Հեշտոցային արտադրուկ

Հեշտոցային արտադրուկ
Անգլերեն անվանումը՝ Vaginal Discharge

Որոշ քանակության հեշտոցային արտադրուկ ունենում են բոլոր կանայք, և սա լրիվ նորմալ երևույթ է:

Հեշտոցային արտադրուկը հանդես է գալիս որպես պաշտանիչ շերտ և հեշտոցի պատը պաշտպանում է տարբեր վարակներից: Հեշտոցային նորմալ արտադրուկն ունի թույլ թթվային ռեակցիա, ինչը բակտերիաների մեծ մասի համար հանդիսանում է ոչ բարենպաստ միջավայր: Միևնույն ժամանակ, լինելով բնական քսանյութ, այս արտադրուկը սեռական հարաբերությունը դարձնում է ավելի հարմարավետ ու անցավ՝ միևնույն ժամանակ կանխելով հեշտոցի վնասվածքները:

Նորմալ արտադրուկը պարունակում է հեշտոցի լորձաթաղանթի մահացած բջիջներ և բակտերիաներ: Դաշտանային ցիկլի փուլից կախված արտադրուկի գույնը և մածուցիկությունը կարող է փոփոխվել:

Ի՞նչն է համարվում նորմալ

Տիպիկ հեշտոցային արտադրուկը չունի տհաճ հոտ և չի գրգռում հեշտոցը կամ արտաքին սեռական օրգանները:

Այն սովորաբար անգույն է կամ թույլ կաթնագույն, թեև երբեմն կարող է ստանալ դեղնավուն երանգ:

Սեռական արտադրուկի քանակը կարող է ավելանալ սեռական գրգռման և հղիության ժամանակ:

Ինչը նորմալ չէ

Անսովոր արտադրուկը հաճախ հեշտոցային վարակի կամ բորբոքման նշան է (օրինակ՝ հեշտոցի կանդիդոզ կամ վագինոզ):

Հեշտոցային ոչ նորմալ արտադրուկի նշաններն են՝

  • երբ այն խիստ մածուցիկ է և սպիտակ՝ նման կաթնաշոռին
  • երբ այն ձկան հոտ ունի
  • երբ այն կանաչավուն է և ունի խիստ տհաճ հոտ
  • երբ այն վարդագույն է կամ շագանակագուն
  • երբ այն գրգռում և առաջացնում է հեշտոցի շրջանի քոր
  • երբ դուք ձեր սեռական օրգանների վրա նկատում եք փոքր վերքեր կամ խոցեր
  • երբ դուք նշում եք ձեր վերցայլքային շրջանի տհաճ զգացողություններ կամ ցավ
  • երբ սեռական հարաբերությունները դառնում են ցավոտ:

Հեշտոցային արտադրուկը և դաշտանային ցիկլը

Դաշտանային ցիկլի ընթացքում հեշտոցային արտադրուկի բնույթը և քանակը կարող է փոփոխվել:

Սովորաբար դաշտանին հաջորդող առաջին շաբաթվա ընթացքում արտադրուկը շատ քիչ քանակով է և աննկատ, թեև երբեմն կարող է դառնալ խիստ մածուցիկ:

Ցիկլի միջին օրերին արտադրուկը լինում է անգույն (երկար ժամանակ միջադիրի վրա մնալիս՝ դեղնավուն) և ստանում է նորմալ մածուցիկություն:

Հեշտոցային արտադրուկը դաշտանադադարից հետո

Դաշտանադադարից հետո հեշտոցը սկսում է աստիճանաբար կորցնել իր խոնավությունը, ինչը պայմանավորված է իգական սեռական հորմոններից էստորգենի մակարդակի նվազեցմամբ:

Այնուամենայնիվ, եթե դաշտանադադարից հետո ձեր հեշտոցային արտադրուկի քանակը չի նվազում, այլ շատանում է կամ ստանում է դեղնավուն երանգ, սա կարող է լինել հնարավոր վարակի նշաններից մեկը:

Եթե դուք անհանգստացած եք ձեր հեշտոցային արտադրուկի բնույթի համար, զրուցեք այդ մասին ձեր բժշկի հետ:

Հոդվածը վերանայվել է՝ 21-04-2019