Ժամկետանց հղիություն - Հղիություն

Նորմայում հղիությունը տևում է մոտ 40 շաբաթ, որը համապատասխանում է ձեր վերջին դաշտանի առաջին օրվանից հաշված մոտ 280-րդ օրվան:

Բազմաթիվ կանայք ծննդաբերում են այս ժամկետից շուտ կամ ուշ ոչ ավելի, քան մոտ մեկ շաբաթվա ընթացքում: 

Ի՞նչ են ուշ ժամկետային և ժամկետանց հղիությունները

Որոշ կանանց հղիությունը կարող է դառնալ ժամկետանց, երբ հղիությունը հասել է իր զարգացման ավարտին, սակայն ծննդաբերությունը չի սկսվում:

Հղիությունը համարվում է «ժամկետանց» միայն այն դեպքում, երբ այն երկու շաբաթ է գերազանցել է ծննդաբերության հաշվարկված ժամկետը: Այլ կերպ ասած, հղիությունը ժամկետանց է, եթե հասել է 42 շաբաթական և դրանից հետո: 41 շաբաթից մինչև 41 շաբաթ և վեց օրվա ընթացքում հղիությունը կոչվում է ուշ ժամկետային: Ծննդաբերություն այս դեպքերում անվանում են ուշացած:

Ժամկետանց հղիության արդյունքում ծնված երեխաները սովորաբար լինում են գերհասուն, թեև հնարավոր է, որ ծննդաբերությունն ուշանա, բայց պտղի գերհասունության նշաններ չլինեն:

Ժամկետանց հղիության ռիսկի գործոնները

Դուք կարող եք ժամկետանց հղիության ավելի մեծ հավանականություն ունենալ, եթե՝

• սա ձեր առաջին հղիությունն է։
• նախորդ հղիության ժամանակ երկու շաբաթ գերազանցել եք ձեր ծննդաբերության ժամկետը
• ձեր երեխան տղա է
• ունեք 30 կամ ավելի բարձր մարմնի զանգվածի ցուցանիշ (ՄԶՑ), որը համարվում է, ու ունեք գիրություն
• ձեր ծննդաբերության ժամկետը սխալ է հաշվարկվել, որը կարող է պայմանավորված լինել ձեր վերջին դաշտանի սկզբի ամսաթվի շփոթությամբ կամ, երբ ամսաթիվը հաշվարկվել է հղիության 22 շաբաթից հետո գերձայնային հետազոտության հիման վրա:

Որոշ դեպքերում ժառանգականությունը (գենետիկան) նույնպես կարող է դեր խաղալ: Հազվադեպ, ուշացած հղիությունը կարող է կապված լինել ընկերքի կամ երեխայի հետ կապված խնդիրների հետ:

Ինչ էլ որ լինի պատճառը, դուք, հավանաբար, հոգնած կլինեք հղիությունից և կարող եք ավելի անհանգստանալ, երբ ծննդաբերության հաշվարկված օրերն անցնում են: Բոլոր դեպքերում, ժամկետանց հղիությունը չի կարող հավերժ տևել, և ծննդաբերությունը կարող է սկսվել ցանկացած պահի:

Որո՞նք են ռիսկերը

Ուշ ժամկետային և ժամկետանց հղիությունը կարող են բարձրացնել որոշ առողջական խնդիրների ռիսկը:

• Միջինից մեծ չափս ծննդյան չափս (պտղի մակրոսոմիա)․ սա մեծացնում է հավանականությունը, որ ձեզ կարող է անհրաժեշտ լինել ծննդաբերական աքցաններ, վակուումային սարք կամ մեկ այլ գործիք՝ ծննդաբերությանն օժանդակելու համար: Այն նաև կարող է մեծացնել կեսարյան հատում կատարելու ռիսկը: Ավելի մեծ երեխա ծննդաբերելը նաև ավելի հավանական է դարձնում, որ երեխայի ուսը «լռվի» ձեր կոնքի ոսկորի հետևում (ուսի դիստոցիա)։
• Հետհասունության համախտանիշ (Բելենտայն-Ռունգե). այս վիճակը բնորոշվում է երեխայի մաշկի տակ ճարպի նվազմամբ (կնճռոտում) և յուղոտ ծածկույթի բացակայությամբ (vernix caseosa), փափուկ աղվամազերի քչացմամբ և պտղաջրերի (ամնիոտիկ հեղուկի), մաշկի և պորտալարի երեխայի առաջին կղազատմամբ (մեկոնիում) ներկմամբ (մուգ կանաչավուն):
• Պտղաջրերի (ամնիոտիկ հեղուկի) քչացում, որը նաև կոչվում է օլիգոհիդրամնիոզ․ սա կարող է ազդել երեխայի սրտի հաճախության վրա և ծննդաբերական կծկանքների ժամանակ սեղմել պորտալարը:

Ուշ ժամկետային և ժամկետանց հղիությունները կարող են առաջացնել ծննդաբերության հետ կապված խնդիրներ: Որոշ մայրեր կարող են առնչվել հետևյալ խնդիրների հետ՝

• հեշտոցային մեծ պատռվածքներ
• վարակ
• հետծննդաբերական արյունահոսություն:

Ձեր հղիության մշտադիտարկումը (մոնիտորինգ)

Երբ ձեր ծննդաբերության ժամկետից անցել է մեկ շաբաթից ավելի, ձեր բժիշկը կարող է ստուգել երեխայի սրտի հաճախությունը (ոչ սթրեսային թեստ): Պտղի սրտազարկի արագացումը կարող է վկայել երեխայի հիպօքսիկ վիճակի մասին (թթվածաքաղց):

Սա կարող է զուգակցվել գերձայնային հետազոտության հետ՝ ստուգելու երեխայի սրտի հաճախությունը, շնչառությունը, մկանային տոնուսը և շարժումները (կենսաֆիզիկական պրոֆիլ): Սովորաբար ստուգվում է նաև հարպտղաջրերը (ամնիոտիկ հեղուկ)։

Այս հետազոտությունների հիման վրա ձեր բժիշկը կարող է խորհուրդ տալ ծննդաբերության դրդում (ինդուկցիա): Ծննդաբերության ինդուկցիան խթանում է արգանդի կծկումները՝ նախքան ծննդաբերության ինքնուրույն սկսվելը:

Երեխայի «դուրս հրում»

Ձեր բժիշկը կարող է առաջարկել ծննդաբերության մեկնարկը խթանելու ուղիներ: Ահա որոշ օրինակներ:

• Արգանդի վզիկի «հասունացում». ձեզ կարող են դեղեր տալ՝ ձեր արգանդի վզիկը փափկացնելու և լայնացնելու (հասունացնելու) համար: Կամ ձեր բժիշկը կարող է լայնացնել ձեր արգանդի վզիկը` դրա մեջ նեմուծելով բարակ խողովակ (կաթետեր), որի ծայրին փչովի փուչիկ է:
• Պտղապարկի (ամնիոտիկ պարկի) թաղանթների մաքրում. այս տեխնիկայի միջոցով, որը նաև հայտնի է որպես թաղանթների մերկացում, բժիշկը ձեռնոց անցկացված մատով նրբորեն անջանում է պտուղը շրջապատող պտղապարկը արգանդի վզիկից և արգանդի ստորին պատից:
• Պտղապարկի (ամնիոտիկ պարկի) պատռում. եթե ձեր պտղապարկը դեռ անվնաս է, ձեր բժիշկը կարող է դատարկել հեղուկը՝ բարակ պլաստիկ կեռիկով բացվածք ստեղծելով պտղապարկի վրա: Սա առաջացնում է պտղաջրերի հեռացում:
• Ծննդաբերական կծկանքներ հարուցելու համար դեղորայքի օգտագործում․ Օքսիտոցինի (Պիտոցին) մի տարբերակը, որը հորմոն է և առաջացնում է արգանդի կծկանքներ, կարող է տրվել ծննդաբերության հրահրման համար:

Սովորաբար, արգանդի վզիկի լայնացումը, պտղապարկի պատռումը և կծկանքներ հրահրելու համար Պիտոցինի ներարկումը իրականացվում են ծննդատան ծնարանում:

Ծննդաբերության ինդուկցիան սովորաբար պլանավորված միջոցառում է, ուստի կարող եք ժամանակ գտնել և զրուցել բժշկի հետ այս մեթոդի լավ ու վատ կողմերի` առավելությունների ու ռիսկերի, ինչպես նաև ցուցումների կամ հակացուցումների մասին: Ամեն դեպքում, ձեր որոշումն է՝ խթանե՞լ ձեր ծննդաբերությունը, թե՞ սպասել վերջինիս բնականոն ընթացքին:

42 շաբաթականից անց հղիություն

Բազմաթիվ կանանց մոտ մինչև հղիության 42 շաբաթականը լրանալը ծննդաբերությունն ինքնուրույն սկսվում է:

Եթե ձեր հղիությունը շարունակվում և անցնում է 42 շաբաթյա ժամկետը, և չեք ցանկանում, որ ձեր ծննդաբերությունն արհեստականորեն դրդվի, ձեր և երեխայի նկատմամբ բժշկական հսկողությունը դառնում է էլ ավելի աչալուրջ: Բժիշկը պետք է ձեզ հետ քննարկի ստեղծված իրավիճակը՝ հաշվի առնելով ինչպես ձեր, այնպես էլ ձեր երեխայի վիճակը և ակնկալվող զարգացումները:

Նման դեպքերում պտղի գերձայնային հետազոտությունը կարող է ցույց տալ, որ ընկերքն այլևս չի հասցնում երեխային մատակարարել այնքան թթվածին և սննդանյութեր, որքան անհրաժեշտ է («ծերացած ընկերք»): Նման իրավիճակում ձեզ կրկին կարող է առաջարկվել ծննդաբերության ինդուկցիա կամ կեսարյան հատման միջոցով վիրահատական ծննդալուծում:

Եթե ձեր հղիության 42-րդ շաբաթը լրացել է, բարձրանում է մեռելածնության կամ պտղային բարդությունների հավանականությունը (որոնց դեպքում ձեր երեխայի առողջական վիճակը և կյանքը դրվում է ռիսկի տակ):

Իհարկե, սա բնավ չի նշանակում, որ 42 շաբաթականն անցած բոլոր հղիությունների ժամանակ այս ռիսկը կա: Ամեն ինչ կախված է ձեր՝ որպես հղիությունը տանող և ձեր չծնված երեխայի առողջական վիճակից, ուղեկցող հիվանդությունների կամ հղիության բարդությունների առկայությունից և մի շարք այլ գործոններից, որոնց վերաբերյալ բժիշկն ամենայն մանրամասնությամբ և պատասխանատվությամբ ձեզ կտեղեկացնի: