Ընդհանուր նկարագրություն

Վերապամիլը կալցիումական անցուղիների պաշարիչների դասի տիպիկ ներկայացուցիչ է, որն արգելակում է կալցիումի մուտքը սրտամկանը սնուցող պսակային և օրգանիզմի այլ զարկերակների մկանաբջիջներ:

Կալցիումը մասնակցում է մկանների կծկմանը, ուստի, արգելափակելով կալցիումի մուտքը մկանաբջիջներ, Վերապամիլը և այս խմբի մյուս դեղամիջոցները թուլացնում են զարկերակները շրջապատող մկանաթելերը, որի շնորհիվ այդ անոթները լայնանում են՝ իրենց մեջ տեղավորելով ավելի շատ արյուն: Արդյունքում, Վերապամիլը դառնում է սրտամկանը սնուցող պսակային զարկերակների կծկանքով (սպազմ) պայմանավորված ետկրծոսկային ցավերի՝ կրծքահեղձուկի (ստենոկարդիա) կանխարգելման և բուժման արդյունավետ դեղամիջոց:

Օրգանիզմի այլ շրջաններում զարկերակների մկանների թուլացումը բերում է արյան ճնշման նվազեցման, որն իր հերթին սրտի կողմից արյան մղումը դեպի այդ անոթներ դարձնում է ավելի դյուրին և նվազում է թթվածնի նկատմամբ սրտամկանի պահանջը նաև այս մեխանիզմով:

Վերապամիլն ամերիկյան FDA կազմակերպության կողմից գրանցվել է 1982 թվականի մարտին:

Դեղեր և հավելումներ բաժնի հովանավոր

Այցելեք Յունիմեդ բժշկական կենտրոն ճշտգրիտ ախտորոշում ստանալու համար:

Բրենդային անվանումներ

Calan, Verelan, Verelan PM, Isoptin, Isoptin SR

Օրինակներ

Կալցիումական ուղիների պաշարիչների այլ ներկայացուցիչներից են՝

Ամլոդիպին
Դիլթիազեմ
Նիֆեդիպին:

Ցուցումներ

Վերապամիլը նշանակվում է իշեմիկ բնույթի սրտային ցավերի (կրծքահեղձուկ կամ ստենոկարդիա), բարձր արյան ճնշման (հիպերտենզիա) և հաճախասրտությամբ ուղեկցվող սրտի ռիթմի խանգարումների (օրինակ՝ շողացող առիթմիա) կանխարգելման և բուժման մեջ: Թեև ոչ պաշտոնական հաստատմամբ, Վերապամիլը նաև օգտագործվում է միգրենային գլխացավերի կանխարգելման համար:

Մի՛ փորձեք

Ինքնուրույն օգտագործել որևէ դեղամիջոց կամ ինքնուրույն փոխել ձեզ նշանակված դեղամիջոցները կամ դրանց դեղաչափերը:

Կողմնակի ազդեցություններ

Վերապամիլի տարածված կողմնակի ազդեցություններից են՝

գլխապտույտ
թուլություն և հոգնածություն
սրտի ռիթմի կտրուկ դանդաղեցմանը կամ ցածր ճնշմանն ուղեկցող ուշաթափություն:

Այլ կողմնակի ազդեցություններից են՝

ստորին վերջույթների այտուցվածություն
մաշկացան
գլխացավ
սրտխառնոց
փորկապություն:

Վերապամիլը նաև կարող է առաջացնել լյարդային թեստերի շեղումներ, որը դեղի օգտագործումը դադարեցնելիս սովորաբար ինքնուրույն անհետանում է:

Վերապամիլը նաև կարող է դանդաղեցնել սրտի ռիթմը, խիստ հազվադեպ՝ նաև կտրուկ նվազեցնել արյան ճնշումը (զարկերակային հիպոտենզիա):

Վերապամիլը նաև կարող է օժանդակել սրտային անբավարարության դրսևորմանը, հատկապես սրտամկանի թույլ գործունեությամբ հիվանդների մոտ:

Փոխազդեցություններ

Վերապամիլի և որևէ բետա պաշարիչի (սրտի ռիթմը կրճատող մեկ այլ դեղերի խումբ) միաժամանակյա օգտագործումը կարող է առաջացնել սրտի ռիթմի ծանր և վտանգավոր դանդաղեցում:
Վերապամիլը կարող է բարձրացնել արյան մեջ որոշ դեղերի մակարդակները, այդ թվում՝ Դիգօքսին, Թեոֆիլին, Ցիկլոսպորին և Կարբամազեպին: Ուստի, այս դեղամիջոցների տոքսիկ (թունավոր) ազդեցությունից խուսափելու համար անհրաժեշտ է պարբերաբար վերահսկել դրանց մակարդակները:
Որոշ պացիենտների մոտ Վերապամիլը կարող է նվազեցնել արյան Լիթիումի մակարդակը: Անհայտ պատճառներով միաժամանակ Լիթիում և Վերապամիլ ստացող որոշ պացիենտների մոտ կարող է գրանցվել Լիթիումի կողմնակի ազդեցությունների ուժգնացում՝ առանց արյան մեջ վերջինիս մակարդակի բարձրացման:
Վերապամիլի հետ միաժամանակ ստատինների օգտագործումը (օրինակ՝ Սիմվաստատին կամ Լովաստատին) կարող է բարձրացնել միոպաթիայի (ռաբդոմիոլիզ) հավանականությունը, քանի որ Վերապամիլը նվազեցնում է լյարդում ստատինների տրոհումը: Վերապամիլ ստացող պացիենտներին Սիմվաստատին պետք է նշանակվի ոչ ավելի քան 10 մգ/օր, իսկ Լովաստատին՝ ոչ ավելի քան 40 մգ/օր դեղաչափով: Կարող է նաև առաջանալ ստատինների (օրինակ՝ Ատորվաստատին) մեկնարկային և պահպանողական դեղաչափերի նվազեցման կարիք, քանի որ Վերապամիլը նաև կարող է բարձրացնել արյան պլազմայում այս դեղերի մակարդակը:
Ռիֆամպինը և Ֆենոբարբիտալը բարձրացնում են Վերապամիլի օրգանիզմից դուրս բերման արագությունը՝ թուլացնելով վերջինիս ազդեցությունը:

Վարվեք այս կերպ

Տեղեկացրեք ձեր բժշկին, եթե զգում եք նրա նշանակած դեղամիջոցի հետ կապված որևէ անցանկալի կամ կողմնակի ազդեցություն:
Տեղեկացրեք ձեր բժշկին, եթե ցանկանում եք ընդունել որևէ այլ դեղամիջոց կամ հավելում:

Հղիություն և կրծքով կերակրում

Հղիության ընթացքում Վերապամիլի ընդունման անվտանգության վերաբերյալ տվյալներ չկան: Դեղն անցնում է ընկերքով և թափանցում սաղմի օրգանիզմ:
Կրծքով կերակրող մայրերի կողմից Վերապամիլի ընդունման անվտանգության վերաբերյալ տվյալներ չկան: Վերապամիլն արտազատվում է կրծքի կաթի մեջ:

Դեղաչափեր

Վերապամիլը կարող է ընդունվել սննդի հետ միասին:

Կրծքահեղձուկ (անհապաղ ազդեցության դեղաձևեր)՝ 80-160 մգ օրական 3 անգամ:
Կրծքահեղձուկ (երկարատև ազդեցության դեղաձևեր)՝ 180-540 մգ՝ գիշերային քնից առաջ:
Հիպերտենզիա (անհապաղ ազդեցության դեղաձևեր)՝ 80-320 մգ օրական 2 անգամ:
Հիպերտենզիա (երկարատև ազդեցության դեղաձևեր)՝ 120-480 մգ՝ օրական 1 կամ 2 անգամ:
Միգրեն՝ 160-320 մգ օրական 3-4 անգամ:

Դեղաձևեր և պահպանում

Դեղաձևեր

Անհապաղ ազդեցությության հաբեր՝ 40, 80 և 120 մգ:
Պահպանողական ազդեցության պատիճներ՝ 120, 180, 240 և 360 մգ:
Երկարատև ազդեցության հաբեր՝ 100, 120, 180, 200, 240 և 300 մգ:
Ներարկման սրվակներ՝ 2,5 մգ/մլ:

Պահպանում

Վերապամիլը պետք է պահպանել սենյակային ջերմաստիճանային պայմաններում (15-30° C), կիպ փակած անլուսաթափանց տուփում:

Ամփոփում

Վերապամիլը դեղամիջոց է, որը նշանակվում է կրծքահեղձուկային սրտային ցավերի, բարձր արյան ճնշման (հիպերտենզիա) և սրտի ռիթմի հաճախացումների, օրինակ՝ շողացող առիթմիայի կանխարգելման և բուժման համար: Թեև FDA-ի կողմից հաստատված չլինելուն, Վերապամիլը նաև օգտագործվում է միգրենային գլխացավերի կանխարգելման համար:

Մինչև որևէ դեղ ընդունելը հարկավոր է մանրամասն տեղեկանալ և ձեր բժշկի հետ քննարկել ցուցումների և հակացուցումների, կողմնակի ազդեցությունների, այլ դեղերի հետ փոխազդեցության, նախազգուշացումների, հղիության և կրծքով կերակրելու ընթացքում օգտագործման հարցերի մասին: