Ծխախոտից հրաժարում - Առողջ ապրելակերպ

Ծխախոտից վերջնական հրաժարումը բազմաթիվ ծխողներին թվում է անիրականանալի։

Այնուամենայնիվ, ծխախոտից հրաժարվելը դժվար, սակայն անհնար բան չէ, որքան կարող է թվալ առաջին հայացքից:

Ծխախոտին վերջնականապես «հանձնվելու» հիմքում ընկած են ծխող մարդիանց գիտակցության մեջ տարիներ շարունակ ամրապնդված տարբեր կարծրատիպերը (ստերեոտիպ): Բազմաթիվ մարդիկ հստակ գիտակցում են, որ ծխելն առաջացնում է առողջական խնդիրների մի ամբողջ շարք, սակայն շարունակում են ծխելը և դա հիմնավորում են տարբեր համոզմունքներով կամ մտացածին պնդումներով, որոնք տարիների ընթացքում վերածվում են կարծրատիպերի և թուլացնում ծխելը թողնելու շարժառիթները:

Ծխողներն իրենց այդ կարծրատիպերին կարող են տարբեր անուններ տալ՝ «ապացույցներ», «հիմնավորումներ», «արդարացումներ» կամ «պնդումներ», սակայն, իրականում դրանք ոչ այլ ինչ են, քան ծխախոտից չհրաժարվելու սովորական պատրվակներ:

Կոտրում ենք ծխախոտի հետ կապված բոլոր պատրվակները

Պատրվակ 1. Վնասն արդեն հասցված է, իսկ ծխելը դադարեցնելն՝ այլևս անիմաստ

Բազմաթիվ ծխողներ քաջ գիտակցում են, որ ծխելն իրենց մոտ արդեն իսկ բարձրացրել է քաղցկեղների, դիաբետի (շաքարախտ), սրտանոթային և այլ քրոնիկ հիվանդությունների ռիսկը: Նրանք սխալմամբ կարծում են, որ ծխախոտից ձերբազատվելն առողջության համար չի կարող որևէ օգուտ տալ և այլևս անիմաստ է:

Սակայն, փաստերը վկայում են հակառակը. ծխախոտից հրաժարվելու արդեն իսկ առաջին րոպեներից սկսած օրգանիզմը սկսում է վերականգնվել և առողջանալ:

Դուք ինքներդ կզգաք, որ ծխելը դադարեցնելուց ընդամենը մի քանի օր հետո բարելավվել է ձեր շնչառությունը և վերականգնվել են համի և հոտառության զգացողությունները: Իսկ ամիսներ և տարիներ անց սկսում է նվազել վաղ մահացության ռիսկը: Այսպիսով, օգուտ և իմաստ միշտ էլ կա:

Ի վերջո, պետք չէ ծխախոտի պատճառով անտեսել կամ, թույլ տվեք ասել՝ արհամարհել ընտանիքի անդամներին, ընկերներին և նրանց առողջությունը: Նույնիսկ եթե համոզված եք, որ չծխելը ձեզ օգուտ չի տալու, ինչո՞ւ վնաս հասցնել հարազտներին՝ նրանց դարձնելով պասիվ ծխողներ: Եվ ինչու ձեր երեխաների համար կամ տարիքով ծնողների համար սովորական դարձնել ծխով աղտոտված օդը` երկրորդային ծուխը:

Պատրվակ 2. Չծխելով ավելորդ կիլոգրամներ կհավաքեմ

Գիտաբժշկական տվյալները վկայում են, որ նիկոտինը ոչ թե փակում է ախորժակը, այլ խթանում կալորիաների «այրումը»: Ծխելը դադարեցնելուց հետո ավելորդ քաշ չկուտակելու համար պարզապես պետք է հիշել, որ այսուհետ ավելի քիչ էներգիայի կարիք ունեք: Ընդամենը պետք է ձեր սննդակարգը հարմարեցնել նոր՝ առողջ պայմաններին:

Իհարկե, կարող եք և ավելորդ կիլոգրամներ հավաքել, եթե ծխախոտը փոխարինեք սննդով: Դրա փոխարեն, ծխախոտից ձերբազատվելուց հետո անցեք քիչ կալորիա պարունակող առողջ սննդակարգի և ավելացրեք ձեր ֆիզիկական ակտիվությունը:

Պատրվակ 3. Ես սթրես ձեռք կբերեմ, ինչը պակաս վնասաբեր չէ

Ձեր համոզմունքներից անկախ, գիտական փաստերն ապացուցում են, որ նիկոտինը չի հանգստացնում գլխուղեղը: Հակումը բավարարելը բնավ սթրես հանդարտեցնել չէ:

Իսկ չե՞ք նկատել, թե ինչպիսի վատ սթրեսով եք լցվում մինչև հերթական գլանակն այրելը: Կամ, րոպե առաջ ծխելու և ծխով հագենալու հակումը կարելի՞ է համարել «հանգստացող ուղեղի» զգացում: Իհարկե՝ ոչ:

Չի բացառվում, որ չծխելու առաջին օրերին դյուրագրգիռ դառնաք: Եթե ամբողջ ուշադրությունը սևեռեք այս զգացողության վրա, իհարկե, դրանք նաև կարող են վերածվել իսկական մղձավանջի: Սակայն, դրա փոխարեն կարող եք ուղեղն այլ հարցերով «զբաղեցնել»:

Եթե դադարեցրել եք ծխելը և տանջվում եք հակումից՝ ծխելու ուժեղ ցանկությունից, հիշեք, որ սա բնավ անհաղթահարելի զգացում չէ: Համբերեք 10 րոպե, մի քանի անգամ խոր շունչ քաշեք, զբոսնեք, զբաղվեք ձեր սիրած գործերով և ծխելու ցանկությունն աստիճանաբար կմարի:

Պատրվակ 4. Այս պահը ծխախոտից հրաժարվելու լավագույն ժամանակը չէ

Իհարկե, խորհուրդ է տրվում ծխախոտից հրաժարվել կյանքի ոչ լարված և սթրեսով լի ժամանակաշրջանում, սակայն չարժի սա պատրվակ դարձնել և ծխելը դադարեցնելու փորձն անընդհատ հետաձգել:

Ծխախոտից ձերբազատվելու համար ընտրեք մոտակա օրերից մեկը: Դա կարող է լինել ձեր աշխատանքային շաբաթվա կամ արձակուրդի սկիզբը: Հիշեք, թե ինչի հետ եք դուք կապում ծխելը՝ սուրճ ըմպելը, գինետուն այցելելը, խնջույքը և այլն, և ընտրեք այնպիսի օր, որ կարողանաք խուսափել ծխելուն հրահրող այս գործոններից:

Տեղեկացրեք ձեր ընկերներին կամ գործընկերներին այն մասին, որ այլևս չեք ծխելու. սա կբարձրացնի հաջող փորձի հավանականությունը: Նույն կերպ, կարող եք նաև ծխող ընկերներին խնդրել, որ այսուհետ ձեզ ծխախոտ չառաջարկեն և ձեզ մոտ չծխեն:

Պատրվակ 5. Չծխելը կխարխլի իմ սոցիալական կապերն ու կյանքը

Բազմաթիվ ծխողների համար ծխախոտն առօրյա կյանքի կարևոր բաղկացուցիչ մասն է: Դուք կարող եք ձեզ համարել «սոցիալական ծխող», եթե ծխում եք միայն ձեր ընկերների շրջապատում կամ միայն այն ժամանակ, երբ ձեր գործընկերների հետ ընդմիջում եք անում:

Իհարկե, սոցիալական ծխող լինելու կարգավիճակը կարծես ավելի լավ է, քան օրական 40 գլանակ ծխելը: Սակայն հիշեք, որ վնաս է հասցնում ծխած յուրաքանչյուր մեկ հատիկ գլանակը, և կարելի է ընկերներին հանդիպել ոչ թե ծխելու, այլ պարզապես շփվելու համար:

Պատրվակ 6. Ծխելն ինձ հաճույք է պատճառում

Որոշ մարդկանց համար գլանակը ձեռքում պահելը, այն վառելը կամ առաջին ծուխը ներս քաշելը կարող են թվալ գայթակղիչ կամ հաճույք պատճառող վիճակներ: Այլ մարդիկ ծխելը դեռևս համարվում են մոդայիկ, թեև վաղուց արդեն ծխախոտը կտրել է իր կապը նորաոճության հետ: Դեռահասները կարող են թյուր կարծիք ունենալ, որ ծխախոտը թույլ է տալիս նրանց երևալ իրենց տարիքից ավելի բարձր, ուրեմն՝ ավելի խելացի, համարձակ կամ անկախ: Իրականում, նշվածներից ոչ մեկն էլ ծխախոտի հետ կապ չունեն: Խելացի լինելն այն է, երբ ձեզ և մյուսներին վնաս չեք հասցնում: Ինքնավստահություն կարո՞ղ ենք կոչել այն երևույթը, երբ դուք ձեր ղեկը վստահել եք անշունչ ծխախոտին:

Հիշեք, որ բազմաթիվ մարդկանց համար ծխող մարդն ինքնին արդեն հրապուրիչ չէ: Դեղնած մատներ ու եղունգներ, նույնիսկ հեռվից «քթին խփող» մազերից և հագուստից ծխի տհաճ վանող հոտ, գորշացած մաշկ, փայլը կորցրած դեղնած ատամնաշար, խոսելիս՝ բերանից տհաճ դառնահոտ և այլն: Մի՞թե սա մոդայիկ է: Խնդիրներ սեռական կյանքում՝ հարուցված ծխախոտից (օրինակ՝ էրեկցիայի խանգարումներ): Կամ այն, որ ձեզ համբուրելը նմանվում է «մոխրամանը համբուրելուն»: Չե՞ք կարծում, որ այստեղ ոչ մի հրապուրիչ բան չկա, եթե ոչ հակառակը:

Ցանկանո՞ւմ եք ուրիշների աչքին ձեր տարիքից ավելի երիտասարդ երևալ, ցանկանո՞ւմ եք ձեր շրջապատին ներկայանալ ձեր կամքով, կենսաուժով ու թարմությամբ՝ ուրեմն վերջ տվեք ծխելուն:

Պատրվակ 7. Ես չեմ կարող չծխել, քանի որ ծխախոտից կախված եմ

Իհարկե, այս տողերի մեջ որոշակի ճշմարտություն կա: Եվ վաղուց արդեն «ծխախոտից կախվածությունը» համարվում է այնպիսի ախտորոշում, ինչպիսին է, օրինակ՝ դիաբետը: Եվ ոչ ոք չի պնդում, որ ծխախոտից հրաժարվելը դյուրին գործ է:

Սակայն ուղեղից ոչ մի րոպե մի հեռացրեք այն միտքը, որ անհնարին բան չկա: Հաստատակամ որոշելու դեպքում կկարողանաք մեկընդմիշտ դեն նետել ծխախոտի գլանակը, սիգարը կամ ծխամորճը: Ձեր որոշման հաստատատակամությունը թույլ կտա, որ հաղթահարեք առաջին օրերին ի հայտ եկող, սակայն ժամանակավոր բնույթ կրող որոշ տհաճ երևույթները՝ դյուրագրգռություն, քնկոտություն, ուշադրության կենտրոնացման դժվարություններ և այլն: Նման դեպքերում ձեր բժշկի խորհուրդները և սթրեսը կրճատող միջոցները կարող են բավականին օգտակար լինել:

Բոլոր դեպքերում, օր օրի վրա այս անցանկալի նշանները իրենց տեղը կզիջեն ձեր նոր՝ առողջ կյանքի իրական հաճույքներին: