Թեստերի մասին հարցեր - Հղիության հսկողություն

Հղիության ընթացքում ձեզ կարող են առաջարկել տարբեր լաբորատոր թեստեր և գործիքային հետազոտություններ:

Դրանց նպատակն է ստուգել ձեր և ձեր չծնված երեխայի առողջությունը: Սակայն, երբեմն հետազոտությունները կարող են լինել մեծաքանակ, ճնշող կամ շփոթեցնող:

Կարևոր է հիշել, որ ձեր բժիշկը կամ բուժքույրը զբաղվում են ձեր նախածննդյան հսկողությամբ միայն մեկ նպատակի համար՝ աջակցել, որ ձեր հղիությունը և ծննդաբերությունն անցնեն առավել հարթ, ինչպես նաև ժամանակին հայտնաբերեն և բուժեն ի հայտ եկած խնդիրները: Ուստի, երբեք մի՛ ամաչեք կամ երկմտեք և համարձակորեն դիմեք նրանց, եթե ունեք առողջության, հղիության կամ ապագա ծննդաբերության վերաբերյալ որևէ հարց:

Հիշեք նաև, որ վերջնական որոշում կայացնողը միայն դուք եք՝ անցնե՞լ ձեզ առաջարկվող լաբորատոր և գործիքային հետազոտությունները, թե՞ ոչ: Սակայն նաև մի մոռացեք, որ ճիշտ որոշում կայացնելու համար պետք է բավարար տեղեկացված լինեք: Ուստի, բժշկին տեղին հարցեր տալն ավելի, քան խրախուսելի է: Լավագույն տարբերակն այն է, որ որոշում կայացնեք ձեր բժշկի հետ միասին:

Մինչև ձեր բժշկին այցելելը, ճիշտ կլինի կատարել որոշակի նշումներ, որպեսզի նրա կաբինետում որևէ հարց բաց չթողնեք կամ չմոռանաք:

Ահա հետազոտությունների վերաբերյալ որոշ հարցերի օրինակներ:

• Արդյոք այս լաբորատոր կամ գործիքային հետազոտությունը նշանակվել է որպես հղիության ստանդարտ ստուգո՞ւմ, թե՞ իմ պարագայում սա լրացուցիչ հետազոտություն է:
• Ո՞րն է այս հետազոտությունն անցնելու անհրաժեշտությունը: Ի՞նչ կտա այն ինձ և իմ երեխային:
• Ե՞րբ պետք է անցնեմ այն:
• Ե՞րբ կտրամադրվի պատասխանը:
• Հետազոտությունն ի՞նձ է անհրաժեշտ, թե՞ իմ երեխային:
• Ինչպե՞ս է անցկացվելու հետազոտությունը:
• Կա՞ն որևէ կողմնակի ազդեցություններ և ռիսկեր (վտանգներ)՝ ինձ համար և իմ երեխայի համար:
• Խոսքը վճարովի՞, թե՞ ապահովագրական ընկերության կողմից փոխհատուցվող կամ պետական պատվերի շրջանակներում հետազոտության մասին է:
• Արդյոք պե՞տք է նախապատրաստվել: Ինչպե՞ս:
• Սա մեկանգամյա հետազոտությո՞ւն է, թե՞ պետք է կրկնակի հետազոտվել: