Առաջին օգնության հավաքածու - Առաջին օգնություն

Լավ դասավորած և պատշաճ պահեստավորած առաջին օգնության հավաքածուն թույլ է տալիս, որ անհետաձգելի իրավիճակներում առանց ուշացնելու ցուցաբերեք առաջին օգնություն:

Իհարկե, նաև ցանկալի կլինի, որ, եթե բուժաշխատող չեք, ունենաք առաջին օգնություն ցուցաբերելու որոշակի գիտելիքներ, ինչպես նաև տիրապետեք նախաբժշկական օգնության տարրական հմտություններին:

Դուք նաև կարող եք դեղատնից գնել առաջին բուժօգնության պատրաստի հավաքածու: Կամ կարող եք գնել միայն դեղարկղիկ կամ՝ հարմարավետ փոքր պայուսակ և ձեր հավաքածուն կոկիկ և կազմակերպված հավաքեք դրա մեջ:

Առաջին օգնության հավաքածուի պարունակությունը

Ձեր առաջին օգնության հավաքածուն կարող է պարունակել այնպիսի նյութեր և պարագաներ, որոնց անհրաժեշտությունը հավանաբար կծագի մաշկի ամբողջականության խախտման (կտրած, ծակած վերքեր և այլն) կամ այլ վնասվածքների ժամանակ։

Օրինակ, դուք կարող եք ձեր դեղարկղիկում ունենալ՝

• տարբեր լայնության բինտեր՝ ստերիլ և ոչ ստերիլ
• մաշկի հիպոալերգիկ կպչուն ժապավեններ
• վերքերը փակող տարբեր չափի կպչուն ժապավեններ կամ սպեղանիներ
• տարբեր չափսի բինտային տամպոններ և թանզիֆներ (օրինակ՝ 10x10 սմ, 7,5x10 սմ) և ստերիլ վիրակապական նյութեր
• բամբակյա խծուծներ
• ալկոհոլային հիպոալերգիկ
• բետադինի լուծույթ
• միջին չափսի պողպատե մկրատ
• մեկանգամյա օգտագործման ձեռնոցներ (ստերիլ և ոչ ստերիլ)
• գամասեղ
• նոթատետր և գրիչ կամ մատիտ
• ստերիլ ֆիզլուծույթ (ֆլակոն կամ սրվակ)
• ախտանահող և հակաքորային քսուք
• օճառ կամ ձեռքերի ախտահարման գել
• սառեցնող տոպրակներ (սառցապարկ)
• թվային ջերմաչափ
• լարան (ժգուտ)։

Կախված այն հանգամանքից, թե առաջնային ինչ նպատակի համար եք պահում ձեր հավաքածուն, վերջինիս կազմությունը կարող է որոշակի փոփոխություններ կրել։ Օրինակ, երեխաների հավաքածուի համար կարող եք նախատեսել նաև մանկական օգտագործման սովորական ցավազրկողներ։ Նույն կերպ կարելի է ձեր հավաքածուի մեջ նախատեսել հակաալերգիկ, ասթմայի նոպան հանող և այլ ոլորտի նպատակային դեղեր, միջոցներ ու պարագաներ։

Կարևոր է նաև վիրակապման, վերքերի նախաբժշկական մշակման, վերջույթների անշարժացման և համանման տարրական հմտություններին տիրապետելը։

Որտե՞ղ պահել առաջին օգնության դեղարկղը

Պահեք ձեր առաջին օգնության հավաքածուն անվտանգ, չոր և բոլորի (բայց ոչ՝ երեխաների) համար հասանելի տեղում։ Համոզվեք, որ տան բոլոր անդամները գիտեն հավաքածուի տեղը։ Նույնը վերաբերվում է ավտոմեքենայի մեջ պահվող դեղարկղիկին կամ պայուսակին։

Ինչպե՞ս պահպանել առաջին օգնության հավաքածուն

Ձեր հավաքածուն ցանկացած պահին օգտագործման համար պատրաստի վիճակում պահելու համար՝

• հնարավորինս շուտ փոխարինեք օգտագործված պարագաները
• տարին առնվազն 1-2 անգամ ստուգեք հավաքածուի կազմը և պարագաների վիճակն ու պիտանելիության ժամկետները։