Եթե ունեք հակաբիոտիկների նկատմամբ ալերգիա, ձեզ մոտ կարող են առաջանալ ցան, դեմքի այտուցվածություն կամ շնչարգելություն:
Ալերգիան կամ գերզգայունության ռեակցիան հակաբիոտիկների ամենահաճախ հանդիպող կողմնակի ազդեցություն է: Միշտ տեղեկացրեք ձեր բժշկին, եթե նախկինում որևէ դեղից, այդ թվում՝ հակաբիոտիկներից ձեզ մոտ գրանցվել է որևէ տիպի ալերգիկ ռեակցիա:
Իմացե՛ք ավելին ալերգիաների մասին:
Թեթև ալերգիկ ռեակցիան կարող է դրսևորվել միայն մաշկային ցանով: Ծանր ալերգիկ ռեակցիան, որը հայտնի է որպես անաֆիլաքսիա, սովորաբար զարգանում է հակաբիոտիկն ընդունելուց հետո մոտ մեկ ժամվա ընթացքում և անհետաձգելի բուժօգնություն պահանջող վիճակ է: Նման դեպքերում պետք է անհապաղ զանգել 1-03 և կանչել շտապ օգնություն:
Անաֆիլաքսիայի ախտանիշներն են՝
- դժվարացած կամ աղմկոտ շնչառություն
- լեզվի այտուց
- կոկորդի այտուց և նեղացում
- խոսելու դժվարություններ
- ձայնի խռպոտացում
- խզզոց կամ հազ
- գլխապտույտ կամ գիտակցության կորուստ
- հաճախացած անոթազարկ (տախիկարդիա)
- գունատություն և ընդհանուր թուլություն (հատկապես մանկահասակ երեխաների մոտ):
Երբեմն ձեզ մոտ կարող է զարգանալ անաֆիլաքսիայից ավելի քիչ վտանգավոր վիճակ, օրինակ՝
- դեմքի, շրջունքների և (կամ) շրթունքների այտուցվածություն
- եղնջացան կամ մաշկային բծեր
- որովայնի ցավ կամ փսխումներ:
Ժամանակակից ուղեցույցներով որպես անաֆիլաքսիայի հասցնող սուր ալերգիկ բուժման առաջին միջոց առաջարկվում է Ադրենալինը (Էպինեֆրին):
Իմացե՛ք ավելին անաֆիլաքսիայի մասին:
Հակաբիոտիկներից ալերգիկ ռեակցիաների մեծ մասը պատճառվում է Պենիցիլինով կամ պենիցիլինի շարքի դեղերով: Ալերգիկ ռեակցիաներ առաջացնելու հակում ունեն նաև սուլֆոնամիդային խմբի հակաբիոտիկները:
Հակաբիոտիկ ստանալուց հետո առաջացող սրտխառնոցի զգացումը և փսխումը սովորաբար հակաբիոտիկի կողմնակի ազդեցության, քան ալերգիկ ռեակցիայի նշան է: Եթե որևէ հակաբիոտիկ ընդունելուց հետո ձեզ մոտ առաջանում է ալերգիկ ռեակցիա, բժիշկը կարող է ձեզ ուղեգրել ալերգոլոգի խորհրդատվության:
Հոդվածը հրապարակվել է՝ 12-05-2018
Վերջին վերանայում՝ 30-04-2024