Կովի կաթի նկատմամբ ալերգիկ ռեակցիա

Կովի կաթի նկատմամբ ալերգիկ ռեակցիա
Անգլերեն անվանումը՝ Allergic reactions to Cow's Milk

Կովի կաթի նկատմամբ ալերգիան երեխաների մոտ ամենահաճախ հանդիպող սննդային ալերգիկ ռեակցիաների մեկն է:

Ըստ տարբեր հաշվարկների, կովի կաթի նկատմամբ ալերգիկ ռեակցիա կարող է առաջանալ սննդում կովի կաթ օգտագործող նախադպրոցական տարիքի երեխաների 1-2%-ի մոտ: Դպրոցական տարիքի երեխաների մոտ կովի կաթից ալերգիկ ռեակցիայի հաճախականությունը կտրուկ իջնում է մինչև 0.1%, իսկ չափահասների մոտ իսկական ալերգիկ ռեակցիա հանդիպում է խիստ հազվադեպ:

Կաթի նկատմամբ ալերգիայի առաջացումը բացատրվում է կաթում առկա սպիտակուցների նկատմամբ երեխայի իմունային պատասխանով: Ընդ որում, կաթի սպիտակուցների նույնիսկ չնչին քանակությունը կարող է բերել բուռն ալերգիկ պատասխանի:

Կաթի նկատմամբ ալերգիան դրսևորվում է մաշկային ցանով (եղնջացան), այտուցվածությամբ, որովայնային ցավերով կամ փսխումներով, փորլուծությամբ կամ շնչարգելությամբ:

Անաֆիլաքսիան ամենածանր ալերգիկ ռեակցիան է, որը պահանջում է անհետաձգելի բուժօգնություն: Անաֆիլաքսիան կարող է սկսվել դժվարացած և խռպոտած շնչառությամբ և լեզվի այտուցով:

Եթե դուք կարծում եք, որ ինչ-որ մեկի մոտ սկսվում կամ ընթանում է ալերգիկ ռեակցիա, առանց հետաձգելու զանգեք 1-03 և կանչեք շտապբուժօգնություն:

Կովի կաթից ալերգիայի մասին կարելի է կասկածել, եթե վերոնշյալ գանգատները սկսվում են կաթը խմելուց րոպեներ անց: Հակառակ դեպքում, եթե գանգատների ի հայտ գալը երկարաձգվում է, ապա ախտորոշումն իր հերթին դառնում է ավելի դժվար:

Այն մարդիկ, ում մոտ կա լակտոզա ֆերմենտի անբավարարություն, նույնպես կարող են կովի կաթ ընդունելուց հետո ունենալ առողջական խնդիրներ, բայց սա ալերգիկ ռեակցիա չէ և պահանջում է հատուկ բուժում:

Հոդվածը վերանայվել է՝ 07-05-2019