Գրադարան
Հետաքրքրությունների կորուստը հաղթահարելու ուղիներ
2 րոպե
Եթե զգում եք նախկինում ձեզ հաճույք պատճառող գործերից հետաքրքրության կորուստ, նման վիճակը կարող է ձեր կյանքը դարձնել անհրապույր, տխուր և միօրինակ:
Ոչ հազվադեպ հետաքրքրություններից կորուստն ուղեկցվում է դեպրեսիայի նշաններով: Դուք կարող եք նաև զգալ մեկուսացում, որը կարող է բարձրացնել անհանգստության և տագնապի նկատմամբ հակումը:
Հետաքրքրությունների կորստի հաղթահարման արդյունավետ մոտեցումներ
Կան ձեր շարժառիթները (մոտիվացիա) վերականգնելու տարբեր մեթոդներ: Ձեզ ենք ներկայացնում դրանցից ամենաարդյունավետները:
- Զրուցեք ձեր բժշկի հետ մասնագիտական օգնության նպատակահարմարության մասին (օրինակ՝ խորհրդատու կամ հոգեբան):
- Դարձեք ֆիզիկապես ակտիվ. ֆիզիկական ակտիվ առօրյան կարող է օգնել ձեր տրամադրության բարելավմանը և թուլացնել ալարկոտության և հոգնածության զգացումները:
- Փորձեք որոշ վարժանքներ. հանրահայտ օրինակներից են՝ արագ քայլք, լող կամ շնչառությունն ու արյան շրջանառությունը խթանող այլ վարժանքներ:
- Մի՛ հրաժարվեք սննդից. հակառակը, սնունդ ընդունեք կանոնավոր կերպով: Դարձրեք ձեր սնունդն առողջ՝ մրգերով ու բանջարեղեններով հարուստ:
- Աշխատեք քունը դարձնել բավարար՝ ինչպես տևողությամբ, այնպես էլ որակով. կան մի շարք միջոցներ, որոնք կարող են օգնել առողջ քնի սովորույթի ձևավորմանն ու ամրապնդմանը: Զրուցեք այս մասին ձեր բժշկի հետ:
- Փորձեք զբաղվել ստեղծագործ աշխատանքներով՝ նկարչություն, ձեռագործ աշխատանք և այլն, որոնք կարող են օգնել ձեր ուղեղն անհանգստացնող մտքերի ցրմանը:
- Խուսափեք ձեզ անհանգստացնող վիճակի դրդապատճառներից (տրիգերներ). oրինակներից են՝ աշխատանքային գերլարվածությունը, ընտանիքին ու ընկերներին քիչ ժամանակ հատկացնելը, փողի ու եկամուտների խնդրով ուղեղը մշտապես ծանրաբեռնված պահելը և այլն: Փորձեք ժամանակ գտնել՝ թուլացման մեթոդներով ձեր հոգեկան լարվածությունը թուլացնելու համար:
- Գործերն արեք հաճույքով. ավելի շատ ժամանակ տրամադրեք ձեր ընտանիքին ու ընկերներին, ըստ հնարավորության փորձեք զբաղվել այգեգործությամբ, երեկոյան ժամերին փորձեք պարզապես զբոսնել մոտակա այգում: Պարզապես զբաղվեք ձեզ հաճույք պատճառող գործերով:
- Ձեռք մեկնեք օգնության կարիք զգացող մարդկանց, օրինակ՝ մեծ տարիքով անձինք, հաշմանդամ բարեկամներ կամ հարևաններ և այլն:
- Պլանավորեք ձեր օրվա ռեժիմը, որը թույլ կտա, որ ձեր ապրելակերպը դառնա կարգավորված և ակտիվ: Օրինակ՝ հստակեցրեք, թե օրվա որ ժամերին եք զբաղվելու վարժանքներով և ֆիզիկական այլ գործերով, երբ եք դուրս գալու մաքուր օդի և այլն:
- Նախատեսեք ձեզ վերաբերվող հատուկ գործեր կամ խնդիրներ և հետևեք, որպեսզի դրանք ավարտին հասցնեք այնպես, ինչպես պլանավորել եք: Օրինակներից են՝ տանն անձնական իրերի կարգի բերելը, որևէ աշխատանք ավարտին հասցնելը և այլն: Զբաղվածությունը և խնդիրներ լուծելը թույլ է տալիս ստանալ դրական լիցքեր:
- Մոտ ապագայի համար նախատեսեք որոշ գործեր կամ խնդիրների լուծում: Աշխատեք, որ դրանք լինեն իրատեսական:
- Բաց եղեք ձեր ընտանիքի և ընկերների առջև. տեղեկացրեք նրանց ձեր խնդիրների մասին, որ ակնկալեք ձեր հետաքրքրությունների վերգտման խնդրի լուծման մեջ նրանց օժանդակությունը:
- Եղեք համբերատար, բայց՝ կայուն. մի՛ փորձեք ամեն ինչի պատասխանը ստանալ մեկ օրվա ընթացքում: Սակայն ձեր նպատակներին հասեք անդրդվելի ու կայուն ձևով՝ առանց ավելորդ հիասթափությունների: Ձեզ համար սահմանեք միայն իրատեսական խնդիրներ: Հիշեք, որ միշտ չէ, որ ձեր խնդիրները կարող են հեշտությամբ լուծվել, ուստի պատրաստ եղեք նաև անհաջողությունների հանդիպելուն՝ առանց ավելորդ հույզերի, բայց և՝ ավելի ամրապնդված:
Հոդվածը տեղադրվել է՝ 20-06-2019 վերանայվել է՝ 15-04-2023
Հեղինակ
Հեղինակային բոլոր իրավունքները պատկանում են Մեդեքսին։
Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:
