Պտղաջրերի հոսք - Ծննդաբերություն

Մտահոգվա՞ծ եք պտղաջրերի արտոհոսքով: Պատրաստվեք ծննդաբերությանը՝ ստանալով տեղեկություններ ծննդաբերության այս կարևոր նշանի մասին:

Եթե հղի եք, ձեզ կարող է հետաքրքրել, թե ե՞րբ է պտղաջրերի հոսքը տեղի ունենում, ի՞նչ զգացողություններ կունենաք և ի՞նչ անել դրանից հետո: Իմացեք պտղաջրերի հոսքի նշանները և այն, թե դա ինչ է նշանակում ձեր երեխայի ծննդաբերության ժամկետի համար:

Ի՞նչ է տեղի ունենում պտղաջրերի հոսքից հետո

Հղիության ընթացքում ձեր երեխան շրջապատված և ընկղմված է հեղուկով լցված թաղանթային հերմետիկ պարկի մեջ, որը կոչվում է պտղապարկ (ամնիոտիկ պարկ): Նորմայում, ծննդաբերության սկզբում կամ ընթացքում ձեր թաղանթները պատռվում են, որից հետո պտղաջրերը հայտնվում են ծննդաբերական ուղիներում, լվանում են երեխայի ծննդյան այս ուղիները և թափվում հեշտոցից: Սա հայտնի է որպես պտղաջրերի (կամ պարզապես ջրերի) հոսք կամ արտահոսք։

Եթե ձեր ջրերը հեռանում են մինչև ծննդաբերության սկիզբը, սա կոչվում է թաղանթների նախածննդյան պատռվածք (ԹՆԾՊ): ԹՆԾՊ-ն նախկինում հայտնի էր որպես թաղանթների վաղաժամ պատռվածք:

Երբ ձեր ջրերը հեռանում են, դուք կարող եք զգալ թացության զգացողություն հեշտոցում կամ շեքում, հեշտոցից փոքր քանակությամբ ջրային հեղուկի ընդհատվող կամ մշտական արտահոսք կամ թափանցիկ կամ բաց դեղին հեղուկի ավելի ակնհայտ արտահոսք:

Ինչպե՞ս կարող եք համոզվել, որ ձեր ջրերը հեռացել են

Միշտ չէ, որ պտղաջրերի հոսքը կարելի է հեշտությամբ հայտնաբերել: Օրինակ, ձեզ կարող է դժվար լինել պտղաջրերը տարբերակել մեզի արտահոսքից (և սխալմամբ կարծեք, որ պարզապես չեք հասցրել զուգարան գնալ), հատկապես, եթե ունեք միայն խոնավության զգացում կամ քիչ քանակով հեղուկի արտահոսք:

Եթե կասկածում եք, թե արդյոք ձեր ջրերը հոսել են, զանգահարեք ձեր բժշկին կամ անմիջապես այցելեք ձեր ծննդատուն (կամ զանգեք շտապ օգնություն՝ ձեզ ծննդատուն տեղափոխելու համար): Ձեր բժիշկը կանցկացնի ֆիզիկական քննություն (բուժզննում), որ պարզի, թե արդյոք դուք ունեցել եք պտղաջրերի արտահոսք: Որոշ դեպքերում կարող է կատարվել գերձայնային հետազոտություն՝ ձեր պտղաջրերի ծավալը ստուգելու համար: Այս քայլերը կօգնեն ձեր բժշկին, որ որոշի հետագա գործողությունները:

Ջրերը գնալուց հետո ե՞րբ է սկսվում ծննդաբերությունը

Նորմայում, երբ ըստ ժամկետի ձեր պտղաջրերը հեռանում են, շուտով մեկնարկում է ծննդաբերությունը, եթե այն դեռ չի սկսվել:

Երբեմն, սակայն, ծննդաբերությունը չի սկսվում: Եթե ունեք ԹՆԾՊ և ձեր ջրերը հեռացել են, բժիշկը կարող է խթանել ձեր արգանդի կծկանքները նախքան ծննդաբերության ինքնաբուխ մեկնարկը (ծննդաբերության ինդուկցիա կամ խթանում): Որքան ձեր ջրերը գնալուց հետո ուշանում է ծննդաբերությունը, այնքան մեծանում է ձեր կամ ձեր երեխայի վարակի զարգացման ռիսկը:

Ի՞նչ է տեղի ունենում, երբ ձեր ջրերը հոսում են շատ վաղ

Եթե պտղաջրերն արտահոսում են մինչև ձեր հղիության 37-րդ շաբաթը, նման վիճակը հայտնի է որպես վաղաժամ թաղանթների նախածննդյան պատռվածք (վաղաժամ ԹՆԾՊ)։ Ջրերի շատ վաղ հոսքի ռիսկի գործոններից են՝

• նախորդ հղիության ընթացքում ծննդաբերությունից առաջ վաղաժամ ԹՆԾՊ-ի պատմությունը
• պտղաթաղանթների բորբոքումը (ներպտղապարկային վարակ)
• հղիության երկրորդ և երրորդ եռամսյակում հեշտոցային արյունահոսություն
• հղիության ընթացքում ծխելը կամ ապօրինի թմրամիջոցներ օգտագործելը
• անբավարար սնուցմամբ թերքաշ լինելը
• արգանդի վզիկի կարճ երկարությունը:

Հնարավոր բարդություններից են մոր կամ պտղի վարակը, ընկերքի շերտազատումը, երբ այն անջատվում է արգանդի ներքին պատից մինչև ծննդաբերությունը, և պորտալարի հետ կապված խնդիրները: Վաղաժամ ծննդաբերությունը նաև բարդությունների ռիսկի է ենթարկում չծնված երեխային։

Եթե ունեք վաղաժամ ԹՆԾՊ և առնվազն 34 շաբաթական հղի եք, վարակից խուսափելու համար ձեզ կարող է առաջարկվել ծննդալուծում: Այնուամենայնիվ, եթե վարակի նշաններ կամ պտղի առողջական խնդիրներ չկան, հետազոտությունը ցույց է տալիս, որ հղիությունը կարող է ապահով կերպով շարունակվել այնքան ժամանակ, քանի դեռ ուշադիր վերահսկվում է:

Եթե 24-ից 34 շաբաթական հղի եք, ձեր բժիշկը կփորձի հետաձգել ծննդաբերությունն այնքան ժամանակ, մինչև ձեր երեխան դառնա ավելի զարգացած: Ձեզ կնշանակեն հակաբիոտիկներ՝ վարակը կանխելու համար և ուժեղ ստերոիդների (կորտիկոստերոիդներ) ներարկում՝ ձեր երեխայի թոքերի հասունացումն արագացնելու համար: Եթե ձեր հղիությունը մինչև 32 շաբաթական է և հաջորդ մի քանի օրվա ընթացքում ծննդաբերելու վտանգի տակ եք, ձեզ կարող է նշանակվել մագնեզիումի սուլֆատ՝ երեխայի նյարդային համակարգը պաշտպանելու համար:

Կորտիկոստերոիդներ նաև կարող են առաջարկվել հղիության 23-րդ շաբաթից սկսած, եթե առկա է 7 օրվա ընթացքում ծննդաբերելու վտանգ: Բացի այդ, կորտիկոստերոիդներ կարող են առաջարկվել, եթե դուք հղիության 34-ից 36-րդ շաբաթական և 6-րդ օրերի միջև եք, 7 օրվա ընթացքում ծննդաբերելու վտանգի տակ եք, և նախկինում այս դեղամիջոցը չեք ստացել: Ձեզ նաև կարող են նշանակել կորտիկոստերոիդների կրկնակի կուրս, եթե ունեք 34 շաբաթականից ցածր հղիություն, 7 օրվա ընթացքում ծննդաբերելու վտանգի տակ եք, և կորտիկոստերոիդների նախորդ կուրսը ձեզ տրվել է ավելի քան 14 օր առաջ:

Իսկ եթե ձեր հղիությունը չի հասնում 24 շաբաթականին, բժիշկը կբացատրի խիստ վաղաժամ երեխա ունենալու վտանգները և ծննդաբերությունը հետաձգելու փորձի վտանգներն ու օգուտները:

Ի՞նչ է տեղի ունենում, երբ ձեր ջրերն ինքնուրույն չեն հոսում

Ակտիվ ծննդաբերության ժամանակ, եթե ձեր արգանդի վզիկը լայնացած և բարակված է, և երեխայի գլուխը իջել է կոնքի խորք, ձեր բժիշկը կարող է օգտագործել մի մեթոդ, որը հայտնի է որպես պտղապարկի հատում (ամնիոտոմիա): Սա թույլ է տալիս, որ սկսվեն ծննդաբերական կծկանքները կամ նպաստում է արդեն սկսված կծկանքների խթանմանը: Ամնիոտոմիայի ժամանակ օգտագործվում է բարակ պլաստիկ կեռիկ՝ պտղապարկի վրա փոքր բացվածք ստեղծելու և ձեր ջրերի արտահոսքն ապահովելու համար:

Բնական է, որ դուք կարող եք մտահոգվել ծննդաբերության և ծննդալուծման հարցերով: Թեև դուք չեք կարող կանխագուշակել, թե երբ ձեր ջրերը կգնան, կարող եք այս բացը լրացնել հաջորդ քայլերի մասին ձեր գիտելիքներով և անորոշության որոշակի ցրմամբ: