Քնաբեր դեղերի անվտանգ օգտագործում

Քնաբեր դեղերի անվտանգ օգտագործում

Քնաբերները դեղեր են, որոնք նշանակվում են քուն մտնելը և քնած վիճակը պահպանելն օժանդակելու համար:

Անքնության ժամանակ դրանք նշանակվում են միայն բժշկի կողմից:

Քնաբերների մեծ մասը դրսևորում է տարաբնույթ կողմնակի ազդեցություններ:

Քնաբեր հաբերի տեսակները

Որպես կանոն, դեղատներից քնաբեր դեղեր կարելի է գնել միայն բժշկի դեղատոմսով (ռեցեպտ): Թույլ քնաբեր ազդեցությամբ որոշ բուսական ծագման դեղատեսակներ կարող են վաճառվել նաև առանց դեղատոմսի:

Քնաբեր ազդեցությամբ ամենահաճախ նշանակվող դեղերը պատկանում են բենզոդիազեպինների շարքին (Տեմազեպամ, Դիազեպամ, Լորազեպամ և այլն):

Որոշ դեղեր (օրինակ՝ որոշ հակահիստամինայիններ) չեն պատկանում քնաբերների շարքին, սակայն կարող են առաջացնել քնկոտություն (կոչվում է «սեդացիա»):

Վերջապես, կան բուսական ծագման դեղատեսակներ (օրինակ՝ Կատվախոտի թուրմ), որոնք ունեն ընդհանուր հանգստացնող և թույլ սեդատիվ ազդեցություն և կարող են նպաստել քուն մտնելուն:

Որո՞նք են քնաբերներ խմելու ռիսկերը

Քնաբերների ամենամեծ վտանգը հակում և կախվածություն առաջացնելու ունակությունն է: Սա նշանակում է, որ որոշ ժամանակ ընդունելուց հետո այս դեղերը կորցնում են իրենց քնաբեր ազդեցությունը, սակայն անձը չի կարողանում նորմալ քուն մտնել առանց նույն այդ դեղերը խմելու:

Ծանր կախվածության ժամանակ քնաբերներ ընդունելը դառնում է անհրաժեշտություն, իսկ դրանց բացակայության ժամանակ զարգանում է քնաբեր հաբեր ընդունելու անդիմադրելի ցանկություն և զրկանքի համախտանիշ: Քնաբերներից ծանր կախվածությունը կարող է բարդանալ ցնցումներով:

Քնաբերների մեծ մասը առաջացնում է նաև մշտական (շուրջօրյա) քնկոտություն, հավասարակշռության խանգարումներ, հիշողության թուլացում և ուշադրությունը կենտրոնացնելու հետ կապված խնդիրներ: Այս կողմնակի ազդեցությունների պատճառով մեծանում է ավտոմեքենա վարելիս ճանապարհատրանսպորտային կամ այլ պատահարների վտանգը:

Ինչպե՞ս անվտանգ օգտագործել քնաբերները

Քնաբերների անվտանգությունը երաշխավորող առաջին պայմանն այն է, որ դուք պետք է դրանք ընդունեք միայն բժշկի նշանակման դեպքում:

Եթե բժիշկը ձեզ նշանակել է քնաբեր հաբ, ապա կան դրանց անվտանգությունը բարձրացնող որոշ կանոններ՝

  • ձեզ քնաբեր նշանակող բժշկին տեղեկացրեք, եթե ընդունում եք այլ դեղեր կամ ստանում այլ բուժումներ
  • ընդունեք միայն ձեզ նշանակած և միայն դեղատնից գնված քնաբերներ
  • մի շարունակեք քնաբերների ընդունումը, եթե բժիշկը ձեր նշանակումներից հանել է դրանք
  • եթե քնաբերներն ընդունում եք երկար ժամանակի ընթացքում, զրուցեք ձեր բժշկի հետ, թե որն է դրանց օգտագործումը դադարեցնելու լավագույն տարբերակը
  • երբեք մի՛ խառնեք քնաբերն ալկոհոլային խմիչքի հետ
  • ձեզ նշանակած քնաբեր դեղերը մի՛ տվեք այլ մարդկանց
  • բուժման ողջ ընթացքում, առավել ևս՝ քնաբեր դեղեր ընդունած ժամանակ հրաժարվե՛ք ավտոմեքենա վարելուց
  • փողոցում քայլելիս ավելի ուշադիր եղեք:

Ինչպե՞ս լավ քնեմ առանց դեղերի օգնության

Գոյություն ունեն ձեր քունը կարգավորղ այլ՝ ոչ դեղորայքային և լրիվ անվտանգ մեթոդներ:

Ծանոթացեք առողջ քնի 10 հմտություններին:

Հոդվածը վերանայվել է՝ 19-05-2020