Երիկամային ցավ - Ախտանիշներ

Երիկամների շրջանի ցավը կարող է առաջանալ առողջական տարբեր խնդիրների ժամանակ:

Սա նշանակում է, որ այս շրջանի ցավերի առկայության դեպքում պետք է դիմել ձեր բժշկին, որ հայտնաբերվի ցավի ճիշտ պատճառը: Երիկամային ցավերը կարող են ի հայտ գալ պիելոնեֆրիտի (երիկամների վարակ), երիկամների կամ միզուղիների քարի կամ երիկամների հետ կապ չունեցող այլ հիվանդությունների ժամանակ:

Ի՞նչ է երիկամային ցավը

Երիկամների շրջանի ցավը (ռենալ ցավ) տեղակայվում է ձեր գոտկատեղից քիչ վերև (կողերից ներքև)՝ աջ կամ ձախ կողմում: Երիկամային ցավը կարող է տարածվել այլ շրջաններ, օրինակ՝ ճառագայթվել դեպի աճուկներ, որովայն կամ ցավի հակառակ կողմը:

Երիկամային ցավի պատճառները

Երիկամներից մեզը միզածորանով արտահոսում է ներքև և կուտակվում միզապարկում, որտեղից միզելու ընթացքում միզուկի միջոցով հեռանում է օրգանիզմից: Միզուղիների այս դատարկող (դրենաժային) ուղու ցանկացած հատվածի խնդիրը կարող է առաջացնել ցավ, օրինակ՝

• քարեր
• երիկամների վարակային բորբոքում (պիելոնեֆրիտ)
• այլ տեսակի երիկամային հիվանդություններ:

Մկանային ծագման մեջքի ցավերը սովորաբար տեղակայվում են գոտկատեղում, իսկ երիկամային ցավերն ավելի բարձր դիրքում են (անմիջապես կողերից ներքև) և ավելի խոր ընկած: Ի տարբերություն մկանացավերի, երիկամային ցավերը սովորաբար ուղեկցվում են ջերմությամբ, փսխումներով և միզարձակման ցավոտությամբ, որը կոչվում է դիզուրիա:

Երիկամների շրջանի ցավերը կարող են առաջանալ նաև այլ՝ արտաերիկամային պատճառներից, օրինակ՝

• ողնաշարի կամ կողերի հետ կապված խնդիրներ
• մկանային ցավեր
• թոքաբորբ, երբ ընդգրկված է նաև թոքամիզը (պլևրա)
• փայծաղի կամ լյարդի հիվանդություններ
• միջողնային սկավառակի ճողվածք:

Երիկամային ցավի ախտորոշումը

Երիկամային ցավն ախտորոշելիս բժիշկը կզրուցի ձեզ հետ, կզննի ձեզ, որից հետո կարող է նշանակել որոշ հետազոտություններ, ինչպիսիք են՝

• արյան և մեզի թեստեր
• գերձայնային հետազոտություն (սոնոգրաֆիա):

Դժվար ախտորոշվող դեպքերում բժիշկը կարող է ձեզ առաջարկել նաև համակարգչային տոմոգրաֆիա (ԿՏ):

Երիկամային ցավի բուժումը

Երիկամային ցավի բուժումը կախված է առաջացման պատճառից, ցավի ուժգնությունից և ձեր ինքնազգացողությունից:

Մեղմ և չափավոր ցավերը կարող են մեղմանալ սովորական ցավամոքիչ դեղերով, օրինակ՝ Պարացետամոլով:

Եթե կարծում եք, որ ցավերի պատճառը երիկամային հիվանդությունն է, դիմեք ձեր բժշկին: Դիմեք ձեր բժշկին նաև բոլոր այն դեպքերում, երբ ձեր մեջքի ցավերն ուղեկցվում են թվարկված նշաններից մեկնումեկով՝

• մեզի գույնի փոփոխություններ, արյունամիզություն կամ ցավոտ միզարձակում
• անհապաղ միզելու մշտական զգացողություն
• ջերմություն
• մեզում ավազահատիկի (երիկամային մանր քար) առկայություն
• ինքնազգացողության վատացում: