Հղիության թեստ - Արդյո՞ք հղի եմ

Եթե կարծում եք, որ հղի եք, կարող եք ձեր հղիությունը հաստատել կամ ժխտել՝ օգտվելով հղիության հայտնաբերման լաբորատոր թեստից:

Հղիության թեստը հղիության առկայության (կամ բացակայության) որոշումն է լաբորատոր թեստի միջոցով:

Ինչպե՞ս է թեստը որոշում ձեր հղիությունը

Հղիության թեստի էությունը մեզի կամ արյան մեջ մարդու խորիոնային գոնադոտրոպին կոչվող հորմոնի որոշումն է (ՄԽԳ, hCG, ռուսերեն՝ ХГЧ):

Այս հորմոնը արտադրվում է հղիության ընթացքում և կարող է հայտնաբերվել ձվաբջջի բեղմնավորումից արդեն իսկ 10 օր հետո, երբ բեղմնավորված ձվաբջիջն ամրանում է արգանդի պատին: Ըստ որում, hCG հորմոնը նախ հայտնվում է արյան եջ, որից հետո միայն՝ մեզում:

Եթե ձեր արյան կամ մեզի մեջ հայտնաբերվում է hCG, շատ հավանական է, որ դուք հղի եք:

Հղիության թեստը տնային պայմաններում

Դեղատներում վաճառվում են մեզի թեստով հղիության որոշման ստրիպներ, որոնց նպատակը մեզի մեջ hCG հորմոնի հայտնաբերումն է:

Տարբեր արտադրողների հղիության ստրիպները կարող են ունենալ որոշ առանձնահատկություններ, ուստի ճիշտ կլինի ուշադիր ծանոթանալ տուփում առկա տեղեկատվական թեթիկին: Սակայն, ընդհանուր առմամբ, այդ ստրիպներով հղիության փաստը արձանագրվում է՝ ելնելով գունային կամ գծային ցուցանիշներից։ Կան նաև թվային (digital) ստրիպներ, որոնք հետազոտության արդյունքի ընթերցելը դարձնում են առավել հեշտացված:

Որոշ արտադրողներ պնդում են, որ իրենց արտադրանքը հղիությունը փաստը որոշում է 99% ճշտությամբ։ Սա ոչ միշտ կարող է ճշգրիտ լինել, և մի՛ մոռացեք, որ դուք կարող եք լինել թեստի սխալմունքի 1%-ի մեջ:

Նաև իմացեք, որ ինչպես բոլոր լաբորատոր թեստերը, հղիության ստրիպը նույնպես կարող է տալ «կեղծ-դրական» (երբ թեստը դրական պատասխան է տալիս հղիության բացակայության պայմաններում) կամ «կեղծ-բացասական» պատասխաններ (երբ փաստացի հղիության պայմաններում ստանում եք բացասական արդյունք):

Հղիության թեստի արդյունքներն ավելի հավաստի դարձնելու համար խորհուրդ է տրվում համբերել ակնկալվող դաշտանից մինչև մեկ շաբաթ։ Նաև կարելի է թեստն անցկացնել առավոտյան մեզում, որում hCG հորմոնի մակարդակն ամենաբարձրն է:

Ցանկացած՝ դրական կամ բացասական պատասխանի դեպքում թեստը կարելի է կրկնել մի քանի օր անց և արդյունքները քննարկել ձեր բժշկի հետ։

Հղիության լաբորատոր որոշում

Հղիության լաբորատոր հայտնաբերումն ավելի զգայուն և ճշգրիտ արդյունքներ է տալիս, քան վերևում նկարագրված մեզի ստրիպը: Այս թեստով ոչ միայն որոշվում է արյան մեջ hCG հորմոնի առկայությունը, այլև չափվում է դրա մակարդակը:

ՄԽԳ-ի վերաբերյալ մանրակրկիտ տեղեկատվություն ստանալու համար առաջարկում ենք այցելել Մեդեքս-Lab բաժինը: