Հեշտոցային արտադրուկ հղիության ընթացքում

Հեշտոցային արտադրուկ հղիության ընթացքում

Բոլոր կանայք, անկախ այն բանից` հղի են, թե ոչ, ունեն որոշակի հեշտոցային արտադրուկ, որը սկսվում է սեռահասունացումից 1-2 տարի առաջ և դադարում դաշտանադադարից հետո:

Ծանոթացեք նաև այս հոդվածի հետ ուղղակիորեն կապված այլ նյութերի հետ:

Հեշտոցային արտադրուկի քանակը ժամանակի ընթացքում փոփոխվում է և սովորաբար քիչ առատանում է դաշտանից անմիջապես առաջ:

Նորմա՞լ է արդյոք, եթե հղիության ընթացքում ունեմ հեշտոցային արտադրուկ

Գրեթե բոլոր կանանց մոտ հղիության ընթացքում հեշտոցային արտադրուկը քիչ ավելանում է: Սա լրիվ նորմալ է և ունի մի քանի պատճառ: Հղիության ընթացքում արգանդի վզիկը (ցերվիքս) և հեշտոցի պատերը դառնում են ավելի փափուկ, իսկ արտադրությունը շատանում է, որպեսզի կանխարգելի հեշտոցից դեպի արգանդ վարակի հնարավոր վեր թափանցումը: Քանի հղիությունը զարգանում է մինչև իր ավարտ, արտադրուկի քանակն ավելանում է: Երբեմն այն կարող է շփոթվել մեզի հետ:

Հղիության վերջին շաբաթների ընթացքում ձեր արտադրուկը կարող է պարունակել խտացած լորձի շերտեր և քիչ քանակով արյուն: Անգլախոս հեղինակներն այս երևույթն անվանում են «ցուցադրում» (show), երբ հղիության ընթացքում արգանդի վզիկում առկա լորձը (լորձային խցան) սկսում է հեռանալ: Սա նշան է այն մասին, որ մարմինը սկսում է պատրաստվել ծննդաբերությանը: Դուք կարող եք ծննդաբերությունից օրեր առաջ տեսնել այսպիսի մի քանի փոքր «ցուցադրումներ»:

Այսպիսով, հեշտոցային արտադրուկի ավելացումը հղիության նորմալ մասն է, սակայն կարևոր է, որ դուք մշտապես հետևեք այս երևույթին և տեղեկացնեք ձեր բժշկին, եթե նկատում եք որևէ անսովոր փոփոխություն:

Ե՞րբ այցելել բժշկին

Դուք պետք է տեղեկացնեք ձեր բժշկին, եթե հղիության ուշ փուլերում ձեր հեշտոցային արտադրուկը չափից դուրս է ավելացել: Եթե հղիության ընթացքում ունեք հեշտոցային արյունահոսություն, ապա բժշկին այդ մասին տեղեկացրեք անհապաղ, քանի որ սա կարող է լինել ավելի լուրջ խնդրի նշան, ինչպես օրինակ՝ վիժման կամ ընկերքի հետ կապված որևէ խնդրի:

Իմացե՛ք ավելին հղիության ընթացքում հեշտոցային արյունահոսության մասին:

Զրուցեք ձեր բժշկի հետ, եթե՝

  • ձեր հեշտոցային արտադրուկը գունավորված է, հատկապես, եթե պարունակում է արյուն
  • արտադրուկն ունի տարօրինակ կամ խիստ տհաճ հոտ
  • դուք ունեք հեշտոցի շրջանի քոր կամ ցավ:

Առողջ հեշտոցային արտադրուկը պետք է լինի մաքուր և սպիտակ: Այն չի կարող ունենալ տհաճ հոտ: Եթե ձեր արտադրուկը գունավորված է, ունի անսովոր հոտ, կամ եթե դուք զգում եք հեշտոցի շրջանի քոր կամ ցավ, ապա հնարավոր է, որ դուք ունեք հեշտոցային վարակ:

Ամենահաճախ հանդիպող հեշտոցային վարակը կաթնախտն է (կանդիդոզ), որը ձեր բժիշկը կարող է հեշտությամբ բուժել: Նկատի ունեցեք, որ հղիության ընթացքում դուք պետք է չօգտագործեք կանդիդոզի բուժման որոշ դեղեր:

Անպայման զրուցեք ձեր բժշկի կամ դեղագործի հետ, եթե կարծում եք, որ ունեք կաթնախտ: Դուք կարող եք օգնել հեշտոցային կաթնախտի կանխարգելմանը, եթե հագնեք ազատ բամբակե ներքնազգեստ: Որոշ կանայք օգտակար են համարում նաև հոտավետ օճաներից կամ լոգանքի պարագաներից հրաժարումը:

Իմացե՛ք ավելին հղիության ընթացքում հեշտոցային կաթնախտի (կանդիդոզ) մասին:

Հոդվածը վերանայվել է՝ 02-02-2021