Skip to main content

Բարձր արյան ճնշման կառավարում -

Մարդկանց շուրջ մեկ երրորդն ունի բարձր արյան ճնշում։ Նրանց մեծ մասը 60-ն անց է, բայց շատերը նաև ավելի երիտասարդ են։

Դուք կարող եք լինել նրանցից մեկը։

Չափեք ձեր արյան ճնշումը

Բարձր արյան ճնշումը կամ հիպերտենզիան (գերճնշում) չափազանց տարածված վիճակ է, որը պարտադիր չէ, որ առաջացնի որևէ ախտանիշ։ Միակ ձևը, որ իմանանք, թե արդյոք մեր արյան ճնշումը նորմայից բարձր է, թե ոչ, զարկերակային ճնշումը չափելն է։

Զարկերակային ճնշումը չափելը պարզ և անցավ, մեկ-երկու րոպե տևող հետազոտություն է, որը կարող են իրականացնել բոլոր բուժաշխատողները և դուք ինքներդ, եթե տիրապետում եք տոնոմետրից օգտվելու և ճիշտ չափելու տեխնիկային:

Բարձր արյան ճնշումը բարձրացնում է սրտամկանի ինֆարկտի կամ ինսուլտի ռիսկը, ուստի բժիշկները չեն կարող անտարբեր լինել, եթե ձեզ մոտ հայտնաբերում են հիպերտենզիա: Բժիշկների նշանակումներից բացի, կան բաներ, որոնք կարող եք անել դուք ինքներդ՝ կարգավորելու ձեր արյան ճնշումը և բարելավելու առողջական վիճակը։

Պահեք ձեր ճնշումը առողջ թվերի վրա

Առողջ ապրելակերպի հիմքը կազմող միջոցառումները կարող են մեծապես օգնել, որ կարողանաք ձեր արյան ճնշումը պահել նորմալ միջակայքում։

Ֆիզիկական ակտիվություն

Տարբեր ուղեցույցներում խորհուրդ է տրվում շաբաթական առնվազն 5 օր և յուրաքանչյուր օր առնվազն 30 րոպե լինել չափավոր ծանրաբեռնվածությամբ ֆիզիկապես ակտիվ։ Խոսքը միայն արհեստական և հոգնեցուցիչ ֆիզիկական վարժանքների մասին չէ։ Դուք կարող եք պարզապես զբոսնել, պարել, հեծանիվ վարել, լողալ և այլն։ Եթե մինչ օրս նստակյաց կյանք եք վարել, ֆիզիկական ակտիվության 30 րոպե/օր ցուցանիշին պետք չէ հասնել միանգամից՝ մեկ օրվա ընթացքում։ Եթե միջին ծանրաբեռնվածությամբ 30 ֆիզիկական ակտիվության 30 րոպեն ձեզ համար շատ է թվում, բաժանեք այն մասերի, օրինակ՝ 3 անգամ 10-ական րոպեների։

Եթե ունեք առողջական խնդիրներ, ֆիզիկական ակտիվացման հետ կապված հարցերով զրուցեք ձեր բժշկի հետ։

Առողջ սննդակարգ

Առողջ սննդակարգն իր հերթին կարող է նվազեցնել ձեր բարձր արյան ճնշումը։ Ահա որոշ խորհուրդներ՝

  • յուրաքանչյուր օր սննդակարգում ներառեք հետևյալ հինգ խմբերում ներառված սննդամթերքները՝
    • տարբեր տեսակի և գույնի բանջարեղեններ և լոբազգիներ
    • մրգեր
    • ամբողջահատիկ ցորենից պատրաստված մթերքներ
    • անճարպ միս և ձկնեղեն, ձու, ընկուզեղեն, ոլոռ և այլն
    • ցածր յուղանյության կաթ, յոգուրտ, պանիր և դրանց այլընտրանքները
  • խմեք մեծ քանակության ջուր
  • սահմանափակեք հագեցած ճարպերով, լրացուցիչ կերակրի աղով և շաքարով հարուստ մթերքները և ալկոհոլի օգտագործումը։

Կրճատեք կերակրի աղի (նատրիումի) ընդունումը

Ուղեցույցներով խորհուրդ է տրվում օրվա ընթացքում օգտագործել ոչ ավելի, քան 6 գրամ աղ, որը համարժեք է մոտ մեկ թեյի գդալ կերակրի աղին։

Սննդի մեջ աղի սահմանափակման առաջին հեշտ միջոցն անալի կերակուրներ և ճաշ պատրաստելն է։ Հաջորդը ճաշելիս, մինչև սննդամթերքին ավտոմատ սեղանի աղ ավելացնելը, կերակուրի համը փորձելն է։ Երբ մթերքներ եք գնում, ընտրեք այնպիսի տեսակներ, որոնց 100 գրամը պարունակում է 120 մգ-ից պակաս աղ։

Ազատվեք ավելորդ քաշից

Ֆիզիկապես ակտիվ առօրյան և առողջ սննդակարգը կօգնեն ավելորդ կիլոգրամներից ազատվելու գործին։ Գիրությունը մեծացնում է բարձր արյան ճնշման ռիսկը, ուստի շատ կարևոր է, որ մարմնի քաշը հասցնեք առողջ միջակայք։ Սա նշանակում է, որ պետք է ֆիզիկապես ավելի ակտիվ լինեք, քան առողջ մարդիկ։ Ուստի, առողջ նիհարելու համար անհրաժեշտ կինի օրական ոչ թե 30, այլ 45-60 րոպեանոց միջին ծանրաբեռնվածության ֆիզիկական ակտիվ միջոցառումներ։

Սահմանափակեք ալկոհոլի օգտագործումը

Նախ, դուք պետք է իմանաք ալկոհոլի ստանդատ չափին համապատասխանող ոգելից խմիչքների համարժեք քանակները։ Ալկոհոլի առողջ օգտագործումը նախատեսում է, որ՝

  • առողջ չափահաս տղամարդիկ և կանայք օրվա մեջ ոչ ավելի, քան 2 ստանդատ չափաբաժին ալկոհոլ օգտագործելով նվազեցնում են ալկոհոլի օգտագործման հետ կապված կյանքի ընթացքում ձեռք բերվող հիվանդությունների և վնասվածքների ռիսկը
  • մեկ առիթի սահմաններում ոչ ավելի քան 4 ստանդատ չափաբաժին ալկոհոլ օգտագործելով նվազում է այդ առիթի հետևանքով օգտագործման հետ կապված վնասվածքների ռիսկը։
Գարեջուր, 4,8% ալկ.285 մլ ռեստորանային բաժակը հավասար է 1,1 «ստանդարտ» չափին
Կարմիր գինի, 13% ալկ.150 մլ ռեստորանային գավաթը հավասար է 1,5 «ստանդարտ» չափին
Սպիտակ գինի, 11,5% ալկ.150 մլ ռեստորանային գավաթը հավասար է 1,4 «ստանդարտ» չափին
Շոմպայն, 12% ալկ.150 մլ ռեստորանային գավաթը հավասար է 1,4 «ստանդարտ» չափին
Թունդ խմիչք, 40% ալկ.30 մլ ռեստորանային բաժակը հավասար է 1 «ստանդարտ» չափին

Դադարեցրեք ծխելը

Ծխախոտի ծխում առկա նիկոտինը կարող է ժամանակավորապես բարձրացնել արյան ճնշումը, իսկ ծխելն ինքնին՝ ավելացնել սրտային հիվանության ռիսկը։ Ուստի, դադարեցնելով ծխելը նվազեցնում եք այս ռիսկը, որը բարձր ճնշման պայմաններում ստանում է առանձնահատուկ կարևորություն։

Բարձր արյան ճնշման դեղորայքային բուժումը

Որոշ դեպքերում անհրաժեշտություն է առաջանում ապրելակերպի առողջացման հետ միասին օգտագործել արյան ճնշումը նվազեցնող՝ հակահիպերտենզիվ կամ հակագերճնշումային դեղեր։ Շատ կարևոր է, որ այդ դեղամիջոցները նշանակվեն ձեր բժշկի կողմից, իսկ դուք ձեր նշանակումներին հետևեք ամենայն լրջությամբ և պատասխանատվությամբ։ Անպայման ձեր բժշկից ճշտեք դեղամիջոցները խմելու ռեժիմը, իսկ եթե այլ դեղեր եք ընդունում՝ տեղեկացրեք նրան այդ մասին։

Որոշ դեպքերում ճնշման դեղերից բացի ձեր բժիշկը կարող է նշանակել նաև այլ դեղեր՝ ուղղված սրտանոթային ռիսկի այլ ռիսկի գործոնների ազդեցության մեղմացմանը (օրինակ՝ արյան խոլեսթերինի մակարդակի կարգավորում), ինչպես նաև ուղեկցող առողջական խնդիրների բարելավմանը (օրինակ՝ սրտի իշեմիկ հիվանդության բուժում):

Հոդվածը հրապարակվել է՝ 24-04-2018
Վերջին վերանայում՝ 06-04-2024