Ծննդաբերական «կեղծ» կամ Բրաքստոն-Հիկսի կծկանքներ

3 րոպե

Եթե հղիության ուշ փուլերում զգում եք արգանդի պնդացում-լարվածություն կամ ջղաձգումներ, դրանք կարող են լինել ոչ թե իսկական, այլ կեղծ ծննդաբերական կծկանքներ, որոնք հայտնի են նաև որպես Բրաքստոն-Հիկսի կծկանքներ:

Սա նորմալ հղիության մի նշան է և բնավ չի նշանակում, որ դուք արդեն պատրաստ եք ծննդաբերությանը: Բրաքստոն-Հիկսի կծկանքները երբեմն անվանվում են կեղծ կամ նախապատրաստական կծկանքներ:

Ի՞նչ են Բրաքստոն-Հիկսի կծկանքները

Բրաքստոն-Հիկսի կծկանքները ձեր որովայնի միմյանց հաջորդող ձգումներն ու թուլացումներն են: Դրանք բուն ծննդաբերությունից առաջ ձեր արգանդի նախապատրաստական կծկանքներն են, որոնք բարձրացնում են ձեր արգանդի մկանների տոնուսը և նաև կարող են ծննդաբերությանը նախապատրաստել արգանդի պարանոցը:

Ինչպե՞ս են դրանք դրսևորվում

Բրաքստոն-Հիկսի կծկանքները զգացվում են որպես ձեր որովայնով մեկ մկանների ձգումներ, և երբ դուք կծկանքի պահին ձեր ափը դնեք որովայնի պատին, կարող եք զգալ, որ ձեր արգանդը լարված և պնդացած է:

Բրաքստոն-Հիկսի կծկանքները կարող են ի հայտ գալ ձեր վաղ հղիությունից սկսած, սակայն դուք կարող եք և չզգալ դրանք մինչև ձեր հղիության երկրորդ եռամսյակը: Եթե սա ձեր առաջին հղիությունն է, գուցե դուք նկատեք այս կծկանքները սկսած 16 շաբաթականից: Հղիության ավելի ուշ փուլերում Բրաքստոն-Հիկսի կծկանքները կզգաք ավելի հաճախակի: Որոշ կանանց մոտ նման կծկանքները կարող են ընդհանրապես բացակայել:

Բրաքստոն-Հիկսի կծկանքները սկսվում և ավարտում են անկանոն և սովորաբար տևում են մինչև 30 վայրկյան: Դրանք կարող են անհարմարավետություն պատճառել, սակայն, իրականում ցավոտ չեն:

Բոլոր դեպքերում, Բրաքստոն-Հիկսի կծկանքները չեն առաջացնում ծննդաբերություն և չեն կարող դիտարկվել որպես ծննդաբերության մեկնարկի ազդանշան:

Ինչո՞վ են դրանք տարբերվում իսկական ծննդաբերական (երկունքի) ցավերից

Բրաքստոն-Հիկսի կծկանքները՝

• սովորաբար տևում են մինչև 30 վայրկյան
• կարող են պատճառել անհարմարավետություն (դիսկոմֆորտ), սակայն սովարաբար ցավոտ չեն
• սկսվում են անկանոն ժամանակներում
• սովորաբար ի հայտ են գալիս ժամում 1-2 անգամ (մինչև ուշ հղիություն) կամ օրական մի քանի անգամ
• սովորաբար անհետանում են, երբ դադարեցնում եք ֆիզիկական ակտիվությունը կամ փոխում եք մարմնի դիրքը:

Ի տարբերություն իսկական ծննդաբերական ցավերի, Բրաքստոն-Հիկսի կծկանքները՝

• ՉԵՆ մոտենում միմյանց
• ժամանակի ընթացքում ՉԵՆ երկարում
• քայլելիս ՉԵՆ ուժեղանում կամ ՉԵՆ հաճախանում
• ժամանակի ընթացքում ՉԵՆ ուժեղանում:

Դուք կարող եք Բրաքստոն-Հիկսի կծկանքները հեշտությամբ տարբերակել իսկական ծննդաբերությունից, քանի որ առաջինը կարող է անհետանալ մարմնի հարմար դիրք ընտրելիս կամ որոշ գործողություններով, օրինակ՝ տաք ցնցուղ կամ լոգանք ընդունելով: Եթե ձեր ցավերը կամ անհարմարավետության զգացումը թեթևանում են, հավանաբար ձեզ մոտ կեղծ կամ Բրաքստոն-Հիկսի կծկանքներ են:

Ուշ հղիության փուլում կարող եք ավելի հաճախակի ունենալ Բրաքստոն-Հիկսի կծկանքներ, հավանաբար, յուրաքանչյուր 10-20 րոպեն մեկ: Սա նշան է այն բանի, որ դուք պատրաստվում եք ծննդաբերությանը, որը հայտնի է որպես նախածննդաբերություն:

Եթե համոզված չեք, թե արդյոք ձեզ մոտ Բրաքստոն-Հիկսի կծկանքներն են, թե իսկական ծննդաբերություն, կապ հաստատեք ձեր բժշկի կամ բուժքրոջ հետ: Նրանք կարող են կատարել հեշտոցային զննում և, եթե արգանդի վզիկի որևէ փոփոխություն չհայտնաբերեն, ուրեմն ձեզ մոտ ծննդաբերություն չէ:

Արդյոք պե՞տք է զանգել բժշկին կամ բուժքրոջը

Եթե դուք ձեր կոնքահատակի, որովայնի կամ գոտկատեղի շրջանում զգում եք ցավ, ճնշում կամ անհարմարավետություն, ապա դրանք կարող են դիտարկվել որպես ծննդաբերության առաջին նշաններ:

Եթե ձեր հղիության ժամկետը լրացել է, դուք կարող եք քիչ համբերել, եթե ունեք բժշկի կամ ծննդատան հետ որևէ պայմանավորվածություն: Եթե ձեր «ջրերը գնացել են» կամ ձեր կծկանքնեն ուժեղ են և սկսվում են 5 րոպեն մեկ, ապա ժամանակն է, որ գնաք ծննդատուն:

Հղիության որևէ փուլում դուք պետք է անհապաղ կապ հաստատեք ձեր բժշկի կամ բուժքրոջ հետ, եթե՝

• ունեք որովայնային մշտական ցավեր
• ունեք հեշտոցային արյունահոսություն
• դուք զգում եք, որ ձեր երեխայի շարժումները թուլացել կամ դադարել են
• դուք ձեզ վատ եք զգում:

Եթե ինչ-որ հարցի շուրջ կասկած ունեք, մի երկմտեք և կապ հաստատեք ձեր բժշկի կամ բուժքրոջ հետ: Նրանց խորհուրդը կարող է խիստ օգտակար և տեղին լինել:

Ինչպե՞ս կարող եմ թեթևանցնել անհարմարավետությունը

Բրաքստոն-Հիկսի կծկանքները նորմալ երևույթ է և որևէ բուժման կարիք չի պահանջում: Սակայն, եթե դուք զգում եք անհարմարավետություն (դիսկոմֆորտ), ապա կարող եք փորձել՝

• պառկել
• քայլել
• ընդունել տաք ցնցուղ
• մերսում անցնել:

Բրաքստոն-Հիկսի կծկանքների ժամանակ օգտակար կարող են լինել նաև թուլացնող շնչառական վարժությունները: