Բշտեր - Առաջին օգնություն

Մաշկային բշտերը հատակ, ծածկ և խոռոչ ունեցող ցանային տարրեր են, որոնք ունեն շճային կամ շճա-արյունային պարունակություն:

Եթե մաշկային այս տարրի մեծությունը մինչև 0,5 սմ տրամագծով է, բժիշկներն ասում են, որ առկա է բշտիկ (վեզիկուլա), իսկ ավելի մեծ դեպքում՝ բուշտ (բուլլա): Այնուամենայնիվ, երկու դեպքում էլ՝ և՛ բուշտը և՛ բշտիկը բացվելու դեպքում առաջացնում են վերնամաշկի մակերեսային էրոզիա։

Եթե բուշտը կամ բշտիկը խիստ ցավոտ չեն, փորձեք դրանց ձեռք չտալ: Ծածկող մաշկը հանդես է գալիս որպես բակտերիաների համար բնական պատնեշ և կարող է նվազեցնել վարակման ռիսկը: Ծածկեք այն ստերիլ (մանրէազերծ) անձեռոցիկով կամ ստերիլ վիրակապով այնպես, որ կպչուն մասերը չդիպչեն բշտին:

Եթե արտաքինից բուշտը կամ բշտիկը ձեզ թվում են վարակված, դիմեք ձեր բժշկին: Նույն կերպ, տեղեկացրեք ձեր բժշկին, եթե ունեք դիաբետ կամ սրտային անբավարարություն:

Ինչպե՞ս չորացնել բուշտը կամ բշտիկը

Բշտերի հետ կապված ցավերը մեղմացնելու համար չորացրեք դրանք՝ առանց հեռացնելու կամ վնասելու ծածկող մաշկը։

• Նախ, լվացեք ձեր ձեռքերը և բուշտն օճառով և գոլ ջրով:
• Բշտի վրա զգուշությամբ (որպեսզի չբացվի) քսեք յոդի լուծույթ:
• Վերցրեք փակ վիճակում գտնվող ստերիլ ներարկման ասեղ։
• Բացեք ասեղի տուփը, հեռացրեք ասեղի պատյանը և առանց ասեղի մետաղական մասին հպվելու զգուշությամբ մի քանի տեղից ծակեք բուշտը դրա եզրին մոտ: Առանց բուշտը սեղմելու՝ համբերեք, որ հեղուկն ինքնուրույն արտահոսի:
• Բուշտը դատարկվելուց հետո այն ծածկող և հարակից մաշկը զգուշությամբ օծեք որևէ նրբաքսուքով (օրինակ՝ ստերիլ վազելին) և ծածկեք ոչ կպչուն ստերիլ (մանրէազերծ) անձեռոցիկով: Եթե նույն տեղում բուշտը դարձյալ լցվում է, դադարեք քսուք օգտագործելը:
• Ամեն օր ստուգեք տվյալ շրջանը և համոզվեք, որ վարակման նշաններ չկան:
• Մի քանի օր անց զգուշությամբ կտրեք-հեռացրեք բուշտի տեղում առկա չորացած մաշկը՝ օգտագործելով ալկոհոլով մանրէազերծված պինցետ և մկրատ։ Վերջում, նախկին բուշտի տեղում առկա մաշկը զգուշությամբ օծեք նրբաքսուքով և ծածկեք ստերիլ անձեռոցիկով։

Բշտերի կանխարգելումը

Ձեր ոտնաթաթերի վրա շփումից առաջացող բշտերի առաջացումը կանխարգելելու համար հագեք այնպիսի կոշիկներ, որոնք լավագույնս համապատասխանում են և հարմար են ձեր ոտքերին: Օգտակար կարող են լինել նաև խոնավությունը ներծծող գուլպաները։ Փորձեք տարբեր գուլպաներ, կոշիկներ կամ միջատակեր (стелька), որոնք պատրաստված են հատուկ բշերի առաջացումը նվազեցնելու համար: Կարող եք նաև ձեր կոշիկների որոշ տեղերում, ներքին մակերեսին հարմարեցնել կպչուն սպեղանի այնպես, որ նվազի ոտնաթաթի շփաբորբը:

Եթե կատարում եք գյուղատնտեսական, այգեգործական կամ որևէ այլ աշխատանք, պաշտպանիչ ձեռնոցը կարող է կանխարգելել ձեռքերի վրա բշտերի առաջացումը: