Ծննդաբերության բարդությունները

Ծննդաբերության բարդությունները
Անգլերեն անվանումը՝ Labor complications

Նույնիսկ հղիության հարթ ընթացքի և ծննդաբերությանը պատշաճ նախապատրաստվելու պարագայում ծննդաբերության ընթացքում կարող են առաջանալ չնախատեսված խնդիրներ ու բարդություններ։

Ծննդաբերության դանդաղ զարգացում

Ձեր բժիշկը կամ մանկաբարձուհին կարող են ձեզ տեղեկացնել, թե ինչպիսի արագությամբ է ձեր ծննդաբերությունն ընթանում՝ ստուգելով, թե ինչ չափով է արգանդի պարանոցը բացվել և ինչ տեմպերով է երեխան ծննդուղիներով դեպի ներքև տեղաշարժվում։ Եթե պարանոցի բացումը դանդաղել է կամ ճիգերը թուլացել կամ դադարել են, ապա նրանք կարող են տեղեկացնել, որ ձեր ծննդաբերությունը չի զարգանում և առաջարկել հետևյալ միջոցները՝

  • փոխել ձեր դիրքը և ընդունել ձեզ համար ավելի հարմարավետ դիրք
  • քայլել սենյակում, որը կօգնի ճիգերի վերականգնմանը և երեխայի առաջխաղացմանը
  • ընդունել տաք լոգանք կամ ցնցուղ
  • մեղմ մերսել մեջքը և ուսագոտին
  • պառկել, հանգստանալ և վերականգնել ուժերը
  • մի փոքր սնվել կամ հեղուկներ ընդունել։

Եթե, այնուամենայնիվ, ձեր ծննդաբերությունը առաջ չի գնում, ձեզ կարող են ներարկել դեղեր, որ ճիգերը դառնան ավելի արդյունավետ։ Եթե դուք հոգնել եք կամ ձեզ լավ չեք զգում, տեղեկացրեք այդ մասին բժշկին կամ մանկաբարձուհուն։

Երբ պտուղն անսովոր դիրքում է

Ծննդաբերությունների գերիշխող մեծամասնության ժամանակ առաջինը ծնվում է երեխայի գլուխը։ Հակառակ դեպքում կարող են առաջ գալ ծննդաբերության ընթացքի և երեխայի ծնվելու հետ կապված որոշակի բարդություններ։

Հետույքային առաջադրություն

Սա այն իրավիճակն է, երբ առաջինը ծնվում են երեխայի հետույքը կամ ոտքերը։ Պտուղը ծնվելիս ստանում է հետույքային առաջադրություն, եթե հղիության ընթացքում (սովորաբար մինչև 34-րդ շաբաթը) արգանդում չի շրջվում գլխով դեպի ներքև։

Հետույքային առաջադրությունն ինքնին վտանգավոր չէ, սակայն կարող է բարդացնել ծննդաբերության ընթացքը, օրինակ՝ բերել պտղի թթվածնաքաղցի կամ ծննդաբերական վնասվածքների: Այդ պատճառով հետույքային առաջադրության դեպքում սովորաբար ծննդկանին առաջարկվում է կեսարյան հատում:

Բազմապտուղ հղիություն

Եթե ձեր հղիությունը բազմապտուղ է և դուք սպասում եք երկվորյակ կամ ավելի շատ երեխաներ, ապա ավելի հավանական է, որ ձեր ծննդաբերությունը լինի վաղաժամ։ Եթե նորածինները ծնվում են անհաս (փոքր կշռով), ապա նրանք հատուկ խնամքի և հսկողության կարիք են ունենում։

Բազմապտուղ հղիության ծննդաբերությունների համար լավագույն տարբերակն այն է, երբ պտուղները լինում են ճիշտ դիքով (գլխային առաջադրություն): Նման դեպքում, առավել ևս, եթե ծննդաբերությունը վաղաժամ չէ, բնական (ֆիզիոլոգիական) ծննդաբերությունը կարող է անցնել հարթ։

Այնուամենայնիվ, բնական ծննդաբերությունը կարող է բարդանալ տարբեր իրավիճակներով, օրինակ՝ ընկերքի (կամ ընկերքների) վաղաժամ շերտազատում, երկրորդ երեխայի ծնվելու ուշացում և այլն։ Այս և այլ բարդությունների ժամանակ ծննդաբերության գործընթացին կարող են միջամտել բժիշկները և իրականացնեն անհրաժեշտ գործողություններ, օրինակ՝ վակուում էքստակցիա, մանկաբարձական աքցանների միջոցով երեխայի դուրս բերում և այլն։

Բազմապտուղ հղիության ծննդաբերության ժամանակ ակնկալվող բոլոր վտանգները ու ռիսկերը հաշվի առնելով ձեզ կարող են առաջարկել նաև կեսարյան հատում։

Հետծննդյան (հետծննդաբերական) արյունահոսություն

Հետծննդյան արյունահոսությունը (ՀԾԱ) երեխայի ծնվելուց հետո հազվադեպ զարգացող բարդություն է։

Ծննդաբերության ընթացքում որոշ քանակով արյան կորուստը համարվում է նորմալ։ Հակառակ սրան, ՀԾԱ ծննդաբերությունից հետո հեշտոցային առատ արյունահոսությունն է։

Կախված այն հանգամանքից, թե երբ է տեղի ունենում արյունահոսությունը, տարբերում են ՀԾԱ երկու տեսակ՝

  • առաջնային կամ վաղ, երբ արյունահոսությունը տեղի է ունենում ծննդաբերությանը հաջորդող 24 ժամվա ընթացքում
  • երկրորդային կամ ուշացած, երբ այն տեղի է ունենում ծննդաբերությանը հաջորդող 24 ժամօց հետո՝ մինչև 5 շաբաթվա ընթացքում։

Հեշտ հիշվելու համար ՀԾԱ պատճառները ներկայացվում են որպես 4T։

  • Tonus (70%). ծննդաբերությունից հետո արգանդի վատ կծկողունակություն (տոնուս), որի բժշկական անվանումն է «արգանդի ատոնիա» (տոնուսի բացակայություն) կամ «արգանդի հիպոտոնիա» (տոնուսի թուլացում)։
  • Trauma (20%). ծննդաբերական ուղիների վնասվածքներ, օրինակ՝ արգանդի, պարանոցի, հեշտոցի կամ շեքի վնասվածքներ, արգանդի պատռվածք կամ արտաշրջում և այլն։
  • Tissue (10%). արգանդի խոռոչում մնացորդային հյուսվածք՝ ընկերք (պլացենտա) (կոչվում է նաև՝ «ընկերքային մնացորդներ»), մակարդուկներ կամ պտղաթաղանթներ կամ ոչ նորմալ պլացենտա։
  • Thrombin (<1%). արյունահոսություն՝ կապված արյան մակարդելիության շեղումների հետ։

Կախված ՀԾԱ պատճառից, ձեզ կնշանակեն համապատասխան բուժում կամ միջամտություններ։

ՀԾԱ կարող է առաջացնել մի շարք բարդություններ, ինչը նշանակում է, որ դուք կարող եք ծննդատանը մնալ նախատեսվածից ավելի երկար։

Ընկերքային մնացորդներ

Հազվադեպ երեխայի ծնվելուց հետո ընկերքն արգանդում չի շերտազատվում և դուրս չի գալիս։ Նման դեպքում արգանդում մնացած ընկերքը հատուկ միջոցներով հեռացնում է բժիշկը։

Հոդվածը վերանայվել է՝ 12-05-2019