Skip to main content

Էնդոսկոպիա - Գործիքային թեստեր

Էնդոսկոպիան բժշկական միջոցառում է, որը բժշկին թույլ է տալիս անմիջականորեն դիտել ձեր ներքին օրգանները։

Այս հետազոտությունը թույլ է տալիս ոչ միայն ախտորոշել, այլև բուժել որոշ հիվանդություններ:

Ի՞նչ է էնդոսկոպիան

Էնդոսկոպը ազատ ծայրին լուսավորող տեսախցիկ ունեցող բարակ, ճկուն խողովակ է, որի միջոցով ձեր բժիշկն ուղղակիորեն կամ էկրանի վրա դիտում է ձեր որոշ օրգանները և ներքին կառուցվածքները:

Էնդոսկոպիայի տեսակները

Այսօր ախտորոշիչ կենտրոններում կիրառվում են էնդոսկոպիայի տարբեր տեսակներ, որոնցից յուրաքանչյուրը նախատեսված է կոնկրետ որևէ օրգանը կամ շրջանը զննելու համար, օրինակ՝

  • գաստրոսկոպիա, երբ բերանով անցկացված էնդոսկոպով զննվում է կերակրափողը (որկոր), ստամոքսը և 12-մատնյա աղին
  • կոլոնոսկոպիա, երբ հետացքով անցկացված էնդոսկոպով զննվում է հաստ աղիքը
  • բրոնխոսկոպիա, երբ բերաով ու կոկորդով անցկացված էնդոսկոպով զննվում են շնչուղիները (շնչափող և բրոնխներ) և թոքերը
  • ցիստոսկոպիա, երբ միզուկով անցկացված էնդոսկոպով զննվում է միզապարկի խոռոչը
  • հիստերոսկոպիա, երբ հեշտոցով և արգանդի վզիկով անցկացված էնդոսկոպով զննվում է արգանդի խոռոչը
  • պատիճային (կապսուլյար) էնդոսկոպիա, երբ դուք կուլ եք տալիս անլար տեսախցիկ և լույսի աղբյուր պարունակող պատիճ, որն անցնում է մարսողական խողովակով և ընթացքում կատարվում են դիտումներ:

էնդոսկոպիային նախապատրաստվելը

Էնդոսկոպիան սովորաբար ցավոտ չէ, սակայն, ձեզ հավանաբար կտան թեթև հանգստացնող կամ անզգայացնող դեղամիջոցներ: Այս պատճառով, պետք է նախապես հոգ տանել, որ տուն վերադառնալիս ուղեկցող անձ լինի:

Էնդոսկոպիկ հետազոտությանը սովորաբար ներկայանում են քաղցած և ջուր չխմած վիճակում։ Խնդրեք բժշկին, որ այս հարցերով ներկայացնի լրացուցիչ տեղեկատվություն:

Կոլոնոսկոպիան սովորաբար պահանջում է ավելի մանրակրկիտ նախապատրաստություն։ Զրուցեք այս թեմայով բժշկի հետ:

Էնդոսկոպիայի ընթացքը

Մինչև բուն ախտորոշիչ միջոցառումը սկսելը և էնդոսկոպիայի տեսակից կախված, ձեզ հավանաբար կտան տեղային կամ ընդհանուր անզգայացնող, ինչպես նաև հանգստացնող կամ տագնապամարիչ դեղամիջոցներ, որոնք թույլ կտան, որ թուլանաք և ավելի հեշտ կարողանաք տանել հետազոտության հետ կապված տհաճ զգացողություններն ու անհարմարությունները: Այդ դեղամիջոցները գուցե մասամբ անջատեն ձեր գիտակցությունը և չզգաք կամ մոռանաք հետազոտության մանրամասները:

Հետազոտող բժիշկը էնդոսկոպը զգուշությամբ կներհրի ձեր մարմնի բնական անցքերից մեկնումեկի միջով (ըստ տեսակի՝ բերանով, հետանցքով, միզուկով կամ հեշտոցով) և կսկսի զննել հետազոտման ենթակա օրգանը: Հետազոտության ընթացքում գուցե այդ օրգանից մի փոքր նմուշ վերցվի՝ լրացուցիչ հյուսվածաբանական կամ այլ հետազոտության համար (կոչվում է բիոպսիա):

Էնդոսկոպիայի ռիսկերը

Ցանկացած բժշկական միջոցառում պարունակում է որոշակի ռիսկեր: Էնդոսկոպիան ընդհանուր առմամբ անվտանգ մեթոդ է, բայց միշտ էլ առկա են մի շարք վտանգներ, այդ թվում՝

  • արյունահոսություն
  • հանգստացնող (տագնապամարիչ) դեղերի կողմնակի ազդեցություններ
  • վարակ
  • օրգանների թափածակում (պատի ծակում):

Էնդոսկոպիայից հետո

Ախտորոշիչ կենտրոնում դուք պետք է մնաք հսկողության ներքո այնքան ժամանակ, մինչև ձեզ ներարկած անզգայացնող կամ հանգստացնող դեղերի ազդեցություններն անհետանան: Ըստ անհրաժեշտության, կարող են նշանակվել ցավազրկողներ կամ այլ դեղեր:

Եթե հետազոտման օրը պատրաստվում եք վերադառնալ տուն, հոգ տարեք, որ ուղեկցող լինի:

Էնդոսկոպիայից հետո դրա հետ կապված գանգատները, որպես կանոն, լիովին անհետանում են հետազոտության հաջորդ օրը:

Բժիշկը ձեզ հետ կքննարկի հետազոտության արդյունքները։ Եթե էնդոսկոպիայի հաջորդող օրերին ի հայտ են գալիս անհանգստության տեղիք տվող նշաններ կամ սրանում է հիմնական հիվանդությունը, անպայման այդ մասին տեղեկացրեք բժշկին:

Հոդվածը հրապարակվել է՝ 19-04-2018
Վերջին վերանայում՝ 07-04-2024