Մրսածություն և գրիպ - Հղիություն

Հղի ժամանակ ընդհանուր մրսածությունը և գրիպը կարող են ազդել ձեր չծնված երեխայի վրա։

Եթե պատրաստվում եք հղիանալ կամ արդեն հղի եք, խիստ օգտակար կարող է լինել գրիպի դեմ պատվաստվելը, որը կօգնի այս վիրուսից ինչպես ձեր, այնպես էլ ձեր երեխայի պաշտպանությանը։

Մրսածության վարումը հղիության ժամանակ

Մրսածությունը կամ, ինչպես նշվում է բժշկական փաստաթղթերում, սուր շնչառական վիրուսային վարակը (ՍՇՎՎ), խիստ հաճախ հանդիպող վիրուսային վարակ է, որն ունի չափավոր ծանր ընթացք և դրսևորվում է քթի, ըմպանի, քթի հարակից խոռոչների և վերին շնչուղիների բորբոքմամբ։ Այն կարող է առաջացնել քթի փակվածություն կամ քթահոսություն (հարբուխ), կոկորդի ցավ, փռշտոց, հազ և ջերմություն։ Մրսածությունը սովորաբար տևում է մինչև մեկ շաբաթ, որի ընթացքում օրգանիզմը կարողանում է ինքնուրույն հաղթահարել վարակը։

ՍՇՎՎ դեմ որևէ բուժում գոյություն չունի, սակայն կարող եք ձեզ անհանգստացնող գանգատներն ու ախտանիշները մեղմացնել դեղատոմս չպահանջող որոշ դեղամիջոցներով։ ՍՇՎՎ ախտանիշների մեղմացմանը նաև կարող է օգնել առատ հեղուկների ընդունումը։

Գրիպի վարումը հղիության ժամանակ

Գրիպը նույնպես վիրուսային վարակ է, որը կարող է տարածվել օդակաթիլային ճանապարհով, օրինակ՝ հազալիս կամ փռշտալիս։ Գրիպը նույն ՍՇՎՎ-ը չէ և պատճառվում է այլ վիրուսների խմբով, որոնք կոչվում են գրիպի վիրուսներ (ինֆլուենցա)։ Գրիպի ախտանիշներն ավելի ծանր են և տևում են ավելի երկար, քան ՍՇՎՎ-ինը։

Գրիպով կարող եք վարակվել ամբողջ տարին, սակայն վիրուսն առավել տարածված է ձմռան ամիսներին։

Եթե հղի եք և կարծում եք, որ վարակվել եք գրիպով, ճիշտ կլինի տեղեկացնել ձեր բժշկին։

Ցանկալի է, որ գրիպով հիվանդ հղի կինը բուժվի հակավիրուսային դեղերով, որը թույլ է տալիս կրճատել բարդությունների ռիսկը։ Հակավիրուսային դեղերի արդյունավետությունն ամենաբարձրն է, երբ բուժումը սկսվում է ախտանիշները սկսվելուց հետո մինչև 48 ժամվա ընթացքում։

Հակավիրուսային դեղերն իրականում չեն բուժում գրիպը, սակայն օգնում են, որ՝

• կրճատվի հիվանդության տևողությունը միջինը 1 օրով
• մեղմանան որոշ գանգատներ
• նվազի լուրջ կամ ծանր բարդությունների ռիսկը։

Եթե ունեք գրիպ, բուժումը նաև պետք է ներառի՝

• հանգիստ (անկողնային կամ կիսաանկողնային ռեժիմ)
• տաք (բայց ոչ՝ շատ տաք) սենյակ և միջանցիկ քամիներից խուսափում
• ջրազրկման կանխարգելման նպատակով առատ հեղուկներ ընդունում։

Խիստ բարձր ջերմությունն իջեցնելու և սաստիկ մկանացավերը մեղմացնելու համար ձեր բժշկի իմացությամբ կարող եք ընդունել Ացետամինոֆեն (Պարացետամոլ, Թայլենոլ և այլն)։

Դեղերի ընդունումը հղիության ընթացքում

Լավագույն տարբերակն այն է, որ հղիության ընթացքում, հատկապես առաջին երեք ամիսներին որևէ դեղ չընդունեք։ Մրսածությունը և գրիպը հաճախ որևէ դեղորայքային բուժում չեն պահանջում։ Այնուամենայնիվ, եթե հղի եք և կարծում եք, որ ունեք դեղամիջոցի կարիք, Ացետամինոֆենը (Պարացետամոլ, Թայլենոլ և այլն) կարող է դառնալ լավագույն ընտրությունը։

Հղիության ընթացքում մինչև որևէ դեղ ընդունելը խորհրդակցեք ձեր բժշկի կամ քույր-մանկաբարձի հետ։

Ացետամինոֆենը հղիության ժամանակ

Երբ հղի եք, Ացետամինոֆենը լավագույն ընտրությունն է, որ բուժեք՝

• թույլ կամ չափավոր ցավերը
• բարձր ջերմությունը (տենդ)։

Որպես ցավազրկող և ջերմիջեցնող արդյունավետ միջոց, Ացետամինոֆենը երկարատև տարիներ օգտագործվել է հղիության բոլոր փուլերում։ Որևէ հստակ տվյալ չկա այն մասին, որ այս դեղամիջոցը կարող է վնասակար ազդեցություն թողնել չծնված երեխայի վրա։

Այնուամենայնիվ, ինչպես հղիության ժամանակ օգտագործվող այլ դեղերի, այնպես էլ Ացետամինոֆենի դեպքում ցանկալի է կիրառել «նվազագույն ազդող դեղաչափ՝ հնարավոր ամենակարճ ժամանակահատվածում» սկզբունքը։ Եթե Ացետամինոֆենի դեղաչափը չի մեղմացնում գանգատները, դիմեք ձեր բժշկին, այլ ոչ թե ինքնուրույն բարձրացրեք դեղաչափը կամ ավելացրեք այլ դեղամիջոցներ (որոք, ի դեպ, նույնպես կարող են պարունակել Ացետամինոֆեն)։

Իբուպրոֆենը կամ այլ ՈՍՀԲԴ հղիության ժամանակ

Իբուպրոֆենը ոչ ստերոիդ հակաբորբոքային դեղամիջոցներից մեկն է (ՈՍՀԲԴ)։ Եթե հղի եք կամ պատրաստվում եք հղիանալ, զրուցեք ձեր բժշկի հետ մինչև Իբուպրոֆեն կամ մեկ այլ ՈՍՀԲԴ ընդունելը։

Դեռևս անհայտ է, թե հղիության վաղ շրջանում ՈՍՀԲԴ-ները, օրինակ՝ Իբուպրոֆենը կամ Ասպիրինը, արդյոք կարող են բարձրացնել վիժման ռիսկը։ ՈՍՀԲԴ-ները խորհուրդ չեն տրվում հղիության վերջին երեք ամիսներին, քանի որ կարող են բարձրացնել մինչ- կամ հետծննդաբերական արյունահոսության, ծննդաբերության հետաձգման, չծնված երեխայի սրտի և երիկամների խնդիրների առաջացման ռիսկը։

Ացետամինոֆենը (Պարացետամոլ, Թայլենոլ և այլն), որը չի մտնում ՈՍՀԲԴ-ի խմբի մեջ, մնում է հղիության ընթացքում ցավերի մեղմացման և բարձրացած ջերմության կարգավորման ընտրության միջոց։

Հղիության ընթացքում գրիպի դեմ պատվաստումը

Գրիպի պատվաստանյութը կարող է վարակից պաշտպանել ինչպես ձեզ, այդպես էլ ձեր չծնված երեխային։

Հղի կանանց մոտ գրիպի բարդացած ընթացքի ռիսկը բարձրանում է, հատկապես հղիության վերջին ամիսներին (ներառյալ՝ կյանքին սպառնացող բարդություններ): Գրիպի ամենատարածված բարդություններից մեկը բրոնխիտն է՝ շնչուղիների վարակ, որը կարող է վերաճել թոքաբորբի (պնևմոնիա)։ Ավելի հազվադեպ նաև կարող են զարգանալ գրիպի այլ բարդություններ, այդ թվում՝

• միջին ականջի վարակ (միջին օտիտ)
• արյան վարակ, որը կարող է առաջացնել արյան ճնշման կտրուկ անկում (սեպտիկ շոկ)
• գլխուղեղի և ողնուղեղի վարակներ (մենինգիտներ)
• գլխուղեղի բորբոքում (էնցեֆալիտ)
• սրտամկանի վարակային բորբոքում (միոկարդիտ)։

Եթե հղիության ժամանակ վարակվեք գրիպով, կարող է զարգանալ վաղաժամ ծննդաբերություն կամ երեխան կարող է ծնվել ցածր մարմնի քաշով, անգամ հղիությունը կարող է ավարտվել մեռելածնությամբ կամ նորածնի մահով՝ նրա կյանքի առաջին մի քանի շաբաթվա ընթացքում։

Գրիպի դեմ պատվաստանյութն անվտանգ է հղիության բոլոր փուլերում՝ սկսած առաջին մի քանի շաբաթվանից մինչև ծննդաբերության օրը։ Պատվաստանյութը որևէ ռիսկ չի պարունակում ինչպես ձեր, այնպես էլ ձեր ապագա երեխայի առողջության համար։

Եթե կինը հղիության ընթացքում ստանում է գրիպի պատվաստանյութ, գրիպից որոշակի չափով պաշտպանված է դառնում նաև նորածին երեխան՝ կյանքի առնվազն առաջին 6 ամիսների ընթացքում։

Պատվաստանյութը որևէ ռիսկ չի պարունակում նաև կերակրող մայրերի կամ նրանց երեխաների համար։