Գրադարան

ՄԴՄԱ (էքստազի) և հոգեկան առողջություն

ՄԴՄԱ (էքստազի) և հոգեկան առողջություն

Time Read 2 րոպե

ՄԴՄԱ-ն ապօրինի թմրամիջոց է, որը կուլ տալուց հետո զարգացնում է էյֆորիկ «վերելքի» զգացողություն:

Այնուամենայնիվ, ՄԴՄԱ-ն ունի լուրջ կողմնակի ազդեցություններ, հատկապես, երբ շրջակա միջավայրը շոգ կամ տոթ է: Երկարատև օգտագործումը կարող է առաջացնել ծանր դեպրեսիա և հիշողության խնդիրներ:

ՄԴՄԱ-ն հանդիսանում է հաբերի տեսքով սև շուկայում առաջարկվող էքստազի ապօրինի թմրամիջոցի հիմնական բաղադրիչը: Վերջինս կարող է ունենալ ՄԴՄԱ-ի տարբեր քանակներ, սակայն չի բացառվում, որ ընդհանրապես ՄԴՄԱ չպարունակի:

ՄԴՄԱ-ի ազդեցությունները

ՄԴՄԱ-ն սկսում է ազդել կուլ տալուն հաջորդող 20 րոպեների ընթացքում: Որոշ մարդկանց մոտ զարգանում են ցնորքներ (հալյուցինացիա), գերքրտնոտություն, ծնոտի ձգված վիճակ և ատամների սեղմում, ինչպես նաև դող (տրեմոր):

Մարդիկ կարող են գերտաքանալ կամ ջրազրկվել, եթե ՄԴՄԱ օգտագործեն շոգ կամ տոթ պայմաններում: Մեծ քանակով ջուր խմելը կարող է վտանգավոր լինել, ուստի խորհուրդ է տրվում դուրս գալ մաքուր օդի և ջուրն ընդունել փոքր չափաբաժիններով:

Իմացե՛ք ավելին ժամանցային թմրամիջոցների մասին։

Հոգեկան առողջության խնդիրներ

Կանոնավոր կերպով ՄԴՄԱ օգտագործող մարդկանց մոտ զարգանում են երկարաժամկետ խանգարումներ՝ հույզերի կառավարման անկարողություն, հիշողության և ուշադրության կենտրոնացման հետ կապված խնդիրներ, անձի խանգարումներ և ծանր դեպրեսիա:

Հոգեկան առողջության խնդիրներ ունեցող մարդկանց մոտ ՄԴՄԱ-ն կարող է ավելի վատթարացնել ինքնազգացողությունը:

Եթե դուք ստանում եք հակադեպրեսանտներ և ընդունում եք ՄԴՄԱ, կարող են զարգանալ գլխապտույտ, անհանգստություն կամ ալկոհոլային հարբածությանը նմանվող այլ նշաններ: Նման դեպքերում կարող է առաջանալ նաև սերոտոնինային համախտանիշ կամ թունավորում, որը պատճառվում է գլխուղեղում սերոտոնինի չափից մեծ շատացմամբ: ՄԴՄԱ և հակադեպրեսանտների վտանգավոր զուգակցումը կամ գերդոզավորումն առաջացնում են հոգեշարժական գրգռվածություն (աժիտացիա), շփոթվածություն, մարմնի ջերմաստիճանի խիստ բարձրացում, հնարավոր կոմա և մահ:

ՄԴՄԱ-ի երկարատև օգտագործումից հետո զրկանքն ուղեկցվում է դեպրեսիայով, դյուրագրգռությամբ, անհանգստությամբ և տագնապով, ինչպես նաև պարանոյայով: Նման դեպքերում զարգանում են նաև քնի և ուշադրության կենտրոնացման խնդիրներ: Կարող է զարգանալ նաև խումհարի ազդեցություն, երբ օգտագործումից հետո օրեր շարունակ տանջող է դառնում ծանր դեպրեսիան:

ՄԴՄԱ-ից զրկանքը

ՄԴՄԱ-ի տևական օգտագործումն առաջացնում է կախվածություն: Զրկանքի ախտանիշները կարող են ներառել՝ անքնություն, տագնապ, աժիտացիա և անհանգստություն, ինչպես նաև ուշադրության կենտրոնացման անկարողություն:

Հոդվածը տեղադրվել է՝ 24-05-2019 վերանայվել է՝ 26-03-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով