Միզակապություն - Միզուղիների հիվանդություններ

Միզակապությունն այն վիճակն է, երբ ձեր միզապարկը լիքն է, դուք միզելու ցանկություն և սուր կարիք ունեք, սակայն չեք կարողանում միզել:

Միզակապության (իշուրիա) ախտանիշները սովորաբար զարգանում են հանկարծակի և կարող են առաջացնել ստորորովայնային կամ ամբողջ որովայնով տարածվող ուժեղ ցավեր, քանի որ ձեր միզապարկը լցվածությունից «պայթում է», մինչդեռ չեք կարողանում դատարկել այն: Սա կոչվում է սուր միզակապություն:

Սուր միզապարկությունն անհետաձգելի բուժօգնություն պահանջող վիճակ է, որի դեպքում առաջանում է միզապարկում կուտակված մեզին արտահոսք տալու շտապ անհրաժեշտություն: Նման դեպքերում միզապարկը սովորաբար դատարկվում է միզային կաթետրով, որը ներկայացնում է սիլիկոնային խողովակ:

Սուր միզակապությունը կարող է զարգանալ ամենատարբեր պատճառներով, սակայն դրանցից ամենահաճախ հանդիպողներն են՝

• վերջերս իրականացված վիրահատություն սեռական օրգանների, միզապարկի, ուղիղ աղիքի, փոքր կոնքի օրգանների և ստորորովայնային շրջաններում
• որոշ հիվանդություններ, օրինակ՝ շաքարային դիաբետ կամ ցրված սկլերոզ
• սեռական կամ փոքր կոնքի շրջանի վնասվածքներ
• միզատար ուղիների խցանում, օրինակ՝ միզային քարերով
• նյարդային խնդիրներ
• միզապարկի մկանների թուլություն
• փորկապություն
• որոշ դեղեր
• որոշ վարակներ կամ բորբոքում:

Քրոնիկ միզակապություն

Երբեմն միզակապությունը զարգանում է ավելի դանդաղորեն: Նման դեպքերում զգում եք, որ աստիճանաբար՝ շաբաթների կամ ամիսների ընթացքում միզելը և միզապարկը դատարկելը դառնում են ավելի ու ավելի դժվարացած: Նման վիճակը սովորաբար սուր ցավեր չի առաջացնում:

Օգտակար խորհուրդներ

Եթե միզարձակման խնդիներ ունեք, փորձեք՝

• միզել տաք ջրով վաննայում պառկած ժամանակ
• բացել լվացարանի ջուրը (հոսող ջրի ձայնը կարող է օգնել միզարձակման սկսելուն):

Եթե գտնում եք, որ միզարձակման խնդիրն առաջ է եկել որևէ դեղ ընդունելուց հետո, խոսեք այդ մասին ձեր բժշկի հետ, որ անհրաժեշտության դեպքում նա վերանայի ձեր նշանակումները: Ցավերի դեպքում ձեր բժշկից ճշտեք, թե ինչպիսի ցավազրկող դեղամիջոց կարող եք ընդունել: