Հոգեկան վիճակ - Հղիություն

Ինչպես կարևոր է հղիության ընթացքում ձեր ֆիզիկական կամ մարմնական առողջությանը հետևելը, նույնքան կարևոր է նաև ձեր հոգեկան բարվոք վիճակը պահպանելը:

Եթե հոգեպես լավ եք զգում, ուրեմն ունեք լավագույն մեկնարկային վիճակը, որ հաջողությամբ անցկացնեք հղիության և ապագա ծննդաբերության հետ կապված ձեր կյանքի մեծ փոփոխությունները:

Ինչպե՞ս է հղիությունը ազդում ձեր հոգեկան առողջության և բարվոք վիճակի

Երեխա ունենալուն նախապատրաստվելը ձեր կյանքի ամենասպասված, սակայն և ամենադժվարին փորձություններից մեկն է: Ուստի մի զարմացեք, երբ այս շրջանում զգաք ձեր հուզական վիճակի տարաբնույթ փոփոխություններ:

Երբ տեղեկանում եք, որ հղի եք և սկսում եք ձեր 9-ամսյա «ուղևորությունը», ձեզ մոտ կարող են առաջ գալ որոշակի վախեր և անհանգստություններ: Սա նորմալ է այնքան ժամանակ, քանի դեռ կարողանում եք վերահսկել ձեր զգացմունքներն ու հույզերը: Բազմաթիվ կանանց համար հղիությանը սթրեսով լի ժամանակաշրջան է, հատկապես, եթե դա իրենց կյանքում տեղի է ունենում առաջին անգամ:

Հղիությունն ինքնին մեծ սթրեսի աղբյուր է: Հորմոնային և ֆիզիկական փոփոխություններին հարմարվելուց բացի դուք կարող եք լրացուցիչ լարվածություն ունենալ, երբ սպասում եք հղիության (անտենատալ) թեստերի պատասխաններին, հատկապես, եթե նախկինում ունեցել եք անհաջող հղիություն, ինչպիսին է ինքնաբուխ վիժումը:

Այս և այլ պատճառներով, հղիությունը կարող է բարձրացնել հոգեկան առողջության տարբեր խնդիրների զարգացման հավանականությունը:

Հղիության ընթացքում հոգեկան առողջության և բարվոքության խնդիրները

Հղիության ընթացքում, որը նաև կոչվում է նաև նախածննդյան կամ անտենատալ շրջան, ինչպես նաև ծննդաբերությունից հետո, որը նաև կոչվում է հետծննդյան կամ պոստնատալ շրջան, և՛ կանայք և՛ նրանց զուգընկերները կարող են առնչվել հոգեկան առողջության հետ կապված տարբեր խնդիրների հետ:

Որոշ մարդկանց մոտ կնոջ հղիությունը կարող է բերել հոգեկան որոշ հիվանդությունների առաջացման, ինչպիսիք են՝

• դեպրեսիա
• տագնապ
• բիպոլյար խանգարում (ավելի հազվադեպ):

Ավելի քան 10 կնոջից 1-ի և 20 տղամարդուց 1-ի մոտ կարող է զարգանալ նախածննդյան դեպրեսիա: Նախածննդյան անհանգստությունը նույնպես տարածված է, և բազմաթիվ մարդիկ միաժամանակ ունեն ինչպես տագնապ, այնպես էլ դեպրեսիա:

Որոշ գործոններ կարող են բարձրացնել հղիության ընթացքում տագնապի և դեպրեսիայի զարգացման ռիսկը, օրինակ՝

• ձեր հոգեկան առողջության հետ կապված նախկին խնդիրներ
• բավարար աջակցություն չստանալու զգացում
• հոգեկան ծանր ժամանակաշրջաններ, օրինակ՝ փոխհարաբերությունների խզում
• անցյալում կամ ներկայում վատ վերաբերմունքին, բռնությանը կամ բուլիինգին արժանանալը
• ալկոհոլի կամ ապօրինի թմրամիջոցների հետ կապված խնդիրներ:

Հոգեկան առողջության խնդիր կարող է առաջանալ ցանկացած մարդու մոտ, ուստի այստեղ ամաչելու կամ ինքնամեղադրման որևէ պատճառ չկա:

Ե՞րբ է պետք դիմել օգնության

Հղիության ընթացքում պետք է հետևել ոչ միայն ֆիզիկական, այլև՝ հոգեկան առողջությանը: Ուստի, ձեր արյան ճնշումից, մաշկային կամ այլ փոփոխություններից բացի նաև ուշադրություն դարձրեք ձեր հոգեկան վիճակին և բարվոքությանը: Փորձեք հասկանալ, թե կան արդյոք նշաններ, որոնք կարող են հուշել հոգեկան որևէ խնդրի առկայության մասին:

Հղիության ընթացքում կարող է դիտարկվել ձեր հոգեկան գործունեության վերելքներ և անկումներ, սակայն դիմեք ձեր բժշկին կամ նրա խորհրդով՝ հոգեկան առողջության ոլորտի մասնագետին, եթե՝

• մշտապես վատ ինքնազգացողություն ունեք, օրինակ՝ տխուր կամ անհանգստացած եք, որը տևում է ավելի երկար, քան երկու շաբաթ
• բացասական մտքերը և զգացումները սկսել են ազդել ձեր նորմալ գործունեության ունակության վրա
• ձեզ մոտ ի հայտ են եկել դեպրեսիայի նշաններ, օրինակ՝ կորցրել եք նախկին հետաքրքրությունը, ձեզ զգում եք անօգնական և հիասթափված, չեք կարողանում հաղթահարել ձեր վատ տրամադրությունը
• ժամանակի մեծ մասը զգում եք անհանգստություն կամ տագնապած եք
• սկսել եք ունենալ խուճապի նոպաներ կամ ձեզ մոտ ի հայտ են եկել կպչուն-սևեռուն վարքագծեր:

Հոգեկան բարվոքության կառավարման հմտություններ

Կան տարբեր միջոցներ, որոնք կարող են օգնել հղիության ընթացքում ձեր հոգեկան առողջությունը և բարվոքությունը պահպանելուն:

• Մի՛ ակնկալեք ձեզնից ավելի շատ, քան կարող եք: Եղեք իրատեսական: Հանգստացեք, երբ դրա կարիքը զգում եք:
• Փորձեք հղիության ընթացքում ձեր կյանքում մեծ փոփոխություններ չանել, օրինակ՝ բնակարանի փոփոխություն, անցում նոր աշխատանքի և այլն, քանի դեռ ստիպված եք գնալ այսպիսի քայլի:
• Մնացեք ֆիզիկապես ակտիվ: Զրուցեք այս թեմայով ձեր բժշկի հետ, որ ընտրեք ձեր հղիության ժամկետին առավել համապատասխանող վարժանքներ:
• Սնվեք կանոնավոր և ընտրեք առողջ կերակուրներ:
• Խուսափեք սթրեսն ալկոհոլի կամ թմրամիջոցների միջոցով հաղթահարելուց:
• Կապ հաստատեք այլ հղի կանանց հետ և փորձեք ստեղծել փոխօգնության հարաբերություններ:
• Ընդունեք ձեզ առաջարկվող օժանդակությունը: Խնդրեք օժանդակություն, եթե դրա կարիքն ունենք: