Գաստրոսկոպիա

4 րոպե

Գաստրոսկոպիան կերակրափողի, ստամոքսի և 12-մատնյա աղու էնդոսկոպիկ հետազոտությունն է:

Ելնելով նրանից, որ գաստրոսկոպիան սովորաբար ներառում է ոչ թե միայն ստամոքսի, այլև կերակրափողի և 12-մատնյա աղու զննումը, էնդոսկոպիայի այս մեթոդն անվանում են նաև ավելի երկար՝ էզոֆագո-գաստրո-դուոդենոսկոպիա:

Ի՞նչ է գաստրոսկոպիան

Գաստրոսկոպն իրենից ներկայացնում է ազատ ծայրում փոքրիկ լույսի աղբյուր և տեսախցիկ ունեցող բարակ ճկուն խողովակ (էնդոսկոպ), որը բժիշկը ձեր բերանի միջոցով զգուշությամբ կերակրափողի միջով ներհրում է մինչև ստամոքս և բարակ աղիների սկզբնական մաս՝ 12-մատնյա աղի՝ ընթացքում այս օրգանները զննելով ներսից:

Բժիշկը դիտումը կատարում է կամ էնդոսկոպի մյուս ծայրին տեղադրված օկուլյարից կամ էլ էկրանի (մոնիտորի) վրա:

Ինչո՞ւ է նշանակվում գաստրոսկոպիան

Գաստրոսկոպիան սովորաբար նշանակվում է մարսողական խողովակի վերին մասերի հետ կապված հիվանդություններն ախտորոշելիս: Այս հիվանդությունները սովորաբար ընթանում են սրտխառնոցով, փսխումներով, կլման դժվարություններով և այլն: Գաստրոսկոպիան թույլ է տալիս հասկանալ, թե վերոնշյալ և այլ ախտանիշներն կապված են արդյոք հետազոտվող օրգանների բորբոքման, խոցի (ստամոքս, 12-մատնյա աղի), պոլիպի և այլ գերաճի, ինչպես նաև քաղցկեղի հետ:

Երբեմն գաստրոսկոպիան նշանակվում է նաև բուժման նպատակով: Օրինակ, այս հետազոտության միջոցով ձեր բժիշկը կարող է փորձել դադարեցնել խոցային արյունահոսությունը, լայնացնել նեղացած կերակրափողը, հեռացնել պոլիպները կամ մարսողական խողովակում հայտնված օտար մարմինները և այլն: Բժիշկը նաև կարող է հետազոտվող օրգաններից վերցնել փոքրիկ նմուշ՝ այլ հետազոտությունների համար (բիոպսիա):

Ինչպե՞ս նախապատրաստվել գաստրոսկոպիային

Գաստրոսկոպիայի հետազոտությանն անհրաժեշտ է ներկայանալ դատարկ ստամոքսով, ինչը կնվազեցնի հետազոտությանն ուղեկցող փսխումները և բժշկի տեսադաշտը կմնա բաց: Դուք պետք է գաստրոսկոպիայի կաբինետ այցելեք՝ վերջին անգամ սնունդ և ջուր ընդունելուց առնվազն 6-8 ժամ հետո:

Դուք պետք է նաև բժշկի հետ խորհրդակցեք, թե ձեր կանոնավոր դեղերից որոնք կարելի է ընդունել կամ որ հաբերի խմելը պետք է հետաձգվի: Ձեր բժշկին տեղեկացրեք նաև, եթե ունեք ալերգիա կամ այլ զուգակցող հիվանդություններ:

Ինչպե՞ս է ընթանում գաստրոսկոպիան

Գաստրոսկոպիայից 15-30 րոպե առաջ ձեզ կտան թույլ հանգստացնող դեղ: Այս ընթացքում կարող եք զգալ մեղմ քնկոտություն կամ գլխապտույտ:

Բուն հետազոտության ժամանակ կարող եք զգալ, թե ինչպես է բժիշկը ձեր ստամոքսի խոռոչն օդ ներփչում (որի նպատակը ստամոքսի պատերը միմյանցից հեռացնելն է և դիտման տեսադաշտը բացելը): Կամ, գուցե հանգստացնող դեղերի շնորհիվ այս միջամտությունից որևէ մանրամասնություն չհիշել:

Գաստրոսկոպիայից հետո

Գաստրոսկոպիայից հետո սովորաբար սնունդ և ջուր ընդունելը թույլատրվում է, սակայն խորհուրդ չի տրվում, որ ավտոմեքենա վարեք, ալկոհոլ օգտագործեք կամ տուն վերադառնաք առանց ուղեկցողի:

Սովորաբար մեկ օրվա ընթացքում գաստրոսկոպիայի «մնացորդային» գանգատները վերանում են:

Արդյոք գաստրոսկոպիան անվտա՞նգ է

Գաստրոսկոպիան անվտանգ միջոցառում է և լուրջ բարդությունները խիստ հազվադեպ են հանդիպում:

Գաստրոսկոպիայի բարդություններն ավելի շատ կապված են էնդոսկոպիայի միջոցով կատարվող վիրահատական միջամտությունների հետ, օրինակ՝ պոլիպների հեռացում կամ բիոպսիա։ Նման դեպքերում արյունատար անոթի պատահական վնասումը կարող է արյունահոսության պատճառ դառնալ:

Եթե գաստրոսկոպիայից հետո ձեզ մոտ ի հայտ է գալիս ջերմության բարձրացում, ուժեղացող ցավ և այլ գանգատներ, տեղեկացրեք այդ մասին ձեր բժշկին կամ պարզապես այցելեք մոտակա հիվանդանոց: