Օտար մարմին աչքում - Առաջին օգնություն

Աչքում պատահաբար հայտնված օտար մարմինը տհաճ զգացողությունից ու ցավից բացի կարող է առաջացնել այլ հետևանքներ ու բարդություններ ևս, ընդհում մինչև՝ տեսողության կորուստ:

Ինչպե՞ս օգնել ինքդ քեզ

• Օճառաջրով լավ լվացեք և չորացրեք ձեր ձեռքերը:
• Եթե կրում եք կոնտակտային լիզաներ, ապա ժամանակավորապես հանեք դրանք: Երբեմն օտար մարմինը կարող է ֆիքսվել լինզայի մակերևույթի վրա:
• Փորձեք հեռացնել օտար մարմինը գոլ մաքուր ջրով ողողելով բաց աչքը կամ օգտագործեք մաքուր գոլ աչքի կաթիլներ:
• Աչքը ողողելու մեկ այլ տարբերակ է դեմքով դեպի վեր ցնցուղի տակ կանգնելը և փորձել աչքերը թարթելը:

Ինչպե՞ս օգնել մեկ այլ տուժածին

• Օճառաջրով լավ լվացեք և չորացրեք ձեր ձեռքերը:
• Նստացրեք նրան լավ լուսավորված որևէ սենյակում:
• Զգուշությամբ զննեք աչքը և փորձեք հայտնաբերել օտար մարմինը: Ստորին կոպն իջեցրեք ներքև և խնդրեք նրան նայել դեպի վեր: Նույն կերպ վերին կոպը բարձրացրեք քիչ վերև և խնդրեք նրան նայել դեպի ներքև:
• Եթե օտար մարմինը «լողում է» արցունքի մեջ, փորձեք օգտագործել մաքուր գոլ աչքի կաթիլներ՝ հեռացնելու այն: Կամ խնդրեք գլուխը ետ տարածել և լվացեք աչքի մակերևույթը մաքուր գոլ ջրով:

Զգուշացեք

• Մի՛ փորձեք ինքնուրույն հեռացնել ակնագնդում «մխրճված» օտար մարմինները:
• Մի՛ տրորեք աչքը:
• Մի՛ փորձեք ինքնուրույն հեռացնել աչքում խոր թափանցած կամ կոպերի արանքում անշարժացած մեծ առարկաները:

Երբ որոնել անհետաձգելի բուժօգնություն

Անհապաղ դիմեք անհետաձգելի բուժօգնության կամ զանգեք 1-03 և կանչեք շտապբուժօգնություն, եթե՝

• աչքի սովորական լվացմամբ չի հաջողվում հեռացնել օտար մարմինը
• օտար մարմինը խոր «մխրճված» է ակնագնդի մեջ
• ի հայտ է եկել տեսողության խանգարում կամ կորուստ
• օտար մարմինը հեռացնելուց հետո ավելի քան 24 ժամ պահպանվում են ցավերը, աչքի կարմրությունը կամ օտար մարմնի զգացողությունը:

Հիշեք, որ երբեմն օտար մարմինը կարող է քերծել աչքի եղջերաթաղանթը: Սա հաճախ դրսևորվում է աչքում օտար մարմնի առկայության զգացողության հետ (նույնիսկ այն հեռացնելուց հետո): Նման զգացողությունը կարող է երբեմն պահպանվել մինչև 24 ժամ կամ ավելի երկար:

Իմացե՛ք ավելին աչքում օտար մարմնի պատճառների և առողջական հետևանքների մասին: