Թեյի ծառի յուղ - Սննդային հավելումներ

Ընդհանուր նկարագրություն

Թեյի ծառի յուղը, որը նաև հայտնի է որպես մելալեուկայի յուղ, եթերային յուղ է, որը ստացվում է ավստրալիական թեյի ծառի տերևները գոլորշիով մշակելուց:

Տեղային օգտագործման դեպքում թեյի ծառի յուղը համարվում է հակաբակտերիալ ազդեցություն ունեցող: Այն սովորաբար օգտագործվում է ակնեի (պզուկներ), մարզիկի ոտնաթաթի (ոտնաթաթի էպիդերմոֆիթիա), ոջիլների, եղունգների սնկերի և միջատների խայթոցների բուժման համար:

Թեյի ծառի յուղը մատչելի է որպես յուղ կամ առկա է բազմաթիվ մաշկային ապրանքատեսակների, այդ թվում՝ օճառների և լոսյոնների մեջ: Այնուամենայնիվ, թեյի ծառի յուղը չի կարելի ընդունել բերանային (օրալ): Կուլ տալու դեպքում այն կարող է առաջացնել լուրջ ախտանիշներ։

Ցուցումներ

Որոշակի առողջական վիճակների համար թեյի ծառի յուղի օգտագործման վերաբերյալ հետազոտությունները վկայում են հետևյալի մասին:

• Ակնե (պզուկներ). հետազոտությունները ցույց են տալիս, որ թեյի ծառի յուղ պարունակող բուժիչ գելը կարող է արդյունավետ լինել պզուկները վերացնելու համար:
• Թեփ. չորս շաբաթ օգտագործվող թեյի ծառի յուղ պարունակող շամպունն արդյունավետ է գլխամաշկի թեփի բուժման համար:
• Մարզիկի ոտնաթաթ. հաստատված է, որ թեյի ծառի յուղ պարունակող նրբաքսուքը (կրեմ), որը կիրառվում է օրական երկու անգամ մեկ ամսվա ընթացքում, կարող է արդյունավետ կերպով թեթևացնել ոտնաթաթի էպիդերմոֆիթիայի ախտանիշները:
• Ոջլոտություն. լավանդայի յուղի հետ միասին օգտագործելիս թեյի ծառի յուղն արդյունավետ է ոջիլների անիծների բուժման համար:
• Եղունգների սնկախտ. հետազոտությունները չեն հաստատել, որ թեյի ծառի յուղը, որն օգտագործվում է իր մաքուր տեսքով կամ այլ հակասնկիկային բուժումների հետ համատեղ, արդյունավետ է ոտքերի եղունգների սնկախտի բուժման համար:

Արդյունքները կարող են տարբեր լինել, քանի որ չկան թեյի ծառի յուղ ստանալու կամ յուղ պարունակող արտադրանք ստեղծելու համար ստանդարտ մեթոդներ:

Կողմնակի ազդեցություններ

Մարդկանց մեծամասնությունը կարող է թեյի ծառի յուղ օգտագործել տեղային՝ առանց խնդիրների: Այնուամենայնիվ, թեյի ծառի յուղը կարող է առաջացնել՝

• մաշկի գրգռվածություն
• մաշկի ալերգիկ ցանավորում (դերմատիտ)
• քոր
• ծակծկոցներ
• այրոց
• եղջերացում
• կարմրություն
• չորություն։

Մի՛ օգտագործեք թեյի ծառի յուղ, եթե ունեք էկզեմա:

Կուլ տալիս թեյի ծառի յուղը թունավոր է և կարող է առաջացնել ծանր կողմնակի ազդեցություններ, օրինակ՝

• շփոթվածություն
• մկանային վերահսկողության կամ կամավոր շարժումների կորդինացիայի թուլացում (ատաքսիա)
• գիտակցության մակարդակի նվազեցում:

Մի հետազոտություն ցույց է տվել, որ լավանդայի յուղի և թեյի ծառի յուղի կրկնվող ազդեցությունը կարող է հանգեցնել տղաների մոտ կրծքագեղձի հյուսվածքի այտուցման (գինեկոմաստիա):

Փոխազդեցություններ

Թեյի ծառի յուղը հաճախ օգտագործվում է այլ դեղամիջոցների հետ միասին՝ մաշկի բակտերիալ կամ սնկիկային հիվանդությունները բուժելիս և ներկայումս դեղերի փոխազդեցության վերաբերյալ տվյալներ չկան:

Ամփոփում

Տեղային օգտագործման դեպքում թեյի ծառի յուղն ընդհանուր առմամբ անվտանգ է և կարող է օգտակար լինել ակնեի (պզուկներ) և մաշկի այլ մակերեսային վարակների բուժման համար:

Խուսափեք թեյի ծառի յուղի բերանային (օրալ) օգտագործումից, քանի որ կուլ տալիս այն դրսևորում է թունավոր ազդեցություն: