Մեռելածնություն (մահացած պտուղ)

4 րոպե

Մեռելածնությունը՝ երբ ծնվելուց հետո երեխան չի ցուցադրում կյանքի որևէ նշան, չափազանց տխուր և հուզումալից պահ է ծնողների համար։

Նրանք կորցրած երեխայի համար մեծ ցավ են ապրում, հայտնվում են շոկի մեջ ու ոչ հազվադեպ լցվում են մեղավորության զգացումով։ Հաճախ մեռելածնության պատճառը և այն, թե արդյոք հնարավո՞ր էր կանխարգելել, մնում են անհայտ։ Այնուամենայնիվ, կան մեռելածնության ռիսկը նվազեցնող մի շարք մեթոդներ։

Ի՞նչ է մեռելածնությունը

Մեռելածնություն է համարվում այն երեխայի ծնունդը, ով մահացել է սկսած հղիության 20 շաբաթականից մինչև ծննդաբերության ժամկետը։ Պտուղը կարող է մահանալ հղիության ընթացքում կամ, ավելի հազվադեպ, ծննդաբերության ընթացքում։

Եթե հղիության ժամկետն անհայտ է, ապա ծննդաբերությունը համարվում է մահացած պտուղով, եթե վերջինիս կշիռը ծննդաբերության պահին կազմել է 400 գրամ և ավելի։

Մեռելածնությունը տարբերվում է ինքնաբուխ վիժումից, որը տեղի է ունենում, երբ հղիությունն ավարտվում է մինչև 20 շաբաթական զարգացումը։

Ի՞նչը կարող է պատճառել կամ նպաստել մեռելածնությանը

Ցավոք, մեռելածնության պատճառը հաճախ մնում է չպարզաբանված։ Սակայն կան գործոններ, որոնք կարող են բարձրացնել մահացած պտուղի ռիսկը, որոնից են՝

• բնածին արատներ՝ հիվանդություններ, որոնք ազդում են պտղի կառուցվածքի և գործունեության վրա
• վաղաժամ ծննդաբերություն, երբ նորածինն այն աստիճան անհաս է, որ չի կարող ապրել
• պտղի աճի կանգ
• հղի կնոջ մոտ որևէ հիվանդություն, օրինակ՝ դիաբետ, երիկամային հիվանդություն, սրտային հիվանդություններ կամ պրեէկլամպսիա
• ծննդաբերության ընթացքում առաջացած բարդություններ
• պորտալարի կամ ընկերքի հետ կապված խնդիրներ
• հղի կնոջ մեծ տարիք
• մինչև հղիությունը՝ գիրություն
• վարակ
• հղիության ընթացքում մեջքի վրա քնելը
• հղիության ընթացքում ծխախոտի, ալկոհոլի կամ թմրամիջոցների օգտագործում
• հղիության ընթացքում որովայնի շրջանում հարված կամ վնասվածք
• հղիության ընթացքում ընտանեկան բռնություն։

Ինչպե՞ս կարող եմ կանխարգելել մեռելածնությունը

Թեև մեռելածնության պատճառները հաճախ մնում են չբացահայտված, կան քայլեր, որոնց միջոցով դուք կարող եք նվազեցնել մեռելածնության ռիսկը։

Այս առումով, մինչև հղիանալն ընդհանուր առողջության պահպանումը և ֆոլաթթվի ընդունումը, ինչպես նաև ծխախտից, ալկոհոլից և թմրամիջոցներից հրաժարվելը՝ այս բոլորն էլ կարևոր կանխարգելիչ հանգամանքներ են։

Կարևոր է նաև, որ դուք կանոնավոր կերպով օգտվեք կանանց կոնսուլտացիայի ծառայությունից, բաց չթողնեք նախածննդյան այցելությունները և սքրինինգային հետազոտությունները (օրինակ՝ պտղի սոնոգրաֆիա, արյան և մեզի հետազոտություններ), որոնք կարող են հայտնաբերել հնարավոր խնդիրը։

Եթե դուք ունեք դիաբետ կամ բարձր արյան ճնշում, ապա համոզվեք, որ դրանք պատշաճ ձևով վերահսկվում են ինչպես մինչև հղիությունը, այնպես էլ հղիության ընթացքում։

Դուք կարող եք նաև հետևել ձեր պտղի շարժումներին («պտղի խաղ»), հատկապես հղիության երրորդ տրիմեստրում (եռամսյակ)։ Եթե կարծում եք, որ դրան փոփոխվել են, առանց հետաձգելու զրուցեք այդ մասին ձեր բժշկի կամ մանկաբարձուհու հետ։

Հղիության զարգացմանը զուգընթաց, հատկապես երրորդ տրիմեստրում, ցանկալի է, որ դուք քնեք ոչ թե մեջքի, այլ մի կողքի վրա։

Որոշ դեպքերում (հղի կնոջ կամ պտղի հետ կապված խնդիրներ) մեռելածնության կանխարգելիչ միջոցառում կարելի է համարել նաև կեսարյան հատումը։

Հնարավոր ահազանգող նշանները

Անհապաղ կապ հաստատեք ձեր բժշկի կամ մանկաբարձուհու հետ, եթե՝

• դուք կարծում եք, որ պտուղը այլևս չի շարժվում կամ պտղի խաղը ստացել է արտասովոր բնույթ
• դուք ունեք որովայնային ուժեղ ցավեր կամ կծկանքներ կամ գոտկատեղում տեղակայված ցավեր
• դուք ստացել եք հարված որովայնին կամ մեկ այլ վնասվածք
• դուք ունեք հեշտոցային արյունահոսություն կամ սովորականից առատ արտադրություն
• դուք զգում եք գլխապտույտ, տեսողության հետ կապված խնդիրներ կամ սուր կամ երկարատև գլխացավեր
• ձեր դեմքը, ոտնաթաթերը կամ ձեռքերը հանկարծակի այտուցվում են կամ ձեր ոտքերը ցավոտ այտուցված են
• դուք ունեք սուր կամ շարունակվող սրտխառնոց և կրկնակի փսխումներ, որոնք ազդում են ձեր սնունդ և հեղուկներ ընդունելու վրա
• դուք ունեք ջերմության բարձրացում կամ դող և սարսուռ
• դուք ունեք զգացում, որ ձեր հղիության կամ առողջության հետ ինչ-որ մի բան ճիշտ չի ընթանում։

Եթե բժշկի կամ մանկաբարձուհու հետ կապ հաստատելը չի հաջողվում, այցելեք մոտակա ծննդատուն։ Եթե կարծում եք, որ առաջացել է անհետաձգելի բուժօգնության անհրաժեշտություն, անհապաղ զանգեք 1-03 և կանչեք շտապբուժօգնություն։

Ինչպե՞ս է մեռելածնությունն ախտորոշվում

Բժիշկ-մանկաբարձը կամ մանկաբարձուհին կլսեն ձեր գանգատները, կզննեն ձեր որովայնը և կնշանակեն որոշ հետազոտություններ (օրինակ՝ պտղի սոնոգրաֆիա):

Ինչպե՞ս է կատարվում մահացած պտղի ծննդալուծումը

Ծննդալուծման տարբերակը կախված է մի շարք գործոններից՝ կնոջ առղջական վիճակ, հղիության ընթացք, ուղեկցող հիվանդություններ և այլն։ Ավելի հաճախ բժիշկներն առաջարկում են հեշտոցային ծննդալուծում, իսկ ցուցումների առկայության դեպքում՝ կեսարյան հատում։

Մահացած պտղի հեշտոցային ծննդալուծման ընթացքը կարող է տևել ավելի երկար, քան նորմալ ծննդաբերությունը։ Նման դեպքերում ձեզ կարող են առաջարկել ցավազրկման որևէ տարբերակ։