Ոտքի խոցեր -

Ոտքի վրա առաջացող խոցերը խոր վերքեր են, որոնք հաճախ երկարատև ժամանակ չեն լավանում:

Ոտքի խոցերը բավականին տարածված են, հատկապես բարձր տարիքով մարդկանց շրջանում: Եթե ձեր ստորին վերջույթներից մեկնումեկի կամ երկուսի վրա առաջացել են խոցեր, առանց հետաձգելու այցելեք ձեր բժշկին:

Ի՞նչ են ոտքի խոցերը

Ոտքի խոցերը, որոնց երբեմն անվանում են նաև ոտքի երակային խոցեր, ոչ այլ ինչ են, քան չլավացող խոր վերքեր: Ի տարբերություն քերծվածքի, խոցի ժամանակ վնասվում է մաշկի ողջ հաստությունը, իսկ ախտահարումը կարող է խորանալ դեպի մաշկի տակ ընկած փափուկ հյուսվածքներ:

Խոցերի լավացումը տևական գործընթաց է և կարող է շարունակվել շաբաթներ կամ ամիսներ: Խոցի ապաքինման հետաձգումը սովորաբար պայմանավորված է ախտահարված վերջույթի արյան շրջանառության խանգարմամբ: Լավանալուց հետո խոցը գրեթե միշտ թողնում է սպիական հետք: Ցավոք, ոտքի խոցերը հաճախ կրկնվում են:

Ոտքի խոցերի առաջացման պատճառները

Ոտքի վրա խոցի առաջացման ամենահաճախ հանդիպող պատճառը ստորին վերջույթում բարձր արյան ճնշումն է, որը կարող է պատճառվել երակային հիվանդություններով, արյան մակարդուկով (թրոմբ) կամ վարիկոզ երակներով: Նման դեպքերում արյան հունից դուրս եկած հեղուկը կուտակվում է փափուկ հյուսվածքներում՝ ի վերջո պատռելով մաշկը և հոսելով դուրս:

Խոցերի առաջացման այլ պատճառներից են՝

• զարկերակների խցանում
• ծայրամասային անոթային հիվանդություն
• որոշ մաշկային հիվանդություններ
• քաղցկեղ
• ոտքի վնասվածք
• վարակային բորբոքում:

Ոտքի խոցն ավելի հաճախ հանդիպում է մեծ տարիքով մարդկանց շրջանում: Ոտքի խոցի առաջացման ռիսկը բարձրանում է նաև դիաբետով, բարձր արյան ճնշմամբ, ավելորդ քաշով կամ ծխող մարդկանց շրջանում:

Ոտքի խոցերի ախտանիշները

Ոտքի խոցի հիմնական ախտանիշը ձեր ստորին վերջույթներից մեկի կամ երկուսի վրա չլավացող խոր վերքն է: Որոշ դեպքերում խոցի հատակը կարող է ծածկվել տհաճ հոտով հեղուկով կամ խոցից կարող է արտադրվել նմանատիպ հեղուկ («թաց խոց»): Այլ դեպքերում խոցը պատվում է հաստ շագանակագույն կեղևով («չոր խոց»), որը հաճախակի բացվում է:

Երբեմն ոտքի խոցը կարող վարակվել: Նման դեպքերում ի հայտ են գալիս հետևյալ ախտանիշները՝

• խոցի հարակից մաշկի և փափուկ հյուսվածքների այտուցվածություն
• սաստկացող ցավեր
• թարախային արտադրություն
• ջերմություն:

Այցելեք ձեր բժշկին, եթե կարծում եք, որ ձեր ոտքի խոցը բարդացել է որևէ բակտերիալ վարակով:

Ոտքի խոցերի բուժումը

Բժիշկը կզննի ձեզ և առանձնահատուկ ուշադրություն կդարձնի ձեր ոտքերին առկա խոցերին, որպեսզի պարզի դրանց տեսակն ու հնարավոր պատճառը: Հազվադեպ, բժիշկը կարող է խոցի հատակից կատարել նմուշառում և ուղարկել մանրէաբանական հետազոտության:

Կախված տեսակից, խոցը կարող է փակվել ստերիլ վիրակապական միջոցներով: Բժիշկը կարող է նաև դնել սեղմող վիրակապ կամ առաջարկել սեղմող գուլպա:

Ոտքերի բարձր դիրքը կարող է նվազեցնել երակային ճնշումը և օգնել խոցի լավացմանը:

Խոցի վարակման դեպքում ձեզ կարող է նշանակվել նաև որևէ հակաբիոտիկ (սովորաբար՝ տեղային քսուք կամ, ավելի ծանր դեպքերում, հաբ կամ ներարկում):

Բժիշկը նաև կարող է հատուկ բուժում նշանակել, եթե խոցի պատճառը որևէ լուրջ կամ քրոնիկ հիվանդություն է: Որոշ դեպքերում ձեզ կարող են առաջարկել նաև վիրահատական կամ երկարատև դեղորայքային բուժում:

Ինքնօգնություն և կանխարգելում

Ոտքի խոցերը հաճախ ունեն կրկնվելու հակում: Եթե ձեր ոտքերին առաջացել են խոցեր կամ ցանկանում եք կանխարգելել հավանական խոցերի առաջացումը, ապա դուք կարող եք՝

• հրաժարվել ծխախոտից
• ազատվել ավելորդ քաշից
• եթե ունեք բարձր արյան ճնշում կամ դիաբետ, խստորեն հետևել բժշկի նշանակած բուժմանը
• հագնել սեղմող գուլպա
• օրվա ընթացքում ոտքերին հնարավորինս երկար ժամանակ բարձր դիրք տալ
• կանոնավոր կերպով վարժանքներ անել: