Ինդոմեթացին - Ոչ ստերոիդ հակաբորբոքային դեղեր

Ընդհանուր նկարագրություն

Ինդոմեթացինը ոչ ստերոիդ հակաբորբոքային դեղ է, որն օգտագործվում է տարբեր հիվանդությունների ժամանակ առաջացող ցավը, ջերմության բարձրացումն ու բորբոքումը բուժելու համար:

Ինդոմեթացինը պատկանում է ոչ ստերոիդ հակաբորբոքային դեղամիջոցների (ՈՍՀԲԴ-ներ) դասին՝ դեղեր, որոնք մեղմացնում են բարձր ջերմությունը, ցավը և բորբոքումը: Որպես ՈՍՀԲԴ, Ինդոմեթացինն ազդում է՝ կրճատելով օրգանիզմում պրոստոգլանդինների արտադրությունը: Պրոստոգլանդինները կենսաբանական ակտիվ նյութեր են և անմիջականորեն մասնակցում են ցավի, բորբոքման և մարմնի ջերմաստիճանի բարձրացման գործընթացներին: Նվազեցնելով օրգանիզմում պրոստոգլանդինների քանակը, Ինդոմեթացինը մեղմացնում է ցավը, բորբոքումը և իջեցնում ջերմությունը։

Ամերիկյան FDA կազմակերպությունը Ինդոմեթացինը հաստատել է դեռևս 1965թ. հունվարին:

Բրենդային անվանումներ

Indocin, Indocin-SR

Օրինակներ

Ոչ ստերոիդ հակաբորբոքային դեղերից են նաև՝

• Ասպիրին
• Նապրոքսեն
• Իբուպրոֆեն
• Նաբումետոն
• Նապրոքսեն նատրիում
• այլ տասնյակ դեղեր:

Ցուցումներ

Ինդոմեթացինը նշանակվում է հետևյալ հիվանդությունների գանգատները և մյուս ախտանիշները մեղմացնելու համար՝

• ռևմատոիդ արթրիտ
• պոդագրային արթրիտ
• այլ հոդաբորբային վիճակներ և հոդացավեր
• ձուսպապարկի բորբոքում (բուրսիտ)
• ջլի բորբոքում (տենդոնիտ)
• մինչև չափավոր ցավերով ուղեկցվող այլ հոդամկանային վիճակներ:

Կողմնակի ազդեցություններ

Ինդոմեթացինի տարածված կողմնակի ազդեցություններից են՝

• սրտխառնոց
• փսխում
• փորլուծություն
• ստամոքսի անհարմարության զգացում (դիսկոմֆորտ)
• այրոցք (изжога)
• մաշկային ցան
• գլխացավ
• գլխապտույտ
• քնկոտություն:

Այլ կարևոր կողմնակի ազդեցություններից են՝

• հեղուկների պահպանում (այտուցներ)
• արյան մակարդուկներ (թրոմբ)
• սրտամկանի ինֆարկտ
• բարձր արյան ճնշում (հիպերտենզիա)
• սրտային անբավարարություն:

Որոշ անձինք ալերգիկ են ՈՍՀԲԴ-ների նկատմամբ և նրանց մոտ կարող է առաջանալ սուր շնչարգելություն ու հևոց, երբ ընդունեն որևէ հակաբորբոքային դեղամիջոց: Որևէ ՈՍՀԲԴ-ի նկատմամբ սուր ալերգիկ ռեակցիա դրսևորած անձինք հավանական է, որ ունենան նմանատիպ ռեակցիա մեկ այլ ՈՍՀԲԴ ընդունելիս:

Ինդոմեթացինը կարող է առաջացնել ստամոքսի կամ աղիների խոցոտում, որոնք կարող են արյունահոսել: Երբեմն խոցերը կարող են առաջանալ առանց որովայնի ցավերի, և արյունահոսության դեպքում խոցը դրսևորվի միայն սև ձութանման կղանքով, ընդհանուր թուլությամբ կամ ոտքի կանգնելիս ի հայտ եկող գլխապտույտով (օրթոստատիկ հիպոտենզիա):

ՈՍՀԲԴ-ները նաև թուլացնում են արյան մակարդվելու ունակությունը, ուստի կարող են ուժեղացնել վնասվածքից հետո առաջացող արյունահոսությունը:

ՈՍՀԲԴ-ները նվազեցնում են երիկամների արյունամատակարարումը, որը կարող է թուլացնել երիկամների գործունեությունը: Նման խանգարումն ավելի հավանական է, որ առաջանա երիկամային հիվանդություններով կամ կանգային սրտային անբավարարությամբ անձանց մոտ, ուստի նման դեպքերում հակաբորբոքային դեղերը պետք է նշանակել մեծ զգուշությամբ։

Քթային պոլիպներ ունեցող անձինք կամ նրանք, ովքեր Ասպիրին կամ մեկ այլ ՈՍՀԲԴ նկատմամբ դրսևորում են ալերգիա, պետք է խուսափեն Ինդոմեթացին օգտագործելուց, քանի որ նրանց մոտ բարձրանում է ալերգիկ ռեակցիաների վտանգը:

Փոխազդեցություններ

• Խոլեստիրամինը և Կոլեստիպոլը կարող են կրճատել աղիներից Ինդոմեթացինի ներծծումը:
• Ինդոմեթացինը և մյուս ՈՍՀԲԴ-ները կարող են բարձրացնել արյան մեջ Լիթիումի մակարդակը՝ կրճատելով երիկամներով այս միներալի դուրսբերումը, որի պատճառով կարող է բարձրանալ Լիթիումի թունավոր (տոքսիկ) ազդեցությունը:
• Ինդոմեթացինը մյուս ՈՍՀԲԴ-ների նման կարող է թուլացնել բարձր արյան ճնշման բուժման դեղերի հակահիպերտենզիվ (ճնշումը նվազեցնող) ազեդեցությունը: Նման փոխազդեցության մեջ կարող է դեր խաղալ արյան ճնշման կարգավորման մեջ մասնակցող պրոստոգլանդինների քչացումը:
• Ինդոմեթացինը մյուս ՈՍՀԲԴ-ների նման Մեթոտրեքսատի կամ ամինոգլիկոզիդների, օրինակ՝ Գենտամիցինի հետ զուգակցելիս կարող է արյան մեջ բարձրանալ վերջին երկուսի մակարդակները, հավանաբար, օրգանիզմից դրանց հեռացումը դանդաղելու հաշվին: Նման փոխազդեցությամբ կարող են ավելանալ Մեթոտրեքսատի կամ ամինոգլիկոզների հետ կապված կողմնակի ազդեցությունները:
• Ասպիրինի կամ այլ ՈՍՀԲԴ-ի նկատմամբ ասթմայի նոպաների, եղնջացանի կամ մեկ այլ ալերգիկ ռեակցիայի պատմությամբ անձինք պետք է խուսափեն Ինդոմեթացին օգտագործելուց:
• Ինդոմեթացինն Ասպիրինի հետ զուգակցելիս կարող է բարձրանալ մարսողական խողովակի խոցերի առաջացման վտանգը:
• Նույն կերպ, ստամոքսի խոցի հավանականությունը բարձրանում է, երբ Իբուպրոֆեն կամ այլ ՈՍՀԲԴ ընդունող մարդիկ օգտագործում են ավելի շատ, քան օրական երկու-երեք չափաբաժին ալկոհոլային խմիչքներ:
• Ինդոմեթացինն ուժեղացնում է Ցիկլոսպորինի բացասական ազդեցությունը երիկամների գործունեության վրա և պրոստոգլանդինների ընկճման մեխանիզմող թուլացնել Ֆուրոսեմիդի և թիազիդային միզամուղների ազդեցությունը:
• Հակամակարդիչներ, օրինակ՝ Վարֆարին ստացող անձինք պետք է զերծ մնան Ինդոմեթացին օգտագործելուց, քանի որ վերջինս նույնպես «ջրիկացնում է» արյունը, և լրացուցիչ հակամակարդիչ ազդեցությունը կարող է հանգեցնել վտանգավոր արյունահոսությունների:

• Հղիների շրջանում Ինդոմեթացինի անվտանգության մասին համարժեք տվյալներ չկան: Ուստի, հնարավոր է, որ Ինդոմեթացինը պտղի վրա թողնի կողմնակի ազդեցություններ:
• Ինդոմեթացինն արտազատվում է կրծքի կաթի մեջ, ուստի կրծքով կերակրող կանայք պետք է խուսափեն այս դեղն օգտագործելուց:

Դեղաչափեր

• Սովորական ազդող Ինդոմեթացինի խորհուրդ տրվող դեղաչափը չափահասների մոտ բորբոքումների կամ ռևմատոիդ ախտահարումների բուժման համար օրական 50-200 մգ է, որը պետք է բաժանվի 2-3 ընդունման միջև:
• Երկար ազդող Ինդոմեթացինի դեղաչափը 75-150 մգ է, որը պետք է բաժանվի օրական երկու անգամ ընդունվող դեղաչափերի:
• Բուրսիտը կամ տենդոնիտը բուժվում են օրական ընդհանուր 75-150 մգ սովորական ազդող Ինդոմեթացինով, որը պետք է բաժանվի 3-4 ընդունումների միջև կամ 75-150 մգ երկար ազդող Ինդոմեթացինով, որը պետք է բաժանվի 2 ընդունումների միջև:
• Սուր պոդագրային արթրիտը բուժվում է 50 մգ-ից յուրաքանչյուր 8 ժամը մեկ, 3-5 օրվա ընթացքում:
• Ինդոմեթացինը պետք է ընդունվի սննդով և մեկ բաժակ ջրով՝ որովայնային անհանգստությունից խուսափելու համար:

Դեղաձևեր և պահպանում

Դեղաձևեր

• Պատիճներ՝ 25 և 50 մգ:
• Պատիճ, երկար ազդող՝ 75 մգ:
• Կախույթ (սուսպենզիա)՝ 25 մգ/մլ:
• Ուղիղաղիքային մոմիկ՝ 50 մգ:
• Ներարկման փոշի՝ 1 մգ:

Պահպանում

• Պատիճները պետք է պահպանել 15-30° C սենյակային ջերմաստիճանային պայմաններում:
• Բերանային (օրալ) սուսպենզիան և ուղիղաղիքային մոմիկները պետք է պահպանել 30° C-ից ցածր պայմաններում:
• Բերանային (օրալ) սուսպենզին չի կարելի սառեցնել:

Ամփոփում

Ինդոմեթացինը ոչ ստերոիդ հակաբորբոքային դեղամիջոց է (ՈՍՀԲԴ), որը նշանակվում է պոդագրային հոդաբորբի, օստեոարթրիտի, փափուկ հյուսվածքի վնասումների (օրինակ՝ բուրսիտ և տենդինիտ), ռևմատոիդ արթրիտի և անկիլացնող սպոնդիլիտի ժամանակ առաջացող բորբոքումների բուժման մեջ: