Ադրենալինային հոգնածություն - Ներզատական խանգարումներ

Երբևէ ինչ-որ մեկը ձեզ ասե՞լ է, որ ձեր մշտական հոգնածության պատճառը կարող է լինել ​ադրենալինի պակասը​:

Մակերիկամային կամ ադրենալինային հոգնածությունը հետաքրիր գաղափար է, բայց սահմանված չէ որպես բժշկական ախտորոշում:

Կան մշտական հոգնածության զգացում առաջացնող բազմաթիվ պատճառներ և ոչ միշտ է, որ հնարավոր է հեշտությամբ գտնել պատճառը:

Եթե կարծում եք, որ ձեզ մոտ կարող է լինել մակերիկամային կամ ադրենալինային հոգնածություն, ճիշտ կլինի, որ այդ մասին խոսեք ձեր բժշկի հետ, որ բաց չթողնեք այլ պատճառներ: Նման դեպքերում գովազդվող սննդային հավելումները կարող են վնասել ձեր առողջությունը:

Ի՞նչ է մակերիկամային հոգնածությունը

Մակերիկամային հոգնածություն կամ ադրենալինային հոգնածություն արտահայտությունը կիրառում են այլընտրանքային բժշկությամբ զբաղվող որոշ մասնագետներ՝ որպես հետևյալ ախտանիշների հավաքական նկարագիր՝

• անսովոր սաստիկ հոգնածության զգացում
• մարմնի անորոշ ցավեր կամ կորտրվածության զգացում
• դյուրագրգռություն
• ցածր արյան ճնշում (հիպոտենզիա)
• քնի խանգարումներ
• մարսողական խանգարումներ
• աղի նկատմամբ հակում:

Ձեր մակերիկամները երիկամների վրա նստած զույգ ներզատական գեղձեր են, որոնք արտադրում են հորմոններ, այդ թվում՝ ադրենալին և նորադրենալին: Վերջիններս ձեր օրգանիզմը նախապատրաստում են ձեր սթրեսը դիմակայելուն:

Որոշ մարդիկ հավատում են, որ գերծանրաբեռնվածությունից «հոգնած» մակերիկամները չեն կարողանում արտադրել վերոնշյալ հորմոնների բավարար քանակներ: Այս վարկածն առաջին անգամ 1998թ.-ին արտահայտել է ոսկրաբուժությամբ զբաղվող մի հեքիմ, որից հետո այն դարձել է հանրաճանաչ: Այնուամենայնիվ, որևէ գիտական տվյալ չկա, որն ապացուցի նման վիճակի առկայությունը:

Բուժում

Այլընտրանքային մասնագետը ձեզ կարող է խորհուրդ տալ սահմանափակել ալկոհոլի, թմրամիջոցների, սուրճի և ծխախոտի օգտագործումը, փոփոխել սննդակարգը, զբաղվել ֆիզիկական վարժանքներով և ապահովել բավարար քուն: Բնականաբար, թվարկված բոլոր այս գործոնները կարող են օգնել ձեր ինքնազգացողության բարելավմանը:

Որոշ դեպքերում ձեզ կարող են առաջարկել նաև տարբեր հավելումների և վիտամինների ընդունում: Եթե ցանկանում եք հետևել այս խորհուրդներին, ստուգեք դրանց նպատահակահարմարությունը՝ հարցնելով ձեր բժշկին:

Եթե անհանգստացած եք անբացատրելի հոգնածության և ուժասպառության զգացումներով, այցելեք ձեր բժշկին: Չի բացառվում, որ ձեր հոգնածության պատճառը լինի ոչ թե մակերիկամային անբավարարությունը, այլ երկաթի պակասը, վահանաձև գեղձի գուծունեության ընկճումը և այլ վիճակներ:

Մակերիկամների գործունեության վրա ազդող այլ հիվանդություններ

Որոշ հիվանդություններ, օրինակ, մակերիկամային անբավարարությունը, որը կոչվում է Ադիսոնի հիվանդություն, կարող են ընթանալ հորմոնային անբավարարությամբ: Ադիսոնի հիվանդությունը հազավադեպ, սակայն ծանր հիվանդություն է:

Ադիսոնի հիվանդության ախտանիշներից են՝ ընհանուր թուլություն և հոգնածություն, անբացատրելի քաշի կորուստ, ցածր արյան ճնշում, գլխապտույտ, մազաթափություն և մաշկի գունազրկում:

Հոգնածության այլ պատճառներ

Կան ավելցուկային հոգնածություն պատճառող տարբեր պատճառներ, որոնցից են՝

• աշխատանքի կամ ֆիզիկական ու մտավոր լարվածության չարաշահում
• ընտանեկան ծանրաբեռնված կյանք
• անբավարար քուն
• խիստ ցածր ֆիզիկական գործունեություն
• անառողջ սննդակարգ
• ալկոհոլի օգտագործում կամ չարաշահում
• հոգեկան առողջության խնդիրներ, օրինակ՝ տագնապային խանգարումներ և դեպրեսիա:

Կան նաև անբացատրելի թուլությամբ և հոգնածությամբ ուղեկցվող տարբեր ֆիզիկական հիվանդություններ, օրինակ՝

• վահանաձև գեղձի խնդիրներ
• շաքարային դիաբետ (շաքարախտ)
• ֆիբրոմիալգիա
• քրոնիկ հոգնածության համախտանիշ (միալգիկ էնցեֆալիտ)
• քաղցկեղ
• սակավարյունություն (անեմիա)
• երիկամային հիվանդություններ
• լյարդի հիվանդություններ (օրինակ՝ ցիռոզ)
• վարակներ
• սրտանոթային հիվանդություններ
• ցրված սկլերոզ:

Ի՞նչ կարելի է անել

Բժիշկը կարող է խորհուրդ տալ տարբեր միջոցառումներ, որոնք ուղղված են ձեր ապրելակերպն ավելի առողջ դարձնելուն, օրինակ՝

• ամենօրյա բավարար քնի ապահովում (չափահասների մեծ մասը ունի 6-8 ժամյա գիշերային քնի պահանջ)
• ռելաքսացիայի տարբեր մեթոդներով սթրեսի կրճատում
• ալկոհոլի օգտագործման սահմանափակում
• բավարար հանգստի ապահովում, եթե կատարում եք չափից դուրս ծանր ֆիզիկական աշխատանք կամ հավասարակշռված ֆիզիկական ակտիվացում, եթե վարում եք նստակյաց կյանք: