Հարցեր, որոնք դուք պետք է տաք մինչև վիրահատվելը

Հարցեր, որոնք դուք պետք է տաք մինչև վիրահատվելը
Անգլերեն անվանումը՝ Questions to Ask Before Surgery

Վիրահատվե՞լ, թե՞ ոչ. այս հարցը կարող է օրերից մի օր «ծանրացնել» ձեզնից յուրաքանչյուրի ուղեղը։

Անկախ նրանից, թե ով և ինչ խորհուրդ է ձեզ տալիս, վիրահատության ենթարկվելու հարցում վերջնական որոշողը դուք եք։ Սակայն, ձեր որոշումը ճիշտ՝ իրազեկված և գիտակցված լինելու համար դուք կարիք ունեք ստանալու այլ՝ ավելի «մանր» հարցերի պատասխաններ։

Ձեզ անհրաժեշտ որոշ տվյալներ կարող եք որոնել ու գտնել տարբեր աղբյուրներից, օրինակ՝ մեր կայքից, սակայն երբեք մի անտեսեք ձեր բժշկի հետ առանձնազրույցը։

Դուք իրավունք ունեք իմանալու ձեզ վերագրվող ախտորոշման կամ հիվանդության և ձեզ առաջարկվող վիրահատական միջամտության մասին ամեն-ամեն ինչ, ցանկացած նրբություն և մանրամասնություն, իսկ վիրահատող բժիշկը պարտավոր է բոլոր հարցերին տալ ձեզ հասկանալի պատասխաններ։

Իմացեք նաև, որ այս սկզբունքը գործում ոչ միայն վիրահատական, այլ ախտորոշիչ կամ բուժիչ ցանկացած միջոցառման կամ միջամտության համար։

Եթե վիրահատվեմ, կօգնի՞ արդյոք դա ինձ

Շատ կարևոր է իմանալը, թե կոնկրետ ինչո՞ւ է ձեզ առաջարկվում վիրահատություն և ինչպե՞ս այդ վիրահատությունը կօգնի ձեզ։ Օրինակ, եթե խոսքը ձեր ոտքի վրա կատարվող վիրահատության մասին է, դուք կարող եք ձեր բժշկին կամ վիրաբույժին հարցնել, թե՝

  • արյդոք կթեթեևանա՞ն կամ կվերանա՞ն ձեր այդ ոտքի ցավերը
  • արդյոք կհեշտանա՞ ձեր քայլելը։

Անպայման հստակեցրեք վիրահատության օգուտները։ Հարցրեք, թե ինչա՞ն երկար ձեզ ներկայացվող արդյունքը կգործի, կամ այդ օգուտը կլինի ժամանակավո՞ր (որից հետո ձեր խնդիրը դարձյալ առաջին պլան կմղվի) թե՞ վերջնական։ Եթե խոսքը վիրահատության ժամանակավոր արդյունքների մասին է, ապա ինչքա՞ն երկար կպահպանվեն լավ արդյունքները, ինչի՞ց է դա կախված և ինչպե՞ս դուք կկարողանաք վիրահատությունից հետո երկարացնել «լավ» շրջանը։

Չմոռանաք ճշտել հաջող կամ բարվոք արդյունքների հավանականության մասին։ Դուք կարող եք նաև ձեր հարցերը ձևակերպել «թվերի» միջոցով, օրինակ՝

  • Այս վիրահատությունը կրած 100 մարդուց քանիսի՞ մոտ է հաջող արդյունք ստացվել։

Ինչպիսի՞ ռիսկեր ունի վիրահատությունը

Չկա զրո ռիսկով վիրահատություն։ Եվ, ընդհանրապես, չկա զրոյական ռիսկով որևէ բժշկական միջամտություն։

Վիրահատական ռիսկը կարող է կապված լինել տարբեր հանգամանքների հետ՝ առաջին հերթին անզգայացման մեթոդի և բուն վիրահատության հետ։ Վիրահատական բուժումն ինքնին կարող է ունենալ տարբեր տարատեսակներ՝ յուրաքանչյուրն իր «օգուտ-վնաս» փոխհարաբերակցությամբ։

Դուք կարող եք հարցնել ձեր վիրաբույժին այն մասին, թե՝

  • ի՞նչ ռիսկեր ու բարդություններ կարող են լինել
  • 100 մարդու (կամ ենթադրյալ 100 մարդու) մոտ կատարված այս վիրահատությամբ քանիսի՞ մոտ կարող են ռիսկեր ու բարդություններ առաջանալ։

Բժիշկը կարող է և չմանրամասնել, թե ինչ է նշանակում «ռիսկը» կամ ինչ վիճակներ են կազմում «բարդությունները»։ Դրանք մնայո՞ւն են, թե՞ ժամանակավոր։ Կարիք ունե՞ն լրացուցիչ բուժման և ծախսերի, թե՞ ինքնուրույն անհետանալու են։ Հարցրեք այս մասին ձեր բժշկին և մանրամասնեք-բաղդադեք ձեր հարցը, որ ձեզ մոտ որևէ «մութ բան» չմնա։

Դուք ունե՞ք այս վիրահատությունը կատարելու բավարար փորձ

Բոլոր վիրաբույժներն էլ իրենց աշխատանքային փորձը կուտակում են՝ սկսելով առաջին փորձից։ Եթե դուք ձեր վիրաբույժի առաջին վիրահատվող հիվանդն եք, դուք պետք է իմանաք այդ մասին։ Այս առումով, նաև վիրահատող բժշկի մասնագիտական փորձը ճշտելու համար դուք կարող եք ձեր ապագա վիրաբույժին հարցնել՝

  • քանի՞ անգամ է մինչ օրս կոնկրետ այս վիրահատությունը նա կատարել
  • ինչպիսի՞ արդյունքներ է նա ստացել՝ կատարելով ... վիրահատություն։

Կա՞ն արդյոք ավելի հասարակ ու անվտանգ եղանակներ

Որոշ հիվանդություններ ինքնուրույն լավանում են։ Որոշ հիվանդություններ էլ կարող են ինքնուրույն «նահանջել» կամ բարելավվել ոչ վիրահատական միջոցներով, օրինակ՝ սննդակարգի փոփոխություն, ֆիզիոթերապիա կամ դեղեր։ Ուստի, երբեք սխալված չեք լինի, եթե հարցնեք ձեր բժշկին և վիրաբույժին այն մասին, թե՝

  • կա՞ն արդյոք առաջարկվող վիրահատությանը այլընտրանքներ
  • ի՞նչ կլինի, եթե վիրահատության փոխարեն ընտրեք այդ այլընտրանքներից մեկնումեկը
  • իսկ ի՞նչ կլինի, եթե որևէ բան չանեք։

Ի՞նչ ծախսեր կպահանջվեն

Ինչպես վիրահատությունը, այնպես էլ հետվիրահատական շրջանը ծախսատար են։ Չմոռանանք, որ դուք այս շրջանում կտրվում եք ձեր աշխատանքից և գուցե՝ եկամտի աղբյուրից։ Դուք կարող եք հարցնել վիրաբույժին այն մասին թե՝

  • ինչպիսի՞ ծախսերի հետ է կապաված վիրահատական բուժումը՝ բուն վիրահատությունը, առանձին միջամտությունները, հետվիրահատական պալատը և բոլոր մյուս այն ծառայությունները, որոնցից դուք պետք է օգտվեք
  • եթե դուք առողջության ապահովագրություն ունեք, ապա արդյոք այն կծածկի՞ բոլոր ծախսերը, թե՞ որոշակի վճար դուք ինքներդ պետք է կատարեք
  • ինչքա՞ն ժամանակ կտևի հետվիրահատական շրջանը և ե՞րբ կկարողանաք աշխատանքի անցնել։

Վիրաբույժի ընտրությունը

Ինչ խոսք, վիրաբույժ ընտրելը դժվար գործ է։ Դուք հարց ու փորձ եք անում, սկսում ինտերնետը «թերթել» կամ ծանոթ-ընկերներին հարցնել։ Այս ուղիներով դուք կարող եք գտնել տարբեր, երբեմն՝ իրարամերժ, չի բացառվում նաև՝ ոչ հավաստի կամ գովազդային տեղեկություններ։ Ուստի, այս ամենից զատ, հարցրեք ձեր բժշկին այն մասին, թե՝

  • ո՞վ է ձեզ նախատեսված վիրահատությանը լավագույն տիրապետող վիրաբույժը, և ինչո՞ւ։

Երկրորդ կարծիք

Դուք կարող եք նաև ձեր բժշկին հարցնել իր «երկրորդ կարծիքը»՝ մեկ այլ վիրաբույժի մասին։

Հոդվածը վերանայվել է՝ 29-05-2019