Ծակած վերքեր - Առաջին օգնություն

Ծակած վերքը, օրինակ՝ առաջացած մեխի վրա կանգնելուց կամ ասեղի ծակոցից, սովորաբար չի առաջացնում ուժեղ արյունահոսություն:

Սակայն այս վերքերը հաճախ խորն են և կարող են դառնալ վարակի պատճառ:

Ծակած վերքերի դեպքում հետևեք այս խորհուրդներին:

• Լվացեք ձեր ձեռքերը. սա օգնում է վարակի վաղ կանխարգելմանը:
• Դադարեցրեք արյունահոսությունը. մաքուր թանզիֆով կամ բինտով զգուշությամբ սեղմեք արյունահոսող կետը:
• Մաքրեք վերքը. ողողեք կամ լվացեք վերքը հոսող մաքուր ջրով 5-10 րոպեի ընթացքում: Եթե վերքի մեջ առկա է կեղտի կամ աղտոտության մնացուկ, մաքուր թանզիֆով փորձեք զգուշությամբ հեռացնել այն: Այցելեք ձեր բժշկին, եթե չի հաջողվում հեռացնել վերքի մեջ առկա ամբողջ կեղտը:
• Օգտագործեք տեղային հակաբիոտիկ. ձեր բժշկի խորհրդով ծակած վերքը պատեք հակաբիոտիկային նրբաքսուքի (կրեմ) կամ քսուքի բարակ շերտով: Առաջին երկու օրն ամեն անգամ վիրակապը փոխելիս լվացեք վերքը և վերջում քսեք հակաբիոտիկային նրբաքսուք կամ քսուք:
• Փակեք վերքը. վիրակապը կամ թանզիֆը օգնում են վերքային մակերեսի մաքուր մնալուն:
• Կանոնավոր փոխեք վիրակապը. փոխեք վիրակապն ամեն օր կամ ցանկացած դեպքում, երբ վերջինս խոնավանում, թացանում կամ կեղտոտվում է:
• Հսկեք վարակի նշանները. այցելեք ձեր բժշկին, եթե վերքը չի լավանում կամ նկատում եք կարմրության տարածում, ցավի սաստկացում, թարախային արտադրություն, այտուցվածություն կամ ջերմություն:

Ե՞րբ դիմել անհետաձգելի բուժօգնության

Դիմեք անհետաձգելի բուժօգնության, եթե՝

• մի քանի րոպե ուղիղ սեղմելուց հետո արյունահոսությունն, այնուամենայնիվ, շարունակվում է
• վերքն առաջացել է կենդանու կամ մարդու խայթոցից
• վերքը խորն է և կեղտոտ
• վերքն առաջացել է մետաղական (առավել ևս՝ հողոտ կամ ժանգոտ) սուր առարկայից
• վերքը խորն է և տեղակայված է գլխի, պարանոցի, փոշտի, կրծքավանդակի կամ որովայնի շրջանում
• վերքը հոդի վրա է և կարող է լինել խորը:

Եթե տուժած անձը վերջին 5 տարվա ընթացքում չի ստացել փայտացման (տետանուս) դեմ պատվաստում, իսկ վերքը խոր կամ կեղտոտված է, բժիշկը կարող է ձեռնարկել անհրաժեշտ միջոցառումներ, օրինակ՝ առաջին 48 ժամվա ընթացքում փայտացման դեմ պատվաստանյութի ներարկում:

Եթե վերքն առաջացել է կատվի կամ շան խայթոցից, փորձեք հաստատել, որ դրանց կատաղության պատվաստումը ժամկետային է: Վայրի կենդանու խայթոցի դեպքում խորհուրդ հարցրեք ձեր բժշկից, թե արդյոք տվյալ կենդանին կատաղության նկատմամբ բարձր ռիսկային է: