Անոթազարկ (պուլս) -

Անոթազարկը կամ պուլսը մեկ րոպեում սրտի կծկումների թիվն է, երբ դուք հանգիստ պայմաններում եք, օրինակ՝ որևէ գործ չեք անում, նստած կամ պառկած եք։

Տարբեր մարդկանց մոտ անոթազարկի հաճախությունը տարբեր է։ Իմանալով ձեր հանգստի անոթազարկը, դուք տեղեկանում եք ձեր սրտազարկի արագության մասին։ Ոչ հազվադեպ, անոթազարկի հաճախության շեղումները կարող են վկայել սրտանոթային խնդրի, այդ թվում՝ սրտի ռիթմի փոփոխության մասին։

Երբ բժիշկը շոշափում է ձեր անոթազարկը, նա ուշադրություն է դարձնում ոչ միայն անոթազարկի հաճախության ու ռիթմի, այլև մի շարք այլ ցուցանիշների վրա՝ անոթազարկի արագություն, լարվածություն և լեցունություն։

Ինչքա՞ն է նորմալ հանգստի անոթազարկը

Առողջ չափահաս մարդկանց հանգստի անոթազարկը սովորաբար տատանվում է 60-100 հատ 1 րոպեում (ավելի հաճախ՝ 70-80)։

Սովորաբար, այս միջակայքում ավելի հազվադեպ սրտազարկը վկայում է սրտի ավելի արդյունավետ աշխատանքի մասին։ Սրտազարկը հազվադեպ է դառնում նաև մկանեղ մարդկանց մոտ. օրինակ, մարզիկների հանգստի սրտազարկը կարող է հասնել րոպեում մինչև 40-ի։

Ինչպե՞ս ստուգել իմ հանգստի սրտազարկը

Ձեր սրտազարկը ստուգելու համար՝

• նստեք և հանգստացեք 5 րոպե
• պտտեք ձեր դաստակը՝ ափը դեպի դուրս
• շոշափեք ու զգացեք ձեր պուլսը նախադաստակի վրա՝ բութ մատի կողմից
• հաշվեք ձեր անոթազարկի զգացողության թիվը 30 վրկ.-ի ընթացքում
• կրկնապատկեք այդ թիվը։

Եթե նախադաստակի վրա պուլսը չի հաջողվում շոշափել, ձեր երկու մատները պահեք պարանոցի կողմնային մասում և թույլ սեղմեք կոկորդից (շնչափողից) աջ կամ ձախ։

Եթե կրկին չի հաջողվում, խնդրեք մեկ ուրիշին, որ չափի ձեր անոթազարկը։

Ի՞նչ գործոններ կարող են ազդել անոթազարկի վրա

Անոթազարկով որոշվող սրտի ռիթմի վրա կարող են ազդել բազմաթիվ գործոններ, որոնցից են՝

• ֆիզիկական ակտիվություն, որի ժամանակ սրտի ռիթմն արագանում է
• մկանների զարգացվածության աստիճան. որքան մկանեղ եք, այդքան ձեր սրտի ռիթմը կարող է դանդաղ դառնալ
• օդի ջերմաստիճան. շոգ օրերին սիրտն ավելի հաճախ կծկվելու կարիք ունի
• հույզեր. այնպիսի ապրումները, ինչպիսիք են սթրեսը, զայրույթը, գերգրգռվածությունը կամ տխրությունը արագացնում են սրտազարկը
• դեղեր. կան սրտազարկը արագացնող (օրինակ՝ վահանաձև գեղձի դեղեր) կամ դանդաղեցնող դեղեր (օրինակ՝ բետա-պաշարիչներ)
• տարիք. տարիքի հետ անոթազարկը և դրա ռիթմիկությունը կարող են փոփոխվել։

Արդյոք նորմա՞լ է իմ արյան ճնշումը, եթե հանգստի անոթազարկը նորմալ է

Հանգստի անոթազարկը չի հանդիսանում զարկերակային ճնշման ուղղակի ցուցանիշ։ Արյան ճնշմումը ստուգվում է՝ չափելով այն։

Եթե իմ հանգստի սրտազարկը հազվադեպացած է, վտանգավո՞ր է դա

Խիստ մկանեղ մարդկանց մոտ հանգստի սրտազարկը կարող է հասնել 40-ի։ Սակայն հազվադեպացած պուլսը կարող է լինել նաև առողջական խնդրի նշան (բրադիկարդիա)։

Եթե համոզված չեք, առավել ևս, եթե ձեզ մոտ դանդաղած սրտազարկն ուղեկցվում է գանգատներով (գլխապտույտ, ուշագնացության զգացում, օդի պակասի զգացում), անհապաղ դիմեք ձեր բժշկին կամ զանգեք 1-03 և կանչեք շտապ օգնություն։

Եթե իմ հանգստի սրտազարկը հաճախացած է, վտանգավո՞ր է դա

Հանգիստ պայմաններում սրտազարկի հաճախացումը (ավելի քան 100 զարկ րոպեում, տախիկարդիա) կարող է լինել որևէ առողջական խնդրի նշան։

Եթե համոզված չեք, առավել ևս, եթե ձեզ մոտ հաճախացած սրտազարկն ուղեկցվում է գանգատներով (սրտխփոց, գլխապտույտ, օդի պակասի զգացում), անհապաղ դիմեք ձեր բժշկին կամ զանգեք 1-03 և կանչեք շտապ օգնություն։