Գրադարան

Հոգնածության զգացում

Հոգնածության զգացում

Time Read 2 րոպե

Բոլորս էլ ժամանակ առ ժամանակ զգում ենք հոգնածություն կամ գերհոգնածություն։

Նման դեպքերում մեր հոգնածությունն ունի ակնհայտ պատճառ և հանգստանալուց հետո վերանում է։

Ի տարբերություն այսպիսի ժամանակավոր հոգնածության դեպքերին, լինում են նաև հյուծվածություն կամ ուժասպառություն հիշեցնող ընդհանուր թուլության և հոգնածության զգացումներ, որոնք որևէ ակնհայտ արտաքին պատճառ չունեն, զարգանում են աստիճանաբար և ուղեկցվում ներքին էներգիայի, շարժառիթների և ուշադրության կենտրոնացման թուլացման հետ։ Նման հոգնածությունը հաճախ կապված է դեպրեսիայի, ապրելակերպի որոշ գործոնների կամ առողջական որևէ այլ խնդրի առկայության հետ։

Նման դեպքերում ֆիզիկական հոգնածությունից բացի առաջ են գալիս նաև հուզական և հոգեբանական «հյուծման» նշաններ։ Հոգնածության դրվագները կարելի է կրճատել ինքնօգնության որոշ միջոցներով: Եթե դրանք օգուտ չեն տալիս կամ կարծում եք, որ ձեր հոգնածության պատճառը ինչ-որ հիվանդություն կամ առողջական խնդիր է, դիմեք ձեր բժշկին:

Ընդհանուր հոգնածության պատճառները

Ապրելակերպի գործոններ

Հոգնածության զգացումը կարող է կապված լինել հետևյալ գործոնների հետ՝

  • ալկոհոլի կամ թմրամիջոցների օգտագործում
  • ֆիզիկական գերլարվածություն
  • հակառակը՝ ֆիզիկական պասիվություն
  • անբավարար քուն
  • անառողջ սննդակարգ:

Հիվանդություններ կամ վիճակներ

  • հիվանդություններ և վիճակներ, որոնք ուղեկցվում են ջրազրկմամբ
  • սակավարյունություն (անեմիա)
  • տագնապային խանգարումներ
  • քաղցկեղ
  • քրոնիկ հոգնածության համախտանիշ
  • քրոնիկ վարակ կամ բորբոքում
  • քրոնիկ երիկամային հիվանդություններ
  • թոքերի քրոնիկ օբստրուկտիվ հիվանդություն (ԹՔՕՀ)
  • դեպրեսիա
  • շաքարային դիաբետ
  • էմֆիզեմա
  • ֆիբրոմիալգիա
  • սրտանոթային հիվանդություններ
  • վահանաձև գեղձի գերակտիվություն (թիրեոտոքսիկոզ) կամ թերակտիվություն (հիպոթիրեոզ)
  • աղիների բորբոքային հիվանդություն
  • ցրված սկլերոզ
  • գիրություն
  • կայուն կամ քրոնիկ ցավ
  • քնի ապնոէ
  • սթրես
  • գլխի (գանգուղեղային) տրավմաներ
  • անհանգիստ («պարող») ոտքերի համախտանիշ
  • լյարդային անբավարարություն
  • քնկոտություն առաջացնող որոշ դեղերի ընդունում, օրինակ՝ հակահիստամինային դեղեր, հակադեպրեսանտներ, թմրաբեր ցավազրկողներ, հազի դեմ դեղեր և այլն
  • բուժման որոշ մեթոդներ, օրինակ՝ քիմիոթերապիա, ճառագայթային բուժում և այն։

Ե՞րբ դիմել բուժօգնության

Զանգեք 1-03 և կանչեք շտապբուժօգնություն բոլոր այն դեպքերում, երբ հոգնածության զգացումը պայմանավորված է հոգեկան առողջության խնդրի հետ և ուղեկցվում է հետևյալ նշաններով՝

  • ինքնավնասման կամ ինքնասպանության մտքեր
  • ուրիշներին վնասելու մտքեր։

Անհետաձգելի բուժօգնության անհրաժեշտություն առաջանում է նաև այն դեպքերում, երբ ընդհանուր թուլությունը և հոգնածությունը ուղեկցվում են հետևյալ գանգատների հետ՝

  • հետկրծոսկրային ցավեր
  • շնչարգելություն և հևոց
  • անկանոն կամ հաճախացած սրտազարկ
  • ուշաթափության զգացում
  • որովայնի, կոնքի կամ թիկունքի սուր ցավեր
  • առատ արյունահոսություն
  • սուր գլխացավ։

Դիմեք ձեր բժշկին նաև այն դեպքում, երբ ձեր ընդհանուր հոգնածության զգացումը տևում է մի քանի շաբաթ` չնայած հանգստանալու ձեր փորձերին, սթրեսը նվազեցնելուն, սննդակարգն առողջ դարձնելուն կամ հեղուկների ընդունումը նորմալացնելուն։

Հոդվածը տեղադրվել է՝ 19-05-2018 վերանայվել է՝ 07-04-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով