Քուն և հանգիստ - Առողջ հղիություն

Երբ դուք հղի եք, ձեր քունը կարող է խանգարվել և դառնալ խնդիր:

Այս հոդվածում ձեզ կներկայացնենք որոշ հմտություններ, որոնք կարող են օգնել հղիության ընթացքում ձեր քնի կարգավորմանը, որը շատ կարևոր է ինչպես ձեր ֆիզիկական (մարմնական) և հոգեկան բարեկեցիկ վիճակի պահպանման, այնպես էլ ձեր չծնված երեխայի նորմալ աճի ու զարգացման համար:

Ինչքա՞ն քնի կարիք ունեմ, եթե հղի եմ

Երբ հղի եք, ձեր քունն այնքան խոր և թարմացնող չէ, որքան մինչ այդ էր, և դուք կարող եք գիշերվա ընթացքում ավելի հաճախ արթնանալ: Սա նշանակում է, որ հղիության ընթացքում դուք ունեք սովորականից ավելի երկար քնի անհրաժեշտություն` այնքան, որքան կարող եք:

Սակայն քունը երկարացնելը կամ կարգավորելն այնքան հեշտ գործ չէ, որքան կարող է թվալ առաջին հայացքից, հատկապես, եթե աշխատում եք, ունեք նաև այլ երեխաներ, որոնք պահանջում են այլ գործեր ևս:

Եթե կարող եք, անկողին մտեք սովորականից ավելի շուտ և ցերեկվա ժամերին փորձեք ննջել: Օգտակար կարող են լինել նաև այս խորհուրդները՝

• ցերեկվա ժամերին հնարավորինս հանգստացեք
• երեկոյան կամ վաղ առավոտյան դուրս եկեք զբոսանքի
• անկողին մտնելուց առաջ խուսափեք սուրճ կամ թեյ խմելուց
• թուլացեք մինչև անկողին մտնելը՝ ցնցուղ, ընթերցանություն, հեռուստադիտում, թիկունքի և ուսագոտու մերսում:

Քունն առաջին եռամսյակի ընթացքում

Հղիության առաջին եռամսյակի ամենամեծ խնդիրը հոգնածության զգացումն է, որի ժամանակ վերոնշյալ խորհուրդները կարող են օգտակար լինել:

Դուք կարող եք ունենալ ավելի հաճախ միզելու կարիք, որը կարող է խաթարել ձեր գիշերային քունը: Հղիության ընթացքում քիչ ավելի հաճախ միզելը նորմալ երևույթ է, սակայն, եթե ունեք նաև դժվարամիզություն կամ միզելիս ցավ (դիզուրիա), դիմեք ձեր բժշկին:

Քունը երկրորդ եռամսյակի ընթացքում

Հղիության երկրորդ եռամսյակը բերում է նոր խնդիրներ:

Բազմաթիվ կանանց մոտ ի հայտ է գալիս քթի փակվածություն կամ լցված լինելու զգացում: Նման դեպքերում կարող է օգնել աղային լուծույթով քթի կաթիլները:

Ձեր քունը կարող են խանգարել նաև ոտքերի ջղաձգումները: Թեև իրականում պարզ չէ, թե ինչու են այս կծկանքներն ի հայտ գալիս, սակայն կան տարբեր հնարքներ, որոնք կարող են թուլացնել կծկված մկանները, օրինակ՝ առատ հեղուկների ընդունում, օրվա ընթացքում ֆիզիկապես ակտիվություն, իսկ բուն ջղաձգման պահին՝ ոտնաթաթի տարածում և մատների ուժեղ ծալում դեպի ներքև՝ դեպի ներբանը:

Որոշ կանայք քնի ընթացքում տեսնում են սովորականից ավելի շատ երազներ կամ մղձավնջեր: Երբեմն դա կարող է կապված լինել սթրեսի կամ անկայուն քնի հետ: Քնի համար ստեղծեք կայուն և անփոփոխ ռեժիմ, օգտագործեք հղիության բարձ կամ փորձեք քնելու տարբեր դիրքեր: Եթե երազները դարձել են խիստ հաճախակի կամ անհանգստացնող, զրուցեք այդ մասին ձեր զուգընկերոջ կամ խորհրդատուի հետ:

Հղի կանանց մի մասը սկսում է քնած ժամանակ խռմփացնել, նույնիսկ եթե մինչև հղիանալը երբեք այս երևույթի հետ չի առնչվել: Նման դեպքերում կարող է օգտակար լինել մի կողքի վրա քնելը և գլխին քիչ բարձր դիրք տալը: Առողջ սննդակարգը և մարմնի քաշն առողջ միջակայքում պահպանելը նույնպես կարող են օգտակար լինել:

Քունը երրորդ եռամսյակի ընթացքում

Շատ կարևոր է, որ հղիության երրորդ եռամսյակում՝ 28 շաբաթականից սկսած մինչև երեխայի ծնվելը պառկեք ոչ թե մեջքի, այլ՝ կողքի վրա ինչպես ցերեկները ննջելիս, այնպես էլ գիշերային քնի ժամանակ:

Մեջքի վրա պառկելիս որովայնով անցնող ձեր գլխավոր անոթները հայտնվում են սեղմված վիճակով, որի պատճառով արգանդի արյունամատակարումը կարող է կրճատվել՝ բերելով երեխայի թթվածնաքաղցի: Հետազոտությունները վկայում են, որ մի կողքի վրա քնելը կարող է կիսով չափ կրճատել մեռելածնության ռիսկը:

Դուք կարող եք կողքի վրա պառկած վիճակը դարձնել ավելի հարմարավետ, երբ քիչ ծալեք ձեր ծնկները և դրանց միջև բարձ դնեք: Նույն կերպ, նաև կարող եք փորձել որովայնի տակ փոքր օժանդակող բարձ դնելը:

Եթե գիշերային քնից արթնանում և տեսնում եք, որ շուռ եք եկել մեջքի վրա, նորից վերադարձեք կողքի վրա դիրքին: Եթե այս իրավիճակը հաճախակի է կրկնվում, թիկունքի ետևում դրեք բարձ, որը մեջքի վրա պտտվելը կդարձնի ավելի դժվար:

Որոշ կանանց համար կարող է հարմարավետ թվալ գլխի բավականին բարձր դիրքով քնելը: Այս դիրքը կարող է նաև նվազեցնել այրոցքը (изжога) և խռմփոցը:

Դուք նաև կարող եք զգալ, որ գիշերային ժամերին ավելի հաճախ են ի հայտ գալիս գոտկային ցավեր: Հնարավորության դեպքում փորձեք խուսափել ծանրություններ բարձրացնելուց, երկար ժամանակ մի դիրքում մնալուց և դարձեք ֆիզիկապես ավելի ակտիվ:

Գիշերային միզարձակությունները կարող են ավելի հաճախանալ: Պատճառը մեծացող երեխայի կողմից ձեր միզապարկը ճնշելն է, որը նաև կարող է առաջացնել մեզի ակամա արտահոսք: Նման իրավիճակներում սկսեք հատուկ վարժանքների միջոցով ամրապնդել ձեր կոնքի հատակի մկանները:

Քնին օգնող այլ միջոցներ

Հղիության բարձը կարող է օգնել, որ անկողնում ձեզ զգաք ավելի հարմարավետ: Կան դրանց տարբեր չափեր և ձևեր, պարզապես պետք է ընտրել ձեզ ամենահամապատասխան բարձը:

Ընդհանուր առմամբ, հղի կանանց խորհուրդ է տրվում քնաբերներ չընդունել, քանի դեռ դրանցից ամենաանվտանգը չի նշանակվել ձեր հղիության մասին տեղեկացված բժշկի կողմից:

Ծառայություններ և աջակցություն

Եթե ունեք հղիության ընթացքում հաճախ հանդիպող խնդիրներ կամ ավելի լուրջ քնի խանգարումներ, տագնապ կամ դեպրեսիա, դիմեք համապատասխան մասնագետներին: Խոսեք այս մասին ձեր բժշկի հետ: