Լաբիրինթիտ - Քիթ-կոկորդ-ականջ

Լաբիրինթիտը ներքին ականջում (կամ լաբիրինթ) հավասարակշռության կենտրոնի՝ անդաստակային ապարատի բորբոքումն է:

Այն սովորաբար պատճառվում է որևէ վարակով: Ախտանիշներից են լսողության կորուստը, պտտման զգացողությունը (վերտիգո) և գլխապտույտը: Լաբիրինթիտով բազմաթիվ մարդկանց ինքնազգացողությունը բարելավվում է մի քանի շաբաթվա ընթացքում:

Լաբիրինթիտի պատճառները

Լաբիրինթիտի ամենահաճախ հանդիպող պատճառը վիրուսային վարակն է, օրինակ՝ մրսածություն կամ գրիպ կամ հերպեսի խմբի վիրուսներ, որոնք առաջացնում են ջրծաղիկ, գոտևորող հերպես կամ հասարակ հերպես: Երբեմն լաբիրինթիտի կարող է բերել ականջի վարակը:

Ավելի հազվադեպ, լաբիրինթիտ կարող են առաջացնել բակտերիալ վարակները, օրինակ՝ մենինգիտ կամ միջին ականջի վարակ (միջին օտիտ): Որոշ աուտոիմուն հիվանդություններ, ալերգիաներ և դեղեր նույնպես կարող են բերել լաբիրինթիտի:

Լաբիրինթիտի ախտանիշները

Լաբիրինթիտով բազմաթիվ մարդիկ գանգատվում են սենյակն իրենց շուրջը պտտվելու զգացողությունից: Սա գլխապտույտի առանձնահատուկ տեսակ է, որը հայտնի է նաև որպես վերտիգո: Վերտիգոն կարող է լինել թույլ կամ այնքան անտանելի, որ դժվարանաք անկողնուց վեր կենալ:

Այլ հնարավոր ախտանիշներից են՝

• սրտխառնոց, որը գրեթե միանման է ծովային հիվանդությանը
• շրջապատի առարկաների շարժման կեղծ զգացողություն
• աչքերի անկառավարելի շարժումներ
• հավասարակշռության խանգարում
• ջերմություն
• ականջացավ
• փսխում
• լսողության կորուստ կամ աղմուկ (զնգոց կամ տինիտուս)
• ականջից հեղուկ կամ թարախային արտադրություն
• տեսողության խանգարումներ, օրինակ՝ մշուշոտ տեսողություն:

Լաբրինթիտի ախտորոշումը

Եթե կարծում եք, որ ունեք լաբիրինթիտ, պետք է այցելեք բժշկին, ով իր հերթին կարող է ուղեգրել ականջաբանի խորհրդատվության:

Ձեզ կարող են առաջարկել հետևյալ ստուգումները և հետազոտությունները՝

• խնդրել, որ դուք արագ շարժեք ձեր գլուխը
• լսողության ստուգում
• տեսողության ստուգում
• արյան ճնշման ստուգում
• հավասարակշռության ստուգում:

Բժիշկը կարող է առաջարկել նաև այլ հետազոտություններ, օրինակ՝

• էլեկտրոէնցեֆալոգրաֆիա (ԷԷԳ կամ էլեկտրաուղեղագիր)
• համակարգչային տոմոգրաֆիա (ԿՏ)
• մագնիսա-ռեզոնանսային տոմոգրաֆիա (ՄՌՏ):

Լաբրինթիտի բուժումը

Լաբիրինթիտի ոչ բոլոր դեպքերն են, որ պահանջում են բուժում:

Որոշ դեպքերում բժիշկը կարող է նշանակել դեղամիջոցներեր, օրինակ՝

• կորտիկոստերոիդներ, որ մեղմացվի միջին ականջի բորբոքումը
• ծանր վերտիգոյի դեպքում՝ հավասարակշռության կենտրոնը ճնշող դեղեր (վեստիբուլյար սուպրեսանտներ)
• սրտխառնոցի կամ փսխման դեպքում՝ հակափսխեցուցիչ դեղեր:

Եթե ախտանիշները չեն վերանում, բժիշկը կարող է նշանակել ֆիզիոթերապիա, որն օգնում է գլխուղեղի կողմից միջին ականջից ստացվող հավասարակշռության ազդանիշների ճիշտ վերլուծությանը:

Դուք կարող եք նաև օգնել գանգատների մեղմացմանը հետևյալ միջոցներով՝

• գլխապտույտի նոպայի ժամանակ պառկեք կողքի վրա
• խուսափեք ալկոհոլից
• շատ ջուր խմեք
• ստեղծեք անաղմուկ և հանդարտ միջավայր
• խուսափեք վառ լույսերից: