Ընդհանուր նկարագրություն

Ստատիններն արյան խոլեստերինը նվազեցնող դեղամիջոցներ են, որոնք նշանակվում են սրտանոթային հիվանդություններով կամ դրանց նկատմամբ բարձր ռիսկով մարդկանց:

Արյան մեջ ցածր խտության լիպոպրոտեիդների (ՑԽԼ) կամ «վատ» խոլեստերինի բարձր մակարդակը կարող է բարձրացնել սրտանոթային հիվանդությունների՝ սրտամկանի ինֆարկտի և ինսուլտի, ինչպես նաև այս հիվանդություններով պայմանավորված մահացության ռիսկը: Ստատինները նշանակվում են ՑԽԼ խոլեստերինը նվազեցնելու համար, որն էլ օգնում է սրտանոթային հիվանդությունների ռիսկի կրճատմանը:

Ստատինները համարվում են արյան խոլեստերինը նվազեցնող ամենաարդյունավետ դեղերը: Դրանք ազդում են լյարդի վրա և արգելակում այս գեղձում «ներքին» կամ բնական խոլեստերինի արտադրությունը, մասնավորապես, արգելակում են հիդրոքսի-մեթիլգլուտարիլ-կոէնզիմ A ռեդուկտազա ֆերմենտը, որն անհրաժեշտ է «ներքին» խոլեստերինի արտադրության համար: Այսպիսով, ստատինները հանդես են գալիս որպես ՀՄԳ-ԿոՔ ռեդուկտազի արգելակիչներ:

Խոլեստերինը կենսական նշանակություն ունի օրգանիզմի յուրաքանչյուր բջջի նորմալ գործունեության համար: Սակայն, խոլեստերինը նաև նպաստում է աթերոսկլերոզի զարգացմանը՝ հիվանդություն, որի ժամանակ զարկերակների ներքին պատին ձևավորվում են խոլեստերին պարունակող վահանիկներ, որոնք խցանում են այս անթոները և նվազեցնում հյուսվածքների և օրգանների արյունամատակարարումը: Երբ այս վահանիկը վնասվում կամ պատռվում է, նույն տեղում առաջանում է արյան մակարդուկ (թրոմբ): Երբ նման պատճառներով զգալի կերպով նվազում է սրտի պսակաձև անոթներով սրտամկանի արյունամատակարարումը, զարգանում է կրծքահեղձուկ (ստենոկարդիա) կամ սրտամկանի ինֆարկտ: Գլխուղեղային զարկերակների աթերոսկլերոտիկ շեղումները կարող են հանգեցնել իշեմիկ («ոչ արյունահոսող») ինսուլտի: Եվ, եթե աթերոսկլերոտիկ վահանիկներ են զարգանում ստորին վերջույթների զարկերակներում, ի հայտ է գալիս «ընդմիջվող կաղություն» (երբ քայլելիս ոտքերում առաջանում են ցավեր): Կրճատելով խոլեստերինի արտադրությունը, ստատիններն ունակ են դանդաղեցնելու նոր վահանիկների առաջացումը, ինչպես նաև կայունացնելու այդ վահանիկները՝ նվազեցնելով դրանց պատռվելու և մակարդուկներ առաջացնելու գործընթացը:

Խոլեստերինի կարևոր դերն աթերոսկլերոզի զարգացման մեջ լայնորեն ընդունված է գիտնականների կողմից: Վերջին տարիների հետազոտությունները վկայում են, որ ավելի արդյունավետ է խոլեստերինի մակարդակի «ագրեսիվ», քան չափավոր նվազեցումը: Սակայն, խիստ կարևոր է նաև այն, որ ստատինները պետք է նշանակվեն խոլեստերինն իջեցնող այլ բնական մեթոդների հետ զուգակցված՝ առողջ սննդակարգ, մարմնի քաշի կառավարում և ֆիզիկական վարժանքներ:

Ստատիններ ընդունող բազմաթիվ մարդիկ որևէ անցանկալի ազդեցություն չեն նշում: Հազվադեպ, ստատինները կարող են առաջացնել թույլ և կարճատև որոշ կողմնակի ազդեցություններ՝ մկանացավեր, լյարդային ֆերմենտների մակարդակի քիչ բարձրացում և դիաբետի զարգացման ռիսկի թեթև բարձրացում: Լուրջ կողմնակի ազդեցությունները հանդիպում են խիստ հազվադեպ:

ԶԼՄ-ներում ժամանակ առ ժամանակ հրապարկվում են ստատինների օգտակարությունը կասկածի տակ դնող քննարկումներ: Նման հրապարակումներից ելնելով որոշ մարդիկ ինքնուրույն դադարեցնում են այս դեղամիջոցների ընդունումը, թեև ավելի խելամիտ է որևէ դեղի ընդունման հետ կապված ցանկացած որոշում նախ քննարկել բժշկի հետ: Բազմաթիվ հետազոտություններով ապացուցվել է, որ ըստ ցուցման նշանակված ստատինների օգուտները գերակշռում են հնարավոր ռիսկերը: Եթե դուք ընդունում եք ստատիններ և ունեք որևէ մտահոգություն, խոսեք ձեր բժշկի հետ:

Ներկայում մատչելի են ստատինների տարբեր տեսակներ:

Դեղեր և հավելումներ բաժնի հովանավոր

Այցելեք Յունիմեդ բժշկական կենտրոն ճշտգրիտ ախտորոշում ստանալու համար:

Օրինակներ

Ավելի հաճախ օգտագործվող ստատիններից են՝

Ատորվաստատին (Լիպիտոր®)
Ֆլուվաստատին (Լեսկոլ®)
Լովաստատին (Մեվակոր®)
Պրավաստատին (Պրավախոլ®)
Ռոսուվաստատին (Կրեստոր®)
Սիմվաստատին (Զոկոր®)
Պիտավաստատին (Լիվալո®):

Ստատինները միմյանցից տարբերվում են մի շարք առումներով: Ամենաակնառու տարբերությունը խոլեստերինը նվազեցնելու ունակության մեջ է: Ներկայումս Ատորվաստատինը և Ռոսուվաստատինը համարվում են արյան խոլեստերինի մակարդակը կրճատող ամենահզոր, իսկ Ֆլուվաստատինը՝ ամենաթույլ ստատինները:

Ստատինները նաև միմյանցից տարբերվում են այլ դեղերի հետ փոխազդեցություններով: Մասնավորապես, այլ դեղերի հետ զուգակցելիս Պրավաստատինը և Ռոսուվաստատինն ավելի փոքր հավանականությամբ կարող են արյան մեջ շատանալ, քան մյուս ստատինները, որի պատճառն այն է, որ այս երկու դեղերը լյարդում չեզոքացնող ֆերմենտները չեն արգելվում բազմաթիվ դեղերով, որոնք կարող են ընկճել այլ ստատինների չեզոքացումը: Այսպիսի ունակությունը թույլ է տալիս նշանակել Պրավաստատին և Ռոսուվաստատին միոպաթիաների ժամանակ՝ թունավոր (տոքսիկ) ազդեցություն դրսևորելու ավելի փոքր հավանականությամբ: Օրինակ, որոշ հետազոտություններով Վերապամիլ և Սիմվաստատին ստացող մարդկանց մոտ միոպաթիա զարգացել է 10 անգամ ավելի հաճախ, քան միայն Սիմվաստատին ստացողները, որովհետև Վերապամիլը բարձրացրել է արյան մեջ Սիմվաստատինի մակարդակը:

Ստատինները նաև միմյանցից տարբերվում են ծանր միոպաթիայի տեսակներից մեկի՝ ռաբդոմիոլիզի առաջացման հաճախականությամբ: Ցերիվաստատինը հանվել է արտադրությունից հենց այս պատճառով, քանի ով 10-100 անգամ ավելի հաճախ էր պատճառում ռաբդոմիոլիզ, քան մյուս ստատինները: Ռաբդոմիոլիզ ավելի հաճախ ի հայտ է գալիս այն մարդկանց մոտ, ովքեր ստատիններից բացի ստանում են այնպիսի դեղեր, որոնք իրենց հերթին կարող են առաջացնել ռաբդոմիոլիզ կամ բարձրացնել արյան մեջ ստատինների խտությունը:

Ցուցումներ

Ստատինները նշանակվում են աթերոսկլերոզի կանխարգելման և բուժման համար, որը կարող է առաջացնել ետկրծոսկրային ցավեր, սրտամկանի ինֆարկտներ, ինսուլտներ, ինչպես նաև «ընդմիջվող կաղություն»:

Աթերոսկլերոզի ռիսկի գործոններից են՝

արյան խոլեստերինի մակարդակների բարձրացում
ժառանգականություն (ընտանիքում սրտամկանի ինֆարկտի դեպքեր, հատկապես՝ երիտասարդ տարիքում)
աճող տարիք
շաքարային դիաբետ (շաքարախտ)
բարձր արյան ճնշում (հիպերտենզիա)
գիրություն (ճարպակալում):

Բազմաթիվ մարդկանց ստատինները նշանակվում են արյան խոլեստերինի բարձր մակարդակների պատճառով: Թեև խոլեստերինի բարձրացած մակարդակի կարգավորումը կարևոր է, այնուամենայնիվ, սրտի իշեմիկ հիվանդությունը զարգանում է բարդ մեխանիզմներով, որի մեջ դերակատարություն ունեն տարբեր գործոններ, օրինակ՝ բորբոքումը: Սրտամկանի ինֆարկտի դեպքերի 35%-ի մոտ արյան խոլեստերինի մակարդակի բարձրացում չկա, թեև նրանց մեծ մասի մոտ առկա է աթերոսկլերոզ: Սա նշանակում է, որ բարձր խոլեստերինը ոչ միշտ է պարտադիր պայման համարվում աթերոսկլերոզային վահանիկի ձևավորման համար (որն էլ նեղացնում կամ խցանում է զարկերակի լուսանցքը):

Քանի դեռ լիարժեք պարզ չէ, թե ինչ մեխանիզմներով են դրսևորովում ստատինների օգտակար ազդեցությունները, բուժման նպատակը պետք չէ սահմանափակել միայն խոլեստերինի մակարդակի նվազեցմամբ, այլ ընդլայնել՝ ներառելով նաև աթերոկլերոզի բարդությունների կանխարգելումը (կրծքահեղձուկ, սրտամկանի ինֆարկտ, ինսուլտ, ծայրամասային զարկերակային հիվանդություն, սրտանոթային հանկարծամահություն և այլն): Այսպիսի մոտեցումը կարևոր է, քանի որ թույլ է տալիս աթերոսկլերոզի նկատմամբ ռիսկային անձանց հետ, ում արյան խոլեստերինի մակարդակը բարձր չէ, այնուամենայնիվ քննարկել ստատիններով բուժման նպատակահարմարությունը: ԱՓՖ արգելակիչների նման ստատինները հանդիսանում են դեղաբանական կարևոր դաս, քանի որ ունակ են կրճատել սրտամկանի ինֆարկտի, ինսուլտի և հանկարծամահության հաճախականությունը:

Մի՛ փորձեք

Ինքնուրույն օգտագործել որևէ դեղամիջոց կամ ինքնուրույն փոխել ձեզ նշանակված դեղամիջոցները կամ դրանց դեղաչափերը:

Կողմնակի ազդեցություններ

Ստատինների ամենատարածված կողմնակի ազդեցություններից են՝

գլխացավ
սրտխառնոց
փսխում
փորկապություն
փորլուծություն
մաշկային ցան
ընդհանուր թուլություն
մկանացավեր:

Ստատինների ամենալուրջ կամ ծանր կողմնակի ազդեցություններից են լյարդային անբավարարությունը և ռաբդոմիոլիզը (մկանային հյուսվածքի ախտահարում կամ մեռուկացում): Ավելի հաճախ, ստատիններն առաջացնում են լյարդի գործունեության լաբորատոր ցուցանիշների (լյարդի պրոբաների) շեղումներ, որոնք սովորաբար վերադառնում են նորմալ միջակայքեր, երբ ստատիններով բուժումը դադարեցվում է: Ստատինների նշանակումը սովորաբար ընդհատվում է, եթե այս ցուցանիշների շեղումն անցնում է նորմայից երեք անգամ: Լյարդի լաբորատոր ցուցանիշները պետք է որոշել ստատիններով բուժումը սկսելուց առաջ կամ, եթե կասկած կա, որ լյարդը կարող է բուժման ընթացքում ախտահարվել:

Ռաբդոմիոլիզը հազվադեպ հանդիպող ծանր կողմնակի ազդեցություն է, որն ընթանում է մկանային հյուսվածքի ծանր ախտահարմամբ: Այն հաճախ սկսվում է որպես մկանային ցավեր և կարող է հարաճուն զարգանալ մինչև մկանաբջիջների կորուստ, երիկամային անբավարարություն և մահ: Այս բարդությունն ավելի հաճախ ի հայտ է գալիս, երբ ստատինները զուգակցվում են որպես կողմնակի ազդեցություն ռաբդոմիոլիզ առաջացնող կամ ստատինների չեզոքացումը կանխարգելող դեղերի հետ: Ռաբդոմիոլիզը կարող է ունենալ մահացու ելք, ուստի, եթե ստատինների ընդունման ժամանակ ի հայտ են գալիս անհասկանալի հոդացավեր կամ մկանացավեր, այս երևույթի վերահսկումը պետք է լինի բժշկի ուշադրության կենտրոնում:

Ստատինները պետք է չնշանակվեն հղիության ընթացքում, քանի որ առկա է պտղի զարգացման վրա կողմնակի ազդեցությունների որոշակի ռիսկ:

Ստատինները նաև ասոցիացվում են դիաբետով անձանց մոտ գլիկոզիլացված հեմոգլոբինի (HbA1c) և արյան գլյուկոզի մակարդակների բարձրացման հետ:

Կան նաև զեկույցներ ստատինների կողմից հիշողության կորուստ, մոռացկոտություն, ամնեզիա, հիշողության այլ խանգարումներ առաջացնելու դեպքերի մասին: Նման խանգարումները սովորաբար սկսում են վերանալ ստատինների օգտագործումը դադարեցնելուց հետո մոտ 3 շաբաթվա ընթացքում:

Փոխազդեցություններ

Ստատինները կարող են այլ դեղերի հետ զուգակցվելիս դրսևորել որոշ կարևոր փոխազդեցություններ:

Նման փոխազդեցության առաջին տեսակը վերաբերվում է այն ֆերմենտներին, որոնք պատասխանատու են լյարդում ստատինների չեզոքացման համար: Լյարդային ֆերմենտները (մասնավորապես՝ ցիտոքրոմ P-450), Պրավաստատինից և Ռոսուվաստատինից բացի իրականացնում են լյարդում ստատինների քայքայում: Ուստի, այն դեղերը, որոնք արգելակում են այս ֆերմենտները, բարձրացնում են արյան մեջ Սիմվաստատինի, Լովաստատինի, Ֆլուվաստատինի և Ատորվաստատինի մակարդակները և կարող են բերել ռաբդոմիոլիզի զարգացման: Այդպիսի դեղերից կամ սննդամթերքներից են՝

պրոտեազի արգելակիչներ, օրինակ՝ Ինդինավիր և Ռիտոնավիր, որոնք նշանակվում են ՄԻԱՎ վարակի բուժման մեջ
Էրիթրոմիցին
Իտրակոնազոլ
Կլարիթրոմիցին
Տելիթրոմիցին
Ցիկլոսպորին
Բոցեպրեվիր
Տալապրեվիր
Վորիկոնազոլ
Դիլթիազեմ
Վերապամիլ
Օմբիստավիր/Պարիտապրեվիր/Ռիտոնավիր և Դասաբուվիր
գրեյպֆրութի հյութ (օրական ավելի քան 1 լիտր):

Լովաստատինը և Սիմվաստատինը չի կարելի զուգակցել այս դեղերի հետ՝

Էրիթրոմիցին
Կետոկոնազոլ
Իտրակոնազոլ
Կլարիթրոմիցին
Տելիթրոմիցին
Ցիկլոսպորին
Բոցեպրեվիր
Տալապրեվիր
Վորիկոնազոլ
Դանազոլ
պրոտեինի արգելակիչներ
Ամիոդարոն
Ամլոդիպին
Ռանոլազին:

Մյուս կարևոր փոխազդեցությունը կարող է դրսևորվել ստատինների և նիացինի ու ֆիբրաթթվի միջև, օրինակ՝ Գեմֆիբրոզիլ, Կլոֆիբրատ և Ֆենոֆիբրատ: Նիացինը և ֆոբաթթուն (լիպիդ-նվազեցնող նյութեր) կարող են իրենք առաջացնել ռաբդոմիոլիզ կամ լյարդային անբավարարություն, ու եթե զուգակցվում են ստատինների հետ, այս լուրջ կողմնակի ազդեցությունների ռիսկն էլ ավելի է աճում: Գեմֆիբրոզիլը չի կարելի զուգակցել ստատինների հետ: Այլ ֆիբրաթթուներ և նիացին կարող են զուգակցվել ստատինների հետ, սակայն՝ խիստ զգուշությամբ:

Խոլեստիրամինը, ինչպես նաև Կոլեստիպոլը կապում են ստատիններն աղիներում և կրճատում դրանց ներծծումը դեպի արյան հուն: Ստատինների արդյունավետությունը նվազեցնող այս փոխազդեցությունից խուսափելու համար ստատինները պետք է ընդունվեն Խոլեստիրամինից կամ Կոլեստիպոլից մեկ ժամ առաջ կամ 4 ժամ հետո:

Ստատինները բարձրացնում են Վարֆարինի ազդեցությունը: Ուստի, միաժամանակ ստատիններ և Վարֆարին ստացող մարդիկ պետք է ավելի ուշադիր լինեն և վերահսկեն արյան մակարդելիության ցուցանիշները, առաջին հերթին՝ ՄՆԳ-ն (INR):

Ստատինները չի կարելի զուգակցել կարմիր խմորասնկային (ֆերմենտացված) բրնձի հետ, քանի որ վերջինս պարունակում է ստատիններին նմանվող ազդեցություն դրսևորող քիմիական միացություններ և նման զուգակցմամբ կարող է բարձրանալ ստատինների լուրջ կողմնակի ազդեցությունները, օրինակ՝ մկանային դիստրոֆիան (միոպաթիա):

Վարվեք այս կերպ

Տեղեկացրեք ձեր բժշկին, եթե զգում եք նրա նշանակած դեղամիջոցի հետ կապված որևէ անցանկալի կամ կողմնակի ազդեցություն:
Տեղեկացրեք ձեր բժշկին, եթե ցանկանում եք ընդունել որևէ այլ դեղամիջոց կամ հավելում:

Ամփոփում

Ստատինները դեղերի դաս է, որոնք նշանակվում են արյան խոլեստերինի մակարդակը նվազեցնելու համար: Դրանք նշանակվում են նաև աթերոսկելրոզի կանխարգելման և բուժման համար: Տարածված կողմնակի ազդեցություններից են՝ գլխացավ, սրտխառնոց, փսխում, փորկապություն կամ փորլուծություն: Կարող են տեղ գտնել նաև լուրջ կամ ծանր կողմնակի ազդեցություններ:

Մինչև որևէ դեղ ընդունելը հարկավոր է մանրամասն տեղեկանալ և ձեր բժշկի հետ քննարկել ցուցումների և հակացուցումների, կողմնակի ազդեցությունների, այլ դեղերի հետ փոխազդեցության, նախազգուշացումների, հղիության և կրծքով կերակրելու ընթացքում օգտագործման հարցերի մասին: