Պտղաբերության հետազոտություններ

Պտղաբերության հետազոտություններ

Եթե բժիշկը կասկածում է, որ ձեր չհղիանալն ունի որևէ պատճառ, ապա կան տարբեր հետազոտություններ, որոնք կարող են ստուգել կամ գնահատել ինչպես ձեր, այնպես էլ ձեր զուգընկերջ պտղաբերությունը:

Բժիշկը կարող է ձեզ առաջարկել այդ հետազոտություններից մեկումեկը կամ մի քանիսը, որոնք սովորաբար կատարվում են հիվանդանոցներում, ախտորոշիչ կամ պտղաբերության կլինիկաներում:

Սերմնահեղուկի հետազոտություն

Ընդհանուր առմամբ 5 դեպքից 2-ի ժամանակ պտղաբերության խնդիրը կապված է ոչ թե կնոջ, այլ տղամարդ զուգընկերոջ հետ: Երբեմն սպերմատոզոիդների ցածր քանակը (կոչվում է «օլիգոսպերմիա») կամ այս բջիջների ցածր որակը (օրինակ՝ շարժունակության կորուստ կամ թուլացում) կարող են բերել ձվաբջջի բեղմնավորման անհաջողության (որի պատճառը բնավ ձվաբջիջը կամ կնոջ անպտղությունը չէ):

Սերմնահեղուկի հետազոտության համար անհրաժեշտ է, որ ձեր զուգընկերը լաբորատորիայում հանձնի սերմնահեղուկի կենսանմուշ, որն էլ զննվում է մանրադիտակով:

Ձվազատման ստուգում արյան հետազոտություններով

Կնոջ արյան հորմոնների մակարդակները սերտորեն կապված են ձվազատման հետ (օվուլյացիա), երբ ձվարանները ֆալոպյան փողի (նույն արգանդափողն է) մեջ ազատում են մեկ ձվաբջիջ: Հորմոնային անհավասարկշռությունները կամ շեղումները կարող են առաջացնել ձվազատման խնդիրներ, և արյան հետազոտությունը կարող է օգնել որոշելու ձեզ մոտ նման խնդիրի առկայությունը:

Եթե ձեզ մոտ առկա են դաշտանի բացակայություններով շրջաններ կամ ունեք անկանոնավոր դաշտանային ցիկլեր, դրանք նույնպես բժշկի կողմից կարող են դիտարկվել որպես ձվազատման խնդիրների նշաններ: Կանանց մոտ ձվազատման խնդիրների ամենատարածված պատճառը պոլիկիստոզային ձվարանների համախտանիշն է:

Քլամիդիայի և այլ ՍՃՓՀ հետազոտություն

Քլամիդիան բազմաթիվ երկրներում ամենահաճախ հանդիպող սեռական ճանապարհով փոխանցվող հիվանդությունն է (ՍՃՓՀ): Այն կարող է կնոջ մոտ առաջացնել փոքր կոնքի օրգանների բորբոքային հիվանդություն (ՓԿՕԲՀ) և բերել անպտղության, ուստի բժիշկը կարող է նշանակել նաև այս կամ այլ ՍՃՓՀ հետազոտություն: Քլամիդիայի հետազոտության համար դուք պետք է հանձնեք մեզի կենսանմուշ կամ ձեր միզուկից և (կամ) արգանդի վզիկից լաբորանտը կվերցնի քսուք:

Գերձայնային հետազոտություն

Գերձայնային հետազոտությունը կամ սոնոգրաֆիան նշանակվում է, որպեսզի ստուգվեն ձեր ձվարանները, արգանդը և ֆալոպյան փողերը: Այս հետազոտության մեկ այլ տարբերակում սոնոգրաֆիստը կարող է օգտագործել տրանսվագինալ (ներհեշտոցային) տվիչ (датчик), որի դեպքում կարող է ստացվել վերարտադրողական օրգանների ավելի հստակ սոնոգրաֆիկ պատկեր:

Որոշ հիվանդություններ, օրինակ՝ էնդոմետրիոզը և ֆիբրոիդը (արգանդի միոմա) կարող են ախտահարել ձեր արգանդը և կանխել հղիության առաջացումը: Սոնոգրաֆիան թույլ է տալիս նաև հայտնաբերել ֆալոպյան փողերի արգելքները (անանցանելիություն), որի առկայությունը խոչընդոտում է ձվարաններից ազատված ձվաբջջի տեղափոխումը փողերով դեպի արգանդ:

Ֆալոպյան փողերի ռենտգեն

Ֆալոպյան փողերի ռենտգեն հետազոտությունը կոչվում է «հիստերոսալպինգոգրաֆիա»: Այս դեպքում օգտագործվում է կոնտրաստային նյութ, որը ներմուծվում է արգանդի վզիկով և բժշկին թույլ է տալիս ռենտգեն պատկերի վրա հայտնաբերել արգանդափողերի անանցանելությունը: Ինչպես նշվեց վերևում, նման պայմաններում ձվաբջիջը չի կարողանում փողերով իջնել արգանդ, որն էլ խոչընդոտում է հղիացումը:

Լապարոսկոպիա

Եթե ունեք վերարտադրողական օրգանների հետ կապված խնդիրներ, օրինակ՝ փոքր կոնքի օրգանների բորբոքային հիվանդություն կամ էնդոմետրիոզ, ապա ձեզ կարող են առաջարկել լապարոսկոպիա: Սա փոքր վիրաբուժական միջամտություն է, որի ժամանակ ձեր որովայնի պատին կատարում են փոքր կտրվածք, որի միջով ներմուծում են ազատ ծայրին տեսախցիկ ունեցող բարակ խողովակ և զննում ձեր արգանդը, փողերը և ձվարանները:

Հոդվածը վերանայվել է՝ 06-03-2021