Օֆլոքսացին - Հակաբիոտիկներ

Ընդհանուր նկարագրություն

Օֆլոքացինը հակաբիոտիկ է, որը նշանակվում է բակտերիալ վարակների բուժման համար:

Օֆլոքացինը դադարեցնում է բակտերիաների բազմացումը՝ արգելակելով նրանց գենետիկ նյութի (ԴՆԹ) վերարտադրությունն ու վերականգնումը։

Ամերիկյան FDA կազմակերպությունը Օֆլոքացինը հաստատել է 1990թ․ դեկտեմբերին:

Օրինակներ

Ֆտորխինոլոնային խմբի այլ հակաբիոտիկներից են՝

• Լևոֆլոքսացին
• Ցիպրոֆլոքսացին
• Գատիֆլոքսացին
  
• Նորֆլոքսացին
• Մոքսիֆլոքսացին
• Տրովաֆլոքսացին:

Ցուցումներ

Օֆլոքսացինը նշանակվում է բակտերիալ վարակների բուժման համար, որոնք առաջացնում են՝

• բրոնխիտ
• թոքաբորբ (պնևմոնիա)
• քլամիդիա
• գոնորեա
• մաշկային վարակներ
• միզուղիների վարակներ
• շագանակագեղձի վարակներ (բակտերիալ պրոստատիտ):

Կողմնակի ազդեցություններ

Օֆլոքսացինի ամենատարածված կողմնակի ազդեցություններից են՝

• սրտխառնոց
• փսխում
• փորլուծություն
• անքնություն
• գլխացավ
• գլխապտույտ
• քոր
• կանանց մոտ՝ հեշտոցաբորբ (վագինիտ):

Նկարագրվել են նաև ալերգիկ ռեակցիանե, ինչպիսիք են եղնջացանը և անաֆիլաքսիան (շոկ):

Այլ կարևոր կողմնակի ազդեցությունները ներառում են նյարդային համակարգի խթանման ախտանիշները, ինչպիսիք են՝

• անհանգստություն կամ տագնապ
• էյֆորիա
• ցնորքներ (հալյուցիանցիա):

Օֆլոքսացինը կարող է առաջացնել ցածր կամ բարձր արյան շաքար, հատկապես դիաբետով անձանց մոտ, ովքեր ստանում են Ինսուլին կամ բերանային (օրալ) հիպոգլիկեմիկ դեղամիջոցներ:

Օֆլոքսացին ստացող անձանց մոտ կարող է զարգանալ արևի նկատմամբ մաշկի զգայունություն (ֆոտոզգայունություն), ուստի նման դեպքերում պետք է խուսափել արևի տակ մնալուց կամ օգտագործել արևապաշտպան միջոցներ և նրբաքսուքներ:

Օֆլոքսացինը և ֆտորխինոլոնային խմբի մյուս հակաբիոտիկները կապված են ջլաբորբի (տենդոնիտ) և նույնիսկ ջլային (հատկապես՝ Աքիլեսյան ջլի) պատռվածքի առաջացման հետ: Որոշ բժիշկներ և առողջապահության ոլորտի մասնագետներ խորհուրդ են տալիս, որ ֆտորխինոլոնային խմբի որևէ հակաբիոտիկ ընդունող մարդիկ դադարեցնեն ծանր ֆիզիկական վարժանքները:

Օֆլոքսացինը պետք է զգուշությամբ օգտագործվի կենտրոնական նյարդային համակարգի հիվանդություններով անձանց կողմից, ինչպիսիք են ցնցումները:

Օֆլոքսացին չպետք է նշանակել երեխաներին և 18 տարեկանից ցածր տարիքի դեռահասներին, քանի որ տարիքային այս խմբում դեղամիջոցի անվտանգությունը հաստատված չէ:

Բազմաթիվ հակաբիոտիկներ, ներառյալ Օֆլոքսացինը, կարող են զգալիորեն փոփոխել հաստ աղու միկրոֆլորան և նպաստել աղու բորբոքման զարգացման համար պատասխանատու որոշ բակտերիաների գերբազմացմանը (օրինակ՝ C. difficile, կեղծթաղանթային կոլիտ): Կեղծթաղանքային կոլիտը կարող է առաջացնել ջերմություն, որովայնային ցավեր, փորլուծություն և երբեմն նույնիսկ շոկ:

Մյուս ֆտորխինոլոնների նման, Օֆլոքսացինը չպետք է նշանակվի «միասթենիա գրավիս» հիվանդությամբ մարդկանց, քանի որ կարող է խորացնել մկանային թուլությունը։

Փոխազդեցություններ

• Օֆլոքսացինը կրճատում է Թեոֆիլինի արտազատումը՝ բարձրացնելով արյան մեջ վերջինիս մակարդակը: Թեոֆիլինն օգտագործվում է ասթմայի ժամանակ շնչուղիները «բացելու» համար: Եթե Օֆլոքսացինի և Թեոֆիլինի համադրությունից հնարավոր չէ խուսափել, պետք է հաճախակի ստուգել արյան մեջ Թեոֆիլինի մակարդակը:
• Օֆլոքսացինը կարող է ուժեղացնել Վարֆարինի հակամակարդիչ ազդեցությունը և բարձրացնել արյունահոսության ռիսկը:
• Օֆլոքսացինը կարող է առաջացնել արյան շաքարի մակարդակի անկում կամ բարձրացում, հատկապես դիաբետով անձանց մոտ, ովքեր ստանում են Ինսուլին կամ բերանային (օրալ) հիպոգլիկեմիկ դեղամիջոցներ: Ուստի, նման դեպքերում անհրաժեշտ է արյան շաքարի մակարդակի ուշադիր վերահսկում:
• Սուկրալֆատը (Կարաֆատ), երկաթը, ցինկ պարունակող մուլտիվիտամինները, Դիդանոզինը (Վիդեք), ինչպես նաև կալցիում, մագնեզիում կամ ալյումին պարունակող անտացիդները պետք է օգտագործվեն Օֆլոքսացին ընդունելուց առնվազն երկու ժամ առաջ կամ հետո:

• Հղիության ընթացքում պետք է խուսափել Օֆլոքսացինից, քանի որ այն արտազատվում է կրծքի կաթում և կարող է անցանկալի ազդեցություններ առաջացնել նորածնի մոտ:
• Կերակրող մայրերը պետք է խուսափեն Օֆլոքսացինից, քանի որ վերջինիս անվտանգությունը հաստատված չէ:

Դեղաչափեր

• Երիկամների նորմալ գործունեությամբ հիվանդների համար սովորական դեղաչափը 200-ից 400 մգ է՝ յուրաքանչյուր 12 ժամը մեկ:
• Լյարդի կամ երիկամների խիստ ընկճված գործունեությամբ հիվանդների դեպքում դեղաչափերը պահանջում են ճշգրտում:

Դեղաձևեր և պահպանում

Դեղաձևեր

• Հաբեր՝ 200, 300 և 400 մգ:

Պահպանում

• Օֆլոքսացինը պետք է պահպանել փակ դեղատուփում 15-30° C պայմաններում:

Ամփոփում

Օֆլոքասինը հակաբիոտիկային դեղամիջոց է, որը նախատեսված է թոքաբորբի, բրոնխիտի, ստաֆիլոկոկային վարակների, ՍՃՓՀ-ների (գոնորեա, քլամիդիա), միզուղիների վարակների և շագանակագեղձի վարակների բուժման համար, որոնք հարուցվում են աղիքային ցուպիկով (E. coli): Օֆլոքսացինի ամենատարածված կողմնակի ազդեցությունները ներառում են սրտխառնոց, փսխում, փորլուծություն, անքնություն, գլխացավ, գլխապտույտ, քոր և վագինիտ կանանց մոտ: Մի՛ ընդունեք Օֆլոքսացին, եթե հղի եք կամ կրծքով կերակրող մայր եք: