Հեշտոցային կանդիդոզը հղիության ընթացքում

3 րոպե

Բազմաթիվ կանանց մոտ կարող է ի հայտ գալ խմորասնկիկային վարակի պատահական բռնկում, որը հայտնի է որպես հեշտոցային կանդիդոզ կամ կաթնախտ:

Հեշտոցային կանդիդոզը կարող է առաջացնել հեշտոցի և ամոթույքի (վուլվա) քոր, գրգռվածությում և այտուց, երբեմն նաև՝ սպիտակ կաթնաշոռանման արտադրություն: Հեշտոցի խմորասնկիկային վարակը բավականին անվնաս է, սակայն կարող է պատճառել անհարմարավետություն և կրկնվի, որը հայտնի է որպես կրկնվող կամ ախտադարձային կաթնախտ:

Կանդիդոզը սնկիկային վարակ է, որը հարուցվում է կանդիդայի Candida albicans կոչվող սնկիկների տեսակով:

Բազմաթիվ կանանց հեշտոցում առկա է կանդիդա սնկիկ՝ առանց որևէ գանգատ առաջացնելու: Հեշտոցային արտազատուկներում առկա հորմոնները և հեշտոցում բնակվող «լավ»-բակտերիաները այս սնկիկը պահում են վերահսկողության ներքո: Խնդիրներն ի հայտ են գալիս, երբ այս բնական հավասարակշռությունը խախտվում է, և կանդիդան սկսում է գերաճ տալ ու շատանալ:

Հեշտոցային կանդիդոզը երբեմն կարող է փոխանցվել սեռական հարաբերության ընթացքում, սակայն այն չի համարվում սեռական ճանապարհով փոխանցվող վարակ: Ուստի, եթե ունեք հեշտոցային կանդիդոզ, ապա ճիշտ կլինի խուսափել սեռական հարաբերությունից, քանի դեռ լիարժեք բուժում չեք ստացել և վարակն ամբողջապես չի վերացել:

Հղիության ընթացքում

Հեշտոցային կանդիդոզի նկատմամբ ձեր ռիսկը հղի վիճակում բարձրանում է, որը պայմանավորված է իգական հորմոնների մակարդակի բարձրացմամբ, ինչպիսին է էստրոգենը: Նման դեպքերում բարձրանում է ինչպես հեշտոցի խմորասնկիկային վարակի զարգացման, այնպես էլ կրկնվելու հավանականությունը:

Որևէ տվյալ չկա այն մասին, որ հեշտոցային կանդիդոզն ազդում է հղիանալու ձեր ունակության կամ հավանականության վրա: Եվ, եթե հղիության ընթացքում դուք ունեք խմորասնկիկային վարակ, այն չի վնասում ձեր չծնված երեխային:

Սակայն, եթե դուք հղի կամ կրծքով կերակրող մայր եք և ունեք կաթնախտ, պետք է խուսափեք բերանով ընդունվող (օրալ) հակասնկիկային դեղամիջոցներ օգտագործելուց: Դրա փոխարեն օգտագործեք հեշտոցային օղակներ (պեսարիա) և, անհրաժեշտության դեպքում, հակականդիդոզային նրբաքսուքներ (կրեմներ):

Բուժում

Եթե հղիության կամ կրծքով կերակրելու ընթացքում ունեք կաթնախտ, հանդիպեք ձեր բժշկին, այլ ոչ թե գնեք և օգտագործեք հակասնկիկային դեղեր:

Ձեզ չի կարելի օգտագործել բերանով ընդունվող (օրալ) հաբեր, քանի որ նման բուժումը կարող է ազդել ձեր չծնված երեխայի վրա: Կան հակասնկիկային հեշտոցային օղեր, օրինակ՝ Կլոտրիմազոլ, Էկոնազոլ կամ Միկոնազոլ, որոնք սովորաբար նշանակվում են երեքից յոթ օր օգտագործելու համար:

Եթե հղի եք, ապա պեսարիան ներմուծեք զգուշությամբ, որ չվնասեք ձեր արգանդի վզիկը: Նման դեպքերում ավելի լավ է պեսարիան ներմուծել ձեռքով, այլ ոչ թե ապլիկատորով:

Եթե զարգացել են հեշտոցի հարակից մաշկի գրգռման կամ բորբոքման գանգատներ և ախտանիշներ, օրինակ՝ քոր և ցավոտություն, բժիշկը կարող է խորհուրդ տալ որևէ հակասնկիկային նրբաքսուք:

Հիշեք, որ այս դեղերից ոչ բոլորն են հղիության տարբեր փուլերում անվտանգ, ուստի կարևոր է, որ զրուցեք ձեր բժշկի հետ մինչև որևէ դեղամիջոց օգտագործելը:

Ի՞նչ կարող եմ անել հեշտոցային կանդիդոզը կանխարգելելու համար

Հեշտոցային կանդիդոզի սրացման ռիսկը կարող եք կանխել մի շարք միջոցառումներով:

• Հագեք բամբակե կամ մետաքսե, այլ ոչ թե սինթետիկ ներքնազգեստ, և փոխեք այն ամեն օր: Զուգագուլպա կրեք հնարավորինս կարճ ժամանակահատվածի ընթացքում:
• Ներքնազգեստը լավ լվացեք տաք ջրով և հիպոալերգիկ օճառով և կրկնակի պարզաջրեք, որ լիովին հեռացնեք հնարավոր գրգռիչ նյութերը:
• Լողալուց կամ ֆիզիկական վարժանքից հետո հնարավորինս շուտ հանեք ձեր լողազգեստը կամ մարզազգեստը և փափուկ սրբիչով նուրբ չորացրեք ձեր սեռական շրջանի թաց կամ խոնավ շրջանները:
• Եթե օգտագործում եք հիգիենիկ միջադիր, կանոնավոր փոխեք դրանք և խուսափեք հոտավետ տեսակներից, որոնք կարող են գրգռվածության պատճառ դառնալ:
• Խուսափեք կիպ անդրավարտիքներից կամ զգեստից (օրինակ՝ ջինսե տաբատ), որը կարող է սեռական օրգանների շրջանում ստեղծել լրացուցիչ խոնավություն և տաքություն՝ բակտերիաների և սնկիկների բազմացման համար նպաստավոր միջավայր:
• Երբեք մի լվացեք ձեր հեշտոցի խոռոչը, քանի դեռ դա չի նշանակել ձեր բժիշկը որպես բուժման միջոց: Տնային պայմաններում կատարված «ներքին» լվացումները բարձրացնում են հեշտոցի գրգռվածության ռիսկը և խախտում նորմալ միկրոֆլորան: Առողջ հեշտոցը չունի նաև հեշտոցային հոտազերծիչի կարիք:
• Խուսափեք հեշտոցի հարակից շրջանը պինդ օճառով, փրփրուն այլ միջոցներով, լոգանքի աղով լվանալուց կամ հոտազերծող նյութեր կամ սփրեյներ օգտագործելուց:
• Ընդհանրապես խուսափեք հեշտոցը կամ հարակից շրջանը մանրէազերծող նյութերով լվանալուց, այդ թվում նաև՝ նոսրացված վիճակում:
• Զուգարանից օգտվելիս սրբեք հեշտոցի շրջանը փափուկ անձեռոցիկով առջևից հետև, այլ ոչ թե հակառակ ուղղությամբ, որ աղիքային միկրոօրգանիզմները չհայտնվեն հեշտոցում: Մի՛ օգտագործեք հոտավետ զուգարանի թուղթ, որը կարող է առաջացնել մաշկի կամ լորձաթաղանթների գրգռում: