Skip to main content

Համակարգչային շերտագիր - Գործիքային թեստեր

Համակարգչային (կոմպյուտերային) տոմոգրաֆիան (ԿՏ, անգլերեն՝ CT) ռենտգեն հետազոտության տեսակ է, որի ախտորոշիչ և բուժական նշանակությունը վերջին տասնամյակների ընթացքում զգալիորեն աճել է:

ԿՏ–ն ախտորոշիչ միջոցառում է, որի ժամանակ ստացվում է մարդու ներքին օրգանների ռենտգենյան շերտավոր եռաչափ պատկերներ: ԿՏ ախտորոշիչ նշանակությունն աննկարագրելի մեծ է ինչպես անհետաձգելի, այնպես էլ պլանային իրավիճակներում:

Ունենալով հսկայական կլինիկական դեր, այնուամենայնիվ, ԿՏ հետազոտությունը թանկարժեք է և ոչ լայնորեն մատչելի:

Ինչ է ԿՏ սքանավորումը

ԿՏ-ն ռենտգեն հետազոտության մի տեսակն է, որի էությունը ներքին օրգանների եռաչափ պատկերների արտածումն է: ԿՏ սարքը ռենտգենյան ճառագայթների փունջը պտտում է ձեր մարմնի շուրջը, որի շնորհիվ ստացվում է ռենտգեն պատկերների շարք՝ տարբեր խորության շերտագրերով, ինչը թույլ է տալիս հետազոտվող օրգանների կամ հյուսվածքների մասին ստանալ մանրակրկիտ տվյալներ:

Ե՞րբ է նշանակվում ԿՏ սքանավորումը

ԿՏ կարող է նշանակվել հետևյալ նպատակներով՝

  • տարբեր հիվանդությունների և վիճակների ախտորոշում կամ վերահսկում, օրինակ՝ ուռուցքներ (այդ թվում՝ քաղցկեղներ), թոքերի ախտահարումներ և այլն
  • ոսկրերի կոտրվածքների, հոդերի և ներքին օրգանների վնասվածքների ախտորոշում
  • մեծ վիրահատությունների կամ ճառագայթային թերապիայի պլանավորում
  • անատոմիական շեղումների ու արատների հայտնաբերում
  • բիոպսիայի ճիշտ իրականացում:

ԿՏ-ով կարելի է հետազոտել մարմնի բոլոր շրջանները, սակայն ավելի հաճախ սքանավորվում են գլուխը, կրծքավանդակի, որովայնի և փոքր կոնքի օրգանները: Այն կարող է օգտագործվել նաև ոսկրերը, արյունատար անոթները, սիրտը (անգիոգրաֆիա), փափուկ հյուսվածքները (օրինակ՝ մկանները) և այլ օրգանները (օրինակ՝ գլխուղեղը) հետազոտելու համար:

ԿՏ-ով ստացված եռաչափ պատկերները կարող են ավելի մանրակրկիտացվել՝ օգտագործելով կոնտրաստային գունանյութեր:

ԿՏ-ն և հղիությունը

ԿՏ-ի ընթացքում կիրառվում է ռենտգենյան ճառագայթում, ուստի, պտղի հավանական վնասումից խուսափելու համար հղիներին այս հետազոտությունը պետք է նշանակվի միայն բացառիկ դեպքերում:

Հոդվածը հրապարակվել է՝ 12-04-2018
Վերջին վերանայում՝ 07-04-2024