Առողջական խնդիրներ
Մեջքի կամ գոտկային ցավերը հղիության ընթացքում
3 րոպե
Հղիության ընթացքում ձեր մարմնի կապանները դառնում են ավելի փափուկ և առաձգական, որը մոտակա ծննդաբերությանը նախապատրաստվելու նշաններից մեկն է:
Սակայն, նման վիճակը կարող է բերել ձեր գոտկային և կոնքային հոդերի վրա ծանրաբեռնվածության մեծացման, որն էլ առաջացնի մեջքի կամ գոտկային ցավեր: Ձեր արգանդի հավելյալ զանգվածը և մեջքի ստորին շրջանի կորության մեծացումը (կրծքային կիֆոզ-գոտկային լորդոզ-սրբանային կիֆոզ) նույնպես կարող են նպաստել մեջքի ցավի առաջացմանը:
Հղիության ժամանակ մեջքի ցավերից խուսափում
Կան մի շարք բաներ, որոնք կարող են օգնել, որ հնարավորինս խուսափեք թիկունքի կամ գոտկային շրջանի ցավերից կամ, եթե դրանք առաջացել են՝ մեղմացնեք գանգատները:
Ստորև նշված մեթոդները կարող են օգնել՝ պաշտպանելու ձեր մեջքը: Հիշեք, որ դրանք պետք է անել ամեն օր:
- Խուսափեք ծանր բեռներ բարձրացնելուց:
- Ինչ-որ մի բան հատակից բարձրացնելիս ծալեք ոտքերը ծնկներում և մեջքը պահեք ուղիղ:
- Մի կողմ թեքվելիս շարժեք ձեր ոտքը, այլ ոչ թե պտտեք իրանը:
- Հագեք հարթ ներբանով կոշիկ, որը թույլ է տալիս հավասարաչափ բաշխել մարմնի քաշը:
- Սեղանի շուրջ աշխատելիս բարձրացրեք աշխատանքային մակերեսն այնպես, որ կանխեք իրանի առաջ թեքումը կամ կռացած աշխատելը:
- Գնումները տեղափոխելիս փորձեք ձեր քաշը հավասարակշռել (հավասարաչափ բաշխել) երկու ոտքերի միջև:
- Նստեք ուղիղ մեջքով և օգտվեք ամուր թիկնակով աթոռից:
- Խուսափեք երկար ժամանակ նույն դիրքում (օրինակ՝ կանգնած կամ նստած) անշարժ կամ գամված մնալուց:
- Համոզվեք, որ ձեր քնին և հանգստին հատկացնում եք բավարար ժամանակ, հատկապես՝ հղիության ուշ փուլերում:
Անկողնու պինդ ներքնակը (դոշակ, մատրաս) նույնպես կարող է օգնել մեջքի շրջանի ցավերի կանխարգելմանը կամ մեղմացմանը: Եթե ձեր ներքնակը շատ փափուկ է, տակը դրեք լայն պինդ լամինատե տախտակ:
Որոշ միջոցներ նույնպես կարող են օգնել թուլացնելու ձեր ցավերը, օրինակ՝
- աքվարոբիկա (ջրի մեջ նուրբ վարժանքներ)
- ասեղնաբուժություն
- մերսում
- ջեռակ
- կանոնավոր վարժանքներ, ներառյալ՝ քայլք կամ արագ զբոսանք:
Իմացե՛ք ավելին հղիության ընթացքում ֆիզիկական վարժանքների օգտակարության մասին:
Հղիության ընթացքում մեջքի ցավերը մեղմացնող վարժանքներ
Ստորև նկարագրված թեթև վարժանքները կարող են օգնել հղիության ընթացքում գոտկային ցավերի մեղմացմանը:
Ձգումներ՝ գոտկային շրջանի համար
- նստեք կրուկների վրա՝ միմյանցից հեռացնելով ձեր ծնկները
- զգուշությամբ թեքվեք-կռացեք առաջ՝ արմունկներն իջեցնելով հատակին
- դանդաղորեն ձգեք ձեռքերն առաջ
- պահեք այս դիրքը մի քանի վայրկյան:
Ձգումներ՝ մեջքի միջին շրջանի համար
- իջեք ձեռքերի և ծնկների վրա (չորեքթաթ դիրք)
- ներս ձգեք որովայնի ստորին մասը
- քիչ կորացրեք մեջքը դեպի դուրս (վերև)
- պահեք այս դիրքը մի քանի վայրկյան
- զգուշությամբ իջեցրեք մեջքն այնքան, որ ձեզ հարմարավետ զգաք:
Ձգումներ` թիակների և մեջքի վերին շրջանի համար
- նստեք պինդ նստատեղով աթոռին
- ձգեք որովայնի մկանները
- «կողպեք» մատները և պահեք ձեռքերը գլխից վերև
- ուղղեք արմունկները և պտտեք «կողպված» ձեռքերը՝ ափերով դեպի վեր
- պահեք այս դիրքը մի քանի վայրկյան:
Եթե ձեր մեջքի (գոտկատեղի) ցավերը շարունակվում են, փոփոխվում կամ ուժգնանում, կապ հաստատեք ձեր բժշկի հետ: Հղիության ցանկացած փուլում, եթե գոտկատեղի ցավերն ուղկեցվում են հեշտոցից արյան կորստի հետ, առանց ուշացնելու դիմեք բժշկական օգնության:
Հոդվածը տեղադրվել է՝ 27-04-2020 վերանայվել է՝ 27-03-2023
Հեղինակ
Հեղինակային բոլոր իրավունքները պատկանում են Մեդեքսին։
Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:
