Զայրույթի վերահսկման մեթոդներ -

Մենք բոլորս էլ ժամանակ առ ժամանակ զայրանում ենք, և դա, ցավոք, մեր կյանքի անբաժան մասն է:

Սակայն երբեմն զայրույթը կարող է հանգեցնել ագրեսիվության և ինքնատիրապետման կորստի՝ անկանխատեսելի հետևանքներով: Ուստի, զայրույթի հաղթահարման մեթոդները ոչ միայն օգտակար են, այլև՝ որոշ իրավիճակներում խիստ ցանկալի:

Կան որոշ մեթոդներ, որոնք կարող եք փորձել, որ ձեր զայրույթը չվերաճի ագրեսիվության կամ չբերի այնպիսի իրավիճակների, երբ դուք դարձել եք անկառավարելի և կատարել եք որևէ բռնարարք կամ մեկ այլ անթույլատրելի քայլ:

Եթե հմտանաք զայրույթի կառավարման մեթոդների կիրառման մեջ, օրինակ՝ ձեր ընկերոջ կամ զուգընկերոջ հետ վարժանքներ անելով, կկարողանաք դրանք օգտագործել այն դեպքերում, երբ զգում եք, որ կանգնած եք ինքնատիրապետումը կորցնելու եզրին:

• Ցուցակագրեք այն ամենը, ինչը կարող է զայրացնել ձեզ. եթե հիշեք և իրար տակ գրեք այն գործոնները կամ իրավիճակները, որոնք կարող են ձեզ նյարդայնացնել և զայրացնել, կկարողանաք նաև նախապես մշակել դրանցից խուսափելու կամ շրջանցելու հնարքներ:
• Դադար վերցրեք. սա նշանակում է, որ դուք կարող եք որևէ պատճառաբանությամբ խուսափել ձեզ մոտ զայրույթ առաջացնող իրավիճակից և ինքներդ ձեզ հանդարտվելու ժամանակ տաք: Օրինակ, ասեք՝ «ես կարևոր զանգ ունեմ, կվերադառնամ 5-10 րոպեից»։
• Վերահսկեք ձեր շնչառությունը. փորձեք դանդաղեցնել ձեր շնչառությունը և հինգ անգամ երկար ու խորը շնչել, որը թույլ կտա թուլացնել ձեր դեմքի և ձեռքերի մկանները:
• «Զրուցեք» ինքներդ ձեզ հետ և հանգստացրեք ինքներդ ձեզ. համոզեք ինքներդ ձեզ, որ դուք կարող եք հաղթահարել տվյալ իրավիճակը և պահպանել ինքնատիրապետումը։ Դա կօգնի, որ ձեր հոգեվիճակը խաղաղվի։ Նման դեպքերում փորձեք հորդորել ձեզ այսպիսի բառերով. «ես կարող եմ այս պահը թեթև տանել» կամ խորը շնչելով ինքներդ ձեզ հրահանգել՝ «թուլացի՛ր»։ Ուշադրություն դարձրեք, որ ձեզ ուղղված խոսքում չներառեք այնպիսի բացասական մտքեր կամ բառեր, որոնք կարող են նպաստել ձեր զայրույթի սաստկացմանը, օրինակ՝ «նա միշտ այդպես է ինձ հետ վարվում»։
• Օգտագործեք ձեր երևակայությունը. պատկերացրեք այնպիսի մի իրավիճակ, որը ձեզ հանգստացնում կամ թուլացնում է։ Օրինակ, պատկերացրեք, թե ինչպես եք պառկած ծովափնյա ավազի վրա կամ ինչպես եք ձեր երեխայի համար բարի հեքիաթ ընթերցում։ Առաջին հայացքից պարզունակ այս հնարքը կարող է բավականին օգտակար դառնալ և կտրել ձեզ զայրույթ հրահրող միջավայրից։
• Յոգա, մեդիտացիա և այլ հնարքներ. կան հատուկ մեթոդներ, ինչպիսիք են յոգա, մեդիտացիա կամ գիտակցվածություն, որոնք կարող են օգնել ձեր մկանների թուլացմանը և մտքերի հանդարտացմանը։ Զրուցեք այս թեմաներով ոլորտի մասնագետների, օրինակ, հոգեբանի կամ հոգեթերապևտի հետ։