Պտղի դուպլեքս - Հղիություն

Պտղի գերձայնային հետազոտությունը կարող է հուզիչ լինել ծնողների համար, քանի որ այն թույլ է տալիս տեսնել զարգացող երեխայի վաղ տեսքը:

Բայց դա նաև կարևոր գործիք է բժիշկների համար պտղի առողջությունը, այդ թվում՝ աճն ու զարգացումը ստուգելու համար: Պտղի գերձայնային հետազոտությունը նաև օգտագործվում է հղիության այլ կողմները գնահատելու համար, ինչպիսիք են ամնիոտիկ հեղուկի (պտղաջրերի) քանակը և ընկերքի գտնվելու վայրը: Որոշ դեպքերում պտղի գերձայնային հետազոտությունը կարող է օգտագործվել՝ ստուգելու կամ ախտորոշելու հնարավոր առողջական խնդիրը:

Պտղի գերձայնային ժամանակ հղիի որովայնի վրա տեղադրվում է գավազանաձև սարք, որը կոչվում է տվիչ (տրանսդյուսեր)։ Կամ որոշ դեպքերում այն կարող է տեղադրվել հեշտոցում կամ հեշտոցի և հետանցքի միջև ընկած հատվածում: Ձայնային ալիքները վերածվում են բաց և մութ դաշտերի, որն էկրանի վրա ստեղծում է պտղի պատկերը, ինչպես ցույց է տրված ստորև:

Պտղի գերձայնային հետազոտության հետ կապված ռիսկերը ցածր են: Բայց, ինչպես բոլոր բժշկական միջոցառումների դեպքում, դա որոշակի ռիսկ է պարունակում: Պտղի գերձայնային հետազոտությունը պետք է կատարվի միայն բժշկական ցուցումներով՝ որպես նախածննդյան խնամքի մաս:

Եթե պատրաստվում եք գերձայնային հետազոտության, դիտեք հետևյալ նկարները: Նրանք ձեզ պատկերացում կտան, թե ինչ կարելի է ակնկալել և կօգնեն ձեզ ավելի լավ հասկանալ, թե ինչ եք տեսնում հետազոտության ժամանակ:

Վաղ հղիություն

Ստորև բերված նկարը ցույց է տալիս պտղի պատկերը հղիության 11-րդ շաբաթում, որը բեղմնավորումից հետո ինը շաբաթ անց է: Այս փուլում պտղի գլուխը կազմում է նրա երկարության մոտավորապես կեսը։

Սիրտ

Ստորև նկարում պատկերված է պտղտի սրտի բոլոր չորս խոռոչները, ինչպես նաև սրտի փականները: Այս տեսակի պատկեր սովորաբար ստացվում է հղիության 18-րդ և 22-րդ շաբաթների միջև անցկացված գերձայնային հետազոտության ժամանակ: Պտղի գերձայնային հետազոտությունն օգտագործվում է ստուգելու, թե արդյոք սիրտը ճիշտ է աշխատում և արդյոք կարող են լինել սրտի հետ կապված խնդիրներ:

Գլխուղեղ

Ստորև բերված է գլխուղեղի հիմքի պատկերը, որը կոչվում է ուղեղիկ (ցերեբելում): Այս տեսակի պատկերը սովորաբար ստացվում է հղիության 18-ից 22 շաբաթների ընթացքում արված գերձայնային հետազոտության ժամանակ:

Ուղեղիկը գլխուղեղի այն մասն է, որը վերահսկում է մկանների կորդինացիան և հավասարակշռությունը: Գերձայնային պատկերի վրա դրա ձևը ստուգելը կարող է օգնել բժշկին գտնելու նյարդային խողովակի արատները: Նյարդային խողովակը ձևավորվում է հղիության առաջին շաբաթներին: Խողովակի վերին մասը դառնում է գլխուղեղ, իսկ մնացածը՝ ողնուղեղ: Նյարդային խողովակի զարգացման հետ կապված խնդիրները կարող են հանգեցնել այնպիսի խնդիրների, ինչպիսին է սպինա բիֆիդան, որի դեպքում նյարդային խողովակի մի մասը ճիշտ չի զարգանում կամ փակվում: Սա կարող է հանգեցնել ողնուղեղի և ողնաշարի ոսկորների հետ կապված խնդիրների:

Գլուխ

Ստորև ներկայացված է պտղի գլխի տեսք: Ավելի հաստ սպիտակ գծերը, որոնք կազմում են շրջանագիծ, գանգն է: Շրջանագծի մեջտեղում գտնվող սպիտակ գիծը միջին գծի կառուցվածքն է, որը բաժանում է երեխայի գլխուղեղը աջ և ձախ կեսերի: Գլխի չափումները կարող են օգնել պտղի տարիքի որոշմանը:

Ձեռքեր

Բաց ձեռքը և մատները, ինչպես ցույց է տրված ստորև նկարում, այն նշաններից են, որոնք բժիշկը փնտրում է գերձայնային հետազոտությամբ՝ հաստատելու համար, որ պտուղը աճում և զարգանում է ինչպես ակնկալվում էր:

Աչքեր

Այս պատկերը ցույց է տալիս պտղի աչքի ոսպնյակը: Հղիության 23-րդ շաբաթվա ընթացքում, որը բեղմնավորումից 21 շաբաթ անց է, սկսվում են պտղի աչքերի արագ շարժումները: Կոպերը սկսում են բացվել հղիության 28-րդ շաբաթում, որը բեղմնավորումից 26 շաբաթ անց է:

Պարանոց

Սա պտղի պարանոցային ողնաշարի խաչաձև հատած պատկերն է: Պարանոցային ողնաշարը սկսվում է գանգի հիմքից և իջնում պարանոցի միջով: Այն պաշտպանում է ողնուղեղը և պահում գանգը:

Ողնաշար

Սա պտղի ողնաշարի պատկերն է: Այն պտղի գերձայնային հետազոտությամբ առավել հեշտ ճանաչելի կառուցվածքներից մեկն է:

Ոտքեր

Այս պատկերը ցույց է տալիս պտղի ոտքի ոսկորը, որն անցնում է կոնքից մինչև ծունկ և կոչվում է ազդրոսկր: Այն մարմնի ամենամեծ և ամենաուժեղ ոսկորն է:

Գերձայնային հետազոտությամբ կարելի է նաև տեսնել հասուն պտղի ոտքի ստորին հատվածի մեծ ոսկորները:

Պորտալար

Ստորև նկարում պատկերված սլաքը ցույց է տալիս այն վայրը, որտեղ պորտալարը ամրացված է պտղի փորիկին: Դիտելով այս շրջանը, բժիշկը կարող է ստուգել մի քանի վիճակներ, որոնցից մեկը կոչվում է օմֆալոցելե: Դա առաջանում է, երբ որովայնի պարունակությունը դուրս է գալիս որովայնի պորտի բացվածքից: Մեկ այլ վիճակ է գաստրոշիզը, երբ առաջանում է որովայնի պատը ձևավորող հյուսվածքի ճեղքում:

3D պտղի գերձայնային հետազոտություն

Ստորև բերված նկարը պտղի եռաչափ (3D) գերձայնային հետազոտությամբ ստացված պատկերն է: Այս տեսակի գերձայնը կարող է ավելի հստակ և մանրամասն պատկերներ ստանալ, քան ստանդարտ գերձայնը: Պտղի 3D գերձայնային հետազոտությունը երբեմն օգտագործվում է դեմքի, ոսկորների կամ նյարդային խողովակի արատները հայտնաբերելու համար: