Ավշագեղձերի (ավշային հանգույցների) այտուց և մեծացում

Ավշագեղձերի (ավշային հանգույցների) այտուց և մեծացում
Անգլերեն անվանումը՝ Swollen Glands

Ավշային գեղձերը կամ հանգույցները կարող են այտուցվել և մեծանալ տարատեսակ պատճառներից։

Եթե ձեր ավշագեղձերը մեծացել են վիրուսային վարակի պատճառով, ապա վիրուսը «նահանջելիս», առանց որևէ առանձնահատուկ բուժման, ձեր հանգույցները կփափկեն և կփոքրանան։ Եթե դուք համոզված չեք, թե ինչու են ձեր ավշային գեղձերն այտուցվել կամ դարձել են ցավոտ, ժամանակի ընթացքում ավելի են մեծանում կամ ուղեկցվում են ձեր ինքնազգացողության վատացմամբ, ապա պետք է դիմել ձեր բժշկին։

Այս հոդվածում մենք փոխարինաբար կօգտագործենք «ավշային գեղձ», «ավշագեղձ» կամ «ավշային հանգույց» կամ պարզապես «հանգույց» անվանումները։

Ի՞նչ են այտուցված հանգույցները

Ավշային գեղձերը կազմում են ձեր ավշային համակարգի մի մասը։ Այս համակարգը, այդ թվում՝ ավշային գեղձերը պայքարում են օրգանիզմ ներթափանցած վարակի դեմ։ Հանգույցներում տեղի է ունենում ավշի՝ օրգանիզմի կենսահեղուկներից մեկի զտում։

Դուք կարող եք այտուցված ավշագեղձեր ունենալ մարմնի տարբեր շրջաններում, բայց ավելի հաճախ դրանք զգում եք ձեր պարանոցի երկու կողմերում, թևատակում կամ աճուկներում։

Ինչո՞ւ են հանգույցներն այտուցվում

Ավշագեղձերը կարող են այտուցվել տարբեր պատճառներով։ Դրանց մեծ մասը առողջական լուրջ խնդիր չի ներկայացնում։

Այտուցված հանգույցները սովորաբար վկայում են այն մասին, որ ձեր իմունային համակարգը պայքարում է մոտակա տեղակայված որևէ վարակի դեմ։ Օրինակ, եթե դուք ունեք վիրուսային ծագման ըմպանաբորբ (ֆարինգիտ), ապա կարող են այտուցվել ու մեծանալ ձեր պարանոցի հանգույցները, իսկ եթե վարակային բորբոքումն ընդգրկել է ձեր ոտքը, ապա իրենց զգացնել կտան ձեր նույն կողմի աճուկային հանգույցները։

Ավշագեղձերի այտուցվածության պատճառներից են՝

Այտուցված ավշագեղձերով 100 մարդուց միայն 1-ի մոտ կամ ավելի ցածր հաճախականությամբ կարող է լինել քաղցկեղ։ Երիտասարդների մոտ քաղցկեղի այս ցուցանիշն էլ ավելի ցածր է։

Այտուցված հանգույցների ախտորոշումը

Եթե դուք այտուցված գեղձերի կապակցությամբ այցելել եք ձեր բժշկին, ապա նա ձեր ախտանիշների մասին կտա որոշ հարցեր, որից հետո կզննի ձեզ, այդ թվում՝ կշոշափի ձեր մատնանշած և մոտակա հանգույցների շրջանը։

Եթե ավշագեղձերի մեծանալը կապված է որևէ վարակի հետ, ապա բժիշկը կարող է ձեզ առաջարկել վերջինիս հայտնաբերման որևէ հետազոտություն։

Որոշ դեպքերում բժիշկը կարող է ձեզ առաջարկել արյան այլ անալիզներ, պատկերման հետազոտություններ, իսկ քաղցկեղ կասկածելիս՝ նաև ախտահարված հանգույցի բիոպսիա։

Այտուցված հանգույցների բուժումը

Եթե ձեր հանգույցների այտուցվածության պատճառը վիրուսային վարակն է, ապա որևէ բուժման կարիք չկա։ Հիվանդության մեղմացմանը զուգահեռ ձեր հանգույցները կփոքրանան, թեև գուցե գեղձերն իրենց նորմալ չափին վերադառնան ավելի ուշ՝ մի քանի շաբաթ անց։

Եթե ձեզ մոտ ախտորոշվում է որևէ բակտերիային վարակ, ապա բժիշկը կնշանակի համապատասխան հակաբիոտիկ։

Վերջապես, եթե ձեր հանգույցներն այտուցվել և մեծացել են քաղցկեղային որևէ հիվանդության պատճառով, ապա բուժումը կկազմակերպվի ոչ թե այդ հանգույցների, այլ քաղցկեղի բուժման ուղղությամբ։

Հոդվածը վերանայվել է՝ 22-05-2019