Կետոկոնազոլ - Հակասնկային դեղեր

Ընդհանուր նկարագրություն

Կետոկոնազոլն ազոլային հակասնկիկային դեղամիջոց է, որն օգտագործվում է որոշ լուրջ սնկիկային վարակների բուժման մեջ:

Կետոկոնազոլը կանխարգելում է սնկիկերի որոշ տեսակների աճը՝ խոչընդոտելով դրանց բջիջները շրջապատող թաղանթների արտադրությունը:

Ամերիկյան FDA կազմակերպությունը կետոկոնազոլը հաստատել է 1981թ. հունիսին:

Բրենդային անվանումներ

Nizoral, Nizoral A-D, Ketodan, Extina, Xolegel, Kuric

Օրինակներ

Կետոկոնազոլի հետ նույն ընտանիքին պատկանող դեղերից են՝

• Ֆլուկոնազոլ
• Իտրակոնազոլ
• Միկոնազոլ:

Ցուցումներ

Կետոկոնազոլը նշանակվում է հետևյալ սնկային հիվանդությունների բուժման մեջ՝

• կաթնախտ (կանդիդոզ)
• խուզող մկնատամ
• մաշկի սնկիկային վարակներ, ինչպիսիք են աճուկային էպիդերմոֆիտիան և մարզիկի ոտնաթաթը
• թեփ
• գունափոփոխ որքին
• բլաստոմիկոզ
• հիստոպլազմոզ
• կոկցիդիոմիկոզ:

Կողմնակի ազդեցություններ

Կետոկոնազոլն ընդհանուր առմամբ մարդկանց մեծ մասի կողմից լավ տարվող դեղ է: Ամենահաճախ զեկուցվող կողմնակի ազդեցություններից են՝

• ցան
• քոր
• սրտխառնոց
• փսխում
• որովայնային ցավ
• գլխացավ
• գլխապտույտ
• հոգնածություն
• էրեկտիլ դիսֆունկցիա (իմպոտենցիա)
• արյան բջիջների քանակների շեղումներ:

Կետոկոնազոլի այլ, թեև հազվադեպ հանդիպող, սակայն կարևոր կողմնակի ազդեցություններից են՝

• սուր ալերգիկ ռեակցիաներ (անաֆիլաքսիա)
• սուր դեպրեսիա
• մազաթափություն
• ծակծկող զգացողություններ:

Զեկուցվել է նաև լյարդի գործունեության խանգարում: Լյարդային խնդրի նշաններից են անսովոր հոգնածությունը, ախորժակի կորուստը, սրտխառնոցը և փսխումը, մաշկի դեղնությունը (դեղնուկ), մեզի մգացումը և կղանքի գունազրկումը: Կետոկոնազոլ ընդունելիս այս նշանների առաջացման դեպքում անհրաժեշտ է անհապաղ տեղեկացնել բժշկին:

Փոխազդեցություններ

Կետոկոնազոլը՝

• ծանր փոխազդեցություն է դրսևորում առնվազն 33 տարբեր դեղերի հետ
• լուրջ փոխազդեցություն է դրսևորում առնվազն 202 տարբեր դեղերի հետ
• չափավոր փոխազդեցություն է դրսևորում առնվազն 241 տարբեր դեղերի հետ
• թեթև փոխազդեցություն է դրսևորում առնվազն 105 տարբեր դեղերի հետ:

Այնուամենայնիվ, սա Կետոկոնազոլի հնարավոր փոխազդեցությունների ոչ լրիվ ներկայացումն է: Ուստի, տեղեկացրեք ձեր բժշկին, եթե ընդունում եք որևէ դեղամիջոց կամ սննդային հավելում:

Կետոկոնազոլի փոքր քանակները կարող են արտազատվել կրծքի կաթի մեջ, ուստի կրծքով կերակրող մայրերը հավանաբար պետք է խուսափեն այս դեղից:

Դեղաչափեր

• Բերանային (օրալ) Կետոկոնազոլը կարող է ընդունվել սննդի հետ կամ առանց դրա: Բերանային դեղաչափը կազմում է օրական 200-400 մգ:
• Կրկնվող թեփատու կամ գունափոփոխ որքինը բուժվում է ամսական 400 մգ-ով:
• Տեղային դեղաձևերը օգտագործվում են օրական մեկ կամ երկու անգամ ախտահարված շրջանն օծելով:

Դեղաձևեր և պահպանում

Դեղաձևեր

• Հաբեր՝ 200 մգ:
• Շամպուն՝ 1% և 2%:
• Նրբաքսուք (կրեմ)՝ 2%:
• Գել՝ 2%:
• Փրփուր՝ 2%:

Պահպանում

• Հաբերը պետք է պահպանել 15-25° C սենյակային ջերմաստիճանային պայմաններում և պաշտպանել խոնավությունից:
• 1% շամպունը պետք է պահպանել 2-30° C պայմաններում և պաշտպանել լույսից ու սառեցումից:
• 2% շամպունը պետք է պահպանել 25° C-ից ցածր պայմաններում և պաշտպանել լույսից:
• Կրեմը և փրփուրը պետք է պահպանել 20-25° C պայմաններում:
• Գելը պետք է պահպանել 15-30° C պայմաններում:

Ամփոփում

Կետոկոնազոլը հակասնկիկային դեղամիջոց է, որը նշանակվում է սնկիկային վարակների բուժման մեջ, օրինակ՝ կաթնախտ, խուզող մկնատամ, աճուկային էպիդերմոֆիտիա, մարզիկի ոտնաթաթ, թեփ, գունափոփոխ որքին, բլաստոմիկոզ, հիստոպլազմոզ և կոկցիդիոմիկոզ: