:

Հղիություն և կրծքով կերակրում

Հղիների մոտ Հիդրոքլորթիազիդի վերաբերյալ բավարար հետազոտությունները բացակայում են: Թիազիդները կարող են բարձրացնել նորածնային դեղուկի, արյան թիթեղիկների քչացման (թրոմբոցիտոպենիա), և հավանաբար, այլ պատճառներով ի հայտ եկող ծանր ռեակցիաների ռիսկը:
Հիդրոքլորթիազիդն արտազատվում է կրծքի կաթի մեջ: Հիդրոքլորթիազիդով բացատրվող մեծ քանակներով միզարձակումը կարող է հանգեցնել մայրական կաթի քչացման: Այլ հարցերով այս դեղամիջոցը կրծքով կերակրելիս կարող է դիտվել որպես անվտանգ:

Դեղաչափեր

Հիդրոքլորթիազիդը կարող է ընդունվել սննդի հետ կամ առանց սննդի:
Չափահասների մոտ բարձր արյան ճնշումը (հիպերտենզիա) բուժելիս Հիդրոքլորթիազիդի սովորական դեղաչափն է օրական մեկ անգամ 12,5-50 մգ:
Չափահասների մոտ այտուցը բուժելիս Հիդրոքլորթիազիդի սովորական դեղաչափն է օրական մեկ անգամ 25-100 մգ:

Դեղաձևեր և պահպանում

Դեղաձևեր

Հաբեր՝ 15.5, 25, 50 և 100 մգ:
Պատիճներ՝ 12.5 մգ:

Պահպանում

Հիդրոքլորթիազիդը պետք է պահպանել սենյակային ջերմաստիճանային պայմաններում, անլուսաթափանց և փակ տուփում:

Ամփոփում

Հիդրոքլորթիազիդը միզամուղային դեղամիջոց է, որը նշանակվում է բարձր արյան ճնշման, սրտային անբավարարությունից պատճառված այտուցնրի, ցիռոզի, քրոնիկ երիկամային անբավարարության, նեֆրոտիկ համախտանիշի և կորտիկոստերոիդային այտուցների բուժման համար:

Մինչև որևէ դեղ ընդունելը հարկավոր է մանրամասն տեղեկանալ և ձեր բժշկի հետ քննարկել ցուցումների և հակացուցումների, կողմնակի ազդեցությունների, այլ դեղերի հետ փոխազդեցության, նախազգուշացումների, հղիության և կրծքով կերակրելու ընթացքում օգտագործման հարցերի մասին: