Գրադարան

Արթրոսկոպիա

Արթրոսկոպիա

Time Read 3 րոպե

Արթրոսկոպիան փոքր վիրահատական միջամտություն է, որի նպատակը հոդային խնդիրների ախտորոշումն է և բուժումը։

Ինչո՞ւ է նշանակվում արթրոսկոպիա

Բժիշկը նշանակում է արթրոսկոպիա այն դեպքերում, երբ ցանկանում է զննել ձեր ներհոդային տարածությունը և հասկանալ, թե ինչ է կատարվում ձեր հոդերի ներսում։ Միջամտության համար օգտագործվում է հատուկ գործիք` արթրոսկոպ: Այն բարակ խողովակ է, որի մի ծայրին միացված է օպտիկական տեսաձայնագրող սարք։ Արթրոսկոպը թույլ է տալիս ռեալ ժամանակի մեջ զննել և տեսաձայնագրել ներհոդային տարածությունը:

Արթրոսկոպիան կարող է նշանակվել որպես հոդային խանգարումների ախտորոշման լրացուցիչ միջոց։ Նման դեպքերում հետազոտվող հոդի շրջակայքում կատարվում է վիրահատական փոքր կտրվածք՝ բացվում է անցք դեպի հոդ, որի միջով էլ արթրոսկոպը զգուշությամբ ներմուծվում է ներհոդային տարածություն:

Ավելի հաճախ արթրոսկոպիան նշանակվում է հետևյալ հոդերի հետազոտության համար՝

  • ծնկան հոդ
  • արմնկային հոդ
  • կոնքազդրային հոդ
  • սրունք-թաթային հոդ
  • ուսահոդ
  • դաստակի հոդեր։

Վերջին տարիներին արթրոսկոպիան հաջողությամբ օգտագործվում է նաև բուժական նպատակով՝ որպես ներհոդային վիրահատության ժամանակակից մեթոդ:

Ինչպե՞ս նախապատրաստվել արթրոսկոպիային

Զրուցեք բժշկի հետ ձեր հիվանդության ախտորոշման և բուժման մեջ արթրոսկոպիայի օգուտների և վտանգների մասին։ Մինչև բուժման նպատակով արթրոսկոպիային ձեր համաձայնությունը տալը, հարցրեք բժշկին, թե արդյոք ձեր պարագայում կարող է մեկ այլ մեթոդ ավելի արդյունավետ լինել, քան արթրոսկոպիան, ինչպիսիք են՝

  • քաշի կարգավորում
  • ցավազրկում
  • հակաբորբոքային դեղեր
  • ֆիզիոթերապիա, օրինակ՝ բուժական վարժանքներ:

Մինչև բուն արթրոսկոպիան բժշկը կհետազոտի ձեր հոդը և գուցե նշանակի այլ պատկերային հետազոտություններ, օրինակ՝ ռենտգենոգրաֆիա, մագնիսա-ռեզոնանսային տոմոգրաֆիա (ՄՌՏ), ինչպես նաև նաև՝ արյան կամ այլ թեստեր:

Արթրոսկոպիայից առաջ ձեզ կարող են առաջարկել նաև որոշ դեղերի ընդունման դադարեցում կամ նշանակեն նոր դեղեր:

Ինչպե՞ս է ընթանում արթրոսկոպիան

Ախտորոշիչ արթրոսկոպիան համարվում է փոքր վիրահատական միջամտություն, որից հետո կարող եք նույն օրը տուն վերադառնալ: Ձեր ընդհանուր առողջական վիճակից կամ հոդային հիվանդության բնույթից կախված, ձեզ կարող են առաջարկել տեղային կամ ընդհանուր անզգայացում:

Վիրաբույժը (կամ վնասվածքաբանը) ձեր հետազոտվող հոդի շրջանում կկատարի փոքր կտրվածք, կբացի փոքր անցք, որի միջոցով արթրոսկոպը կներմուծի ախտահարված հոդի մեջ:

Եթե բժիշկը ցանկանում է իրականացնել նաև որոշ բուժական միջամտություններ (արթրոսկոպիկ վիրահատություն), կարող է նաև հոդի շրջանում կատարել մեկ կամ մի քանի լրացուցիչ կտրվածքներ։ Արթրոսկոպիկ վիրահատության տեսակներից է, օրինակ, ծնկան հոդի պատռված կապանների վերականգնումը և պլաստիկան:

Արթրոսկոպիկ վիրահատությունները սովորաբար տևում են 30 րոպեից մինչև 2 ժամ, իսկ ախտորոշիչ արթրոսկոպիան՝ ավելի կարճ:

Վիրահատությունից հետո կտրվածքը փակվում է ստերիլ վիրակապով:

Ի՞նչ ակնկալել արթրոսկոպիայից հետո

Դուք կարող եք ունենալ միջամտության ենթարկված հոդի և շրջակա հյուսվածքների որոշակի ցավոտություն և այտուց։ Նման դեպքերում ձեզ կարող են առաջարկել սովորական ցավազրկողներ:

Բժիշկը ձեզ նաև կարող է խորհուրդ տալ՝

  • միջամտության ենթարկված հոդի բարձր դիրք՝ հոդի այտուցը մեղմացնելու համար
  • սառցեպարկ՝ ցավը և հոդի այտուցը մեղմացնելու համար
  • այլ օժանդակող միջոցներ։

Ձեր բժիշկը հավանաբար նաև կզգուշացնի, որ արթրոսկոպիայից հետո մի քանի օր խուսափեք ֆիզիկական գործերից: Զրուցեք այս մասին ձեր բժշկի հետ:

Անվտա՞նգ է արդյոք արթրոսկոպիան

Ցանկացած տեսակի բշժշկական միջամտություն ունի իր ընդհանուր և առանձնահատուկ ռիսկերը։ Արթրոսկոպիկ միջամտության հնարավոր բարդություններից են՝

  • վարակ
  • արյան մակարդուկներ (թրոմբ)
  • ներհոդային արյունահոսություն
  • նյարդի վնասում կամ թմրածության զգացում
  • ձգձգվող ցավեր:

Անհապաղ կապ հաստատեք ձեր բժշկի հետ, եթե արթրոսկոպիայից հետո ձեզ մոտ առաջացել է՝

  • ջերմություն
  • սուր ցավեր
  • վերքի հարակից մաշկի զգալի կարմրություն և այտուց
  • կայուն թմրածություն
  • վիրահատական անցքերից տհաճ հոտով հեղուկի կամ թարախի արտահոսք:

Հոդվածը տեղադրվել է՝ 07-04-2019 վերանայվել է՝ 24-03-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով