Մոքսիֆլոքսացին - Հակաբիոտիկներ

Ընդհանուր նկարագրություն

​Մոքսիֆլոքսացինը վերջին տարիներին ​լայնորեն նշանակվող հակաբիոտիկ է, որն արդյունավետ է բազմաթիվ բակտերիալ վարակների բուժման մեջ:​

Մոքսիֆլոքսացինը ֆտորխինոլոնային հակաբիոտիկ է: Այն համարվում է լայն սպեկտրի բակտերիցիդ և հակաբակտերիալ ազդեցության հակաբիոտիկ:

Մոքսիֆլոքսացինն իր ազդեցությունը դրսևորում է՝ ընկճելով տոպոիզոմերազա II (ԴՆԹ-գիրազա) և տոպոիզոմերազա IV ֆերմենտները, որոնք անհրաժեշտ են բակտերիալ ԴՆԹ-ի ռեպլիկացիայի, տրանսկրիպցիայի, ռեպարացիայի և ռեկոմբինացիայի համար: Այն խախտում է բակտերիայի ԴՆԹ-ի սինթեզը և թողնում բակտերիցիդ ազդեցություն:

Ամերիկյան FDA կազմակերպությունը Մոքսիֆլոքսացինը հաստատել է 1999թ. դեկտեմբերին, որից հետո տարբեր բրենդային անվանումների ներքո ստացել է լայն կիրառում ողջ աշխարհով:

Բրենդային անվանումներ

Avelox

Օրինակներ

Ֆտորխինոլոնային դասի այլ հակաբիոտիկներից են՝

• Ցիպրոֆլոքսացին
• Լևոֆլոքսացին
• Օֆլոքսացին
• Գատիֆլոքսացին
• Նորֆլոքսացին
• Տրովաֆլոքսացին:

Ցուցումներ

Մոքսիֆլոքսացինը նշանակվում է գրամ-դրական և գրամ-բացասակայն բակտերիաներով հարուցված բազմաթիվ բակտերիալ վարակներ բուժելու համար:

Մոֆլոքսացինն իր բակտերիցիդ և հակաբակտերիալ ազդեցությունը դրսևորվում է հետևյալ բակտերիաների վրա՝

• Streptococcus anginosus
• Streptococcus constellatus
• Streptococcus pneumonia
• Enterobacter cloacae
• Աղիքային ցուպիկ (E. coli)
• Haemophilus influenza
• Klebsiella pneumonia
• Moraxella catarrhalis
• Clostridium perfringens
• Chlamydophila pneumonia
• Mycoplasma pneumonia

Կողմնակի ազդեցություններ

Մոքսիֆլոքսացինի կողմնակի ազդեցություններից են՝

• սրտխառնոց
• գլխապտույտ
• փորլուծություն
• սրտի ԷՍԳ-ում QT ինտերվալի երկարացում
• արյան ճառագայթների նկատմամբ մաշկի զգայունություն (ֆոտոզգայունություն):

Հազվադեպ հանդիպող ալերգիկ ռեակցիաներից են եղնջացանը և անաֆիլաքսիան (շոկ): Վերջինս պահանջում է անհետաձգելի բուժօգնություն, ուստի անհրաժեշտ է անհապաղ կապ հաստատել ձեր բժշկի հետ կամ զանգել 1-03 և կանչել շտապ օգնություն, եթե ձեզ մոտ ի հայտ է եկել այս ախտանիշներից մեկնումեկը՝

• սրտանոթային կոլապս (զարկերակային ճնշման կտրուկ անկում)
• դեմքի կամ կոկորդի այտուց
• շնչարգելություն
• եղնջացան
• քոր:

Մոքսիֆլոքսացինի այլ անցանկալի ազդեցությունները ներառում են հետևյալը:

• Մոքսիֆլոքսացինը զգուշությամբ պետք է նշանակվի ցնցումային նոպաներով դրսևորվող կենտրոնական նյարդային համակարգի հիվանդությամբ մարդկանց՝ ելնելով այն հանգամանքից, որ դեղամիջոցն ինքը կարող է հազվադեպ առաջացնել ցնցումներ:
• Պետք է զերծ մնալ մինչև 18 տարեկան երեխաներին Մոքսիֆլոքսացին նշանակելուց, քանի որ տարիքային այս խմբում դեղամիջոցի անվտանգության վերաբերյալ տվյալները բավարար չեն:
• Մոքսիֆլոքսացինը, ինչպես նաև ֆտորխինոլոնային խմբի մյուս հակաբիոտիկները, կապված է ջլաբորբի (տենդոնիտ) և նույնիսկ ջլային (հատկապես՝ Աքիլեսյան ջլի) պատռվածքի առաջացման հետ: Այս ռիսկը բարձր է հատկապես 60-ն անց մարդկանց մոտ, ովքեր ստանում են կորտիկոստերոիդներ (օրինակ՝ Պրեդնիզոն):
• Մոքսիֆլոքսացինը բազմաթիվ հակաբիոտիկների նման կարող է փոփոխել հաստ աղու նորմալ միկրոֆլորան և նպաստել աղիքի բորբոքման զարգացման համար պատասխանատու որոշ բակտերիաների գերաճին (օրինակ՝ C. difficile կամ կեղծթաղանթային կոլիտ), ուստի, եթե Մոքսիֆլոքսացին օգտագործելուց հետո ձեզ մոտ ի հայտ են գալիս ջրիկ լուծ, ջերմություն և որովայնային ցավեր, պետք է անհապաղ կապ հաստատել ձեր բժշկի հետ:
• Մոքսիֆլոքսացինը որպես ֆտորխինոլոնային հակաբիոտիկ կարող է արգելակել նյարդամկանային հաղորդականությունը և վատթարացնել «միասթենիա գրավիս» հիվանդությամբ մարդկանց մոտ մկանային թուլությունը:
• Մոքսիֆլոքսացինի ընդունումը դիաբետի դեղերից սուլֆոնիլուրեաների հետ միասին (օրինակ՝ Գլիբուրիդ) կարող է հանգեցնել հանկարծակի ցածր արյան գլյուկոզի (հիպոգլիկեմիա):

Փոխազդեցություններ

• Մոքսիֆլոքսացինի ընդունումը պետք է առանձնացնել ալյումին կամ մագնեզիում պարունակող անտացիդների, սուկրալֆատի և մուլտիվիտամինների ընդունումից, քանի որ դրանք կարող են նվազեցնել հակաբիոտիկի ներծծումը և արդյունավետությունը: Եթե դուք միաժամանակ ստանում եք այս դեղերից մեկնումեկը և Մոքսիֆլոքսացին, ապա դրանք պետք է խմել Մոքսիֆլոքսացինից չորս ժամ առաջ կամ ութ ժամ հետո:
• Մոքսիֆլոքսացինը կարող է ուժեղացնել Վարֆարինի հակամակարդիչ ազդեցությունը: Ուստի, Վարֆարին խմող մարդկանց Մոքսիֆլոքսացին պետք է զգուշությամբ նշանակել, քանի որ մեծանում արյունահոսությունների և արյունազեղումների ռիսկը:
• Մոքսիֆլոքսացինը պետք է զգուշությամբ նշանակվի Սոտալոլի հետ միասին, քանի որ կարող է նպաստել սրտի առիթմիաների ռիսկի բարձրացմանը:

Որևէ ծանրակշիռ տվյալներ չկան այն մասին, թե արդյոք Մոքսիֆլոքսացինը բավարար անվտանգ ու արդյունավետ է հղի կանանց նշանակելիս: Ուստի, հղի կանանց դեղամիջոցը պետք է նշանակվի միայն հստակ ցուցում լինելիս:

Մոքսիֆլոքսացինը մուտք է գործում կրծքի կաթ: Մայրերը պետք է որոշեն, թե արդյոք արժի հրաժարվել կրծքով կերակրումից՝ Մոքսիֆլոքսացին ընդունելու համար, եթե համարժեք այլընտրանք չկա:

Մինչև 18 տարեկան երեխաներին Մոքսիֆլոքսացին չի նշանակվում, քանի որ տարիքային այս խմբի համար դեղի անվտանգության վերաբերյալ տվյալները բավարար չեն:

Դեղաչափեր

• Սուր բակտերիալ սինուսիտ՝ 1 հաբ (400 մգ) բերանային (օրալ) կամ 400 մգ ներարկման ձևով, օրական 1 անգամ, 5-10 օրվա ընթացքում:
• Քրոնիկ բակտերիալ բրոնխիտ՝ 1 հաբ (400 մգ) բերանային (օրալ) կամ 400 մգ ներարկման ձևով, օրական 1 անգամ, 5 օրվա ընթացքում:
• Համայնքային-վարակված թոքաբորբ՝ 1 հաբ (400 մգ) բերանային (օրալ) կամ 400 մգ ներարկման ձևով, օրական 1 անգամ, 7-14 օրվա ընթացքում:
• Մաշկի և մաշկային կառուցվածքների չբարդացած վարակներ՝ 1 հաբ (400 մգ) բերանային (օրալ) կամ 400 մգ ներարկման ձևով, օրական 1 անգամ, 7 օրվա ընթացքում:
• Մաշկի և մաշկային կառուցվածքների բարդացած վարակներ (օրինակ՝ ցելյուլիտ)՝ 1 հաբ (400 մգ) բերանային (օրալ) կամ 400 մգ ներարկման ձևով, օրական 1 անգամ, 7-21 օրվա ընթացքում:

Դեղաձևեր և պահպանում

Դեղաձևեր

• Հաբեր՝ 400 մգ:
• Ներարկման ձև՝ 400 մգ/250 մլ:

Պահպանում

Մոքսիֆլոքսացինի հաբերը պետք է պահպանել 20-25° C ջերմաստիճանային պայմաններում:

Ամփոփում

Մոքսիֆլոքսացինը լայն սպեկտրի ֆտորխինոլոնային հակաբիոտիկ է, որը ​լայնորեն նշանակում է բազմաթիվ բակտերիալ վարակների բուժման մեջ:​